تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: إيجاد مساحة المستطيل

سوزان فائق

يوضح الفيديو كيفية إيجاد مساحة المستطيل باستخدام صيغة الطول في العرض، وأمثلة عليها.

٠٤:٢١

‏نسخة الفيديو النصية

هنتكلم في الفيديو ده عن إيجاد مساحة المستطيل، إيه هي الصيغة اللي بنحسب بيها مساحة المستطيل.

المستطيل هو شكل له أربع أضلاع، وكل ضلعين متقابلين متساويين في الطول ومتوازيين. الضلع ده بنقول عليه الطول. وده بنقول عليه العرض.

مساحة المستطيل هي المساحة اللي بتغطي سطح المستطيل بالوحدات المربعة. يعني لو قسّمنا مساحة المستطيل عبارة عن مربعات بالشكل ده أعمدة وصفوف، هنعدّ عدد المربعات اللي بتمسح الشكل كله، وهي دي مساحة المستطيل.

عدد الصفوف بيمثّل العرض، وعدد الأعمدة بيمثّل الطول. ومساحة المستطيل هي الطول في العرض، واللي هو بيمثّل عدد الصفوف في عدد الأعمدة. هي دي الصيغة اللي هنستخدمها لإيجاد مساحة المستطيل، وبتبقى وحدة المساحة هي الوحدات المربعة اللي ممكن تبقى سنتيمتر أو متر أو كيلومتر، وهكذا.

في المثال ذلك المستطيل به أربع صفوف وست أعمدة، اوجد مساحته.

مساحة المستطيل هتساوي الطول في العرض. الطول اللي بنمثّله هنا كده عبارة عن عدد الأعمدة. عدد الأعمدة ستة، وعدد الصفوف أربعة. يبقى مساحة المستطيل ده أربعة وعشرين وحدة مربعة.

مثال كمان: اوجد مساحة المستطيل في الشكل.

مساحة المستطيل تساوي الطول في العرض. هنا الطول سبعة، والعرض تلاتة. يبقى واحد وعشرين وحدة مربعة. وهي دي قيمة مساحة المستطيل اللي في الشكل.

اوجد مساحة الجزء الرمادي، والذي يمثّل مساحات خضراء تحيط بالمبنى واحد والمبنى اتنين.

مساحة الجزء الرمادي ده عبارة عن مساحة المستطيل الكبير اللي طوله واحد وعشرين سنتيمتر وعرضه حداشر سنتيمتر. ناقص مساحة المستطيل اللي يمثّل مبنى واحد، ومساحة المستطيل اللي يمثّل مبنى اتنين. يبقى مساحة الجزء الرمادي تساوي مساحة المستطيل واحد اللي هو الكبير ده، ناقص مجموع مساحتي مبنى واحد ومبنى اتنين.

أول حاجة هنحسب مساحة مبنى واحد، واللي هي على شكل مستطيل. يبقى مساحة المستطيل هنستخدمها هتبقى الطول في العرض. يبقى مساحة مبنى واحد الطول تمنية سنتيمتر، في خمسة سنتيمتر؛ يعني أربعين سنتيمتر مربع.

مساحة مبنى اتنين هتساوي الطول خمسة سنتيمتر، في تلاتة سنتيمتر؛ يعني خمستاشر سنتيمتر مربع. يبقى مجموع المساحتين هيساوي خمسة وخمسين سنتيمتر مربع. ومساحة المستطيل واحد هتبقى واحد وعشرين في حداشر، هتساوي ميتين واحد وتلاتين سنتيمتر مربع.

إذن مساحة الجزء الرمادي هتبقى ميتين واحد وتلاتين، ناقص الخمسة وخمسين اللي هو مجموع مساحتي مبنى واحد ومبنى اتنين. يبقى مساحة الجزء الرمادي هتساوي مية ستة وسبعين سنتيمتر مربع. يبقى مساحة الجزء الرمادي مية ستة وسبعين سنتيمتر مربع.

في الفيديو ده اتكلمنا عن إيجاد مساحة المستطيل، وعرفنا إن مساحة المستطيل بنوجدها بصيغة الطول في العرض. وعرفنا إن وحدة قياس المساحة هي الوحدات المربعة؛ لأن المساحة هي عبارة عن عدد الوحدات المربعة اللي بتغطي سطح الشكل المغلق.