فيديو: تصنيف المثلثات حسب زواياها وأضلاعها

يوضح الفيديو أنواع المثلثات حسب زواياها: حادة، قائمة، منفرجة؛ وحسب أضلاعها: متساوي الساقين، متساوي الأضلاع، مختلف الأضلاع.

٠٥:٢٩

‏نسخة الفيديو النصية

تصنيف المثلثات حسب زواياها وأضلاعها.

في الفيديو ده هنعرف إيه هي أنواع المثلثات. وإزّاي نصنّفها حسب زواياها، وأطوال أضلاعها.

أول حاجة تصنيف المثلثات حسب زواياها. للزوايا تلات أنواع: الزاوية الحادّة، والزاوية القائمة، والزاوية المنفرجة. وزيّ ما فيه تلات أنواع للزوايا كمان فيه تلات أنواع للمثلثات.

فعندنا المثلث الحادّ الزوايا، وهو مثلث كل زاوية من زواياه التلاتة زاوية حادّة. وزيّ ما فيه عندنا زاوية قائمة كمان فيه مثلث قائم الزاوية. كمان فيه نوع تالت من أنواع المثلثات، وهو المثلث منفرج الزاوية، واللي فيه زاوية واحدة منفرجة.

يبقى كده أنواع المثلثات بالنسبة لقياس زواياها: مثلث حادّ الزوايا، واللي فيه تلات زوايا حادّة. تاني نوع: المثلث قائم الزاوية، واللي فيه زاوية واحدة قايمة. تالت نوع: مثلث منفرج الزاوية، واللي فيه زاوية واحدة منفرجة.

وهنلاحظ إن في المثلث الحادّ قلنا فيه حادّ الزوايا؛ علشان فيه أكتر من زاوية كلهم زوايا حادّة. لكن المثلث القائم قلنا قائم الزاوية مفرد؛ لأن فيه زاوية واحدة بس هي اللي قائمة. والمثلث المنفرج الزاوية برضو قلنا زاوية واحدة بس؛ علشان فيه زاوية واحدة هي اللي منفرجة. فناخد بالنا إمتى نقول زوايا، وإمتى نقول زاوية.

تاني تصنيف لأنواع المثلثات هو تصنيف أنواع المثلثات بالنسبة لأطوال أضلاعها.

أول نوع هو: المثلث المتساوي الأضلاع. هو مثلث فيه تلات أضلاعه متساويين. يبقى لمّا نلاقي مثلث كل أضلاعه متساوية بنسمّيه: مثلث متساوي الأضلاع.

تاني نوع هو: المثلث المتساوي الساقين. هو المثلث اللي فيه ضلعين اتنين بس متساويين، ومش بيساووا الضلع التالت. يعني لو لقينا مثلث فيه ضلعين بيساووا بعض، والضلع التالت مش بيساويهم؛ بيكون مثلث متساوي الساقين. لأن بيكون فيه الساق ده بيساوي الساق ده.

وتالت نوع وآخِر نوع من أنواع المثلثات هو: المثلث المختلف الأضلاع. المثلث مختلف الأضلاع هو مثلث ما فيهوش ولا ضلع قدّ التاني. فلو لقينا مثلث كل ضلع فيه له قياس مختلف عن الضلع التاني، بنسمّيه: مثلث مختلف الأضلاع.

وبكده نكون عرفنا أنواع المثلثات كلها بالنسبة لقياس زواياها، وبالنسبة لأطوال أضلاعها. ودلوقتي هناخد شويّة أشكال لمثلثات ونوصفها ونقول نوعها بالنسبة لقياس زواياها، وبالنسبة لأطوال أضلاعها.

لو عندنا كور بلياردو راصّينها في شكل مثلث كده، وعاوزين نصنّف المثلث ده.

هنلاحظ إن المثلث فيه تلات زوايا حادّة كلهم أقل من تسعين درجة، يبقى المثلث ده: حادّ الزوايا. ده نوع المثلث بالنسبة لقياس زواياه. أمّا بالنسبة لأطوال أضلاعه في المثلث هنا هنلاحظ إن كل أضلاعه متساوية في الطول. يبقى نوع المثلث بالنسبة لأطوال أضلاعه: مثلث متساوي الأضلاع.

طيّب لو عندنا قطعة جبنة زيّ دي، وعاوزين نعرف سطحها اللي على شكل مثلث ده نوعه إيه.

هنلاحظ إن المثلث متساوي الساقين؛ لأن فيه طول ضلعين قدّ بعض، ومش بيساووا الضلع التالت. ده نوعه بالنسبة لأطوال أضلاعه. وبالنسبة لقياس زواياه هنلاقي إن زواياه التلاتة كل زاوية فيهم هي زاوية حادّة، يبقى نوعه بالنسبة لقياس زواياه: مثلث حادّ الزوايا.

ولو عندنا سلم مسنود عَ الحيطة بالشكل ده، هنلاقي بينه وبين الحيطة شكل مثلث.

المثلث ده فيه زاوية قايمة، يبقى نوعه بالنسبة لقياس زواياه: مثلث قائم الزاوية. وهنلاحظ إن ما فيهوش أيّ ضلع نفس طول الضلع التاني، فنوعه بالنسبة لأطوال أضلاعه: مثلث مختلف الأضلاع.

وبكده نكون عرفنا إيه هي أنواع المثلثات. بالنسبة لقياس زواياها: المثلث الحادّ الزوايا، والقائم الزاوية، والمنفرج الزاوية. وكمان عرفنا أنواع المثلثات بالنسبة لأطوال أضلاعها: مثلث متساوي الأضلاع، ومثلث متساوي الساقين، ومثلث مختلف الأضلاع.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.