تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: الضرب في ٦

غادة عليوة

يوضح الفيديو كيفية إيجاد حاصل الضرب في العدد ٦ باستخدام النماذج وطريقة الجمع المتكرر، وكيفية إيجاد عامل الضرب المجهول في جملة الضرب، مع أمثلة توضيحية.

٠٥:٣٩

‏نسخة الفيديو النصية

هنتعرّف في الفيديو ده على طرق مختلفة لإيجاد حاصل الضرب في العدد ستة.

لو معانا تلات علب من البسكويت. وكل علبة فيهم بتحتوي على ست قطع. عايزين نعرف معانا كام قطعة من البسكويت. يبقى عشان نقدر نوجد العدد الكلي لقطع البسكويت، هنضرب عدد قطع البسكويت في كل علبة، في عدد العلب. يعني عايزين نوجد حاصل ضرب ستة في تلاتة. هنقدر نوجد حاصل الضرب ده، باستخدام النماذج.

هنستخدم ست قطع عدّ، اللي بيمثّلوا عدد قطع البسكويت اللي في أول علبة. وبعدين نستخدم ست قطع عدّ تانيين، اللي بيمثّلوا عدد قطع البسكويت اللي في العلبة التانية. كده يبقى استخدمنا لغاية دلوقتي اتناشر قطعة عدّ. وبعدين هنستخدم كمان ست قطع عدّ تانيين، عشان نمثّل بيهم عدد قطع البسكويت اللي في العلبة التالتة. بقى كده عندنا تمنتاشر قطعة عدّ. يبقى ده معناه إن حاصل ضرب تلاتة في ستة، هيساوي تمنتاشر.

ونقدر نوجد كمان حاصل الضرب ده، باستخدام طريقة أخرى غير النماذج. يعني نقدر نوجده باستخدام الجمع المتكرّر. يعني هنبتدي بستة، اللي بيمثّل عدد القطع البسكويت الموجودة في العلبة الأولى. ونجمع عليهم ستة تانيين، اللي هي عدد قطع البسكويت في العلبة التانية. زائد ستة كمان مرة اللي بتمثّل عدد قطع البسكويت اللي في العلبة التالتة. هنلاقي إن مجموع التلات أعداد دول، هيطلع تمنتاشر. يبقى كده وصلنا لنفس حاصل الضرب، باستخدام طريقة الجمع المتكرّر.

هنشوف دلوقتي في المثال اللي جاي، إزاي نقدر نوجد عامل مجهول في جملة الضرب. في المثال اللي قدامنا ده، هنعرف إن أحد العاملين في أحد المحلات، كان يريد ترتيب تمنية وأربعين خاتمًا، في تمن صفوف، بالتساوي. مطلوب منّنا نعرف، هيبقى فيه كام خاتم في الصف الواحد.

دلوقتي نقدر نكتب جملة الضرب، اللي بتعبّر عن المثال اللي قدامنا ده. عندنا عدد الصفوف اللي إحنا عايزين نوزّع عليهم كمية الخواتم اللي عندنا، هيبقى تمنية. يبقى حاصل ضرب تمنية في عدد الخواتم في كل صف، هيدّينا عدد الخواتم كلها. يبقى إحنا محتاجين نعرف العامل، اللي لو تم ضربه في تمنية، هيبقى حاصل الضرب تمنية وأربعين. نقدر نوجد العامل ده باستخدام النماذج. هنشوف إزاي.

هنجيب تمنية وأربعين قطعة عدّ. ونبتدي نوزّعهم على تمن صفوف. وكل مرة نوزّع مجموعة من التمن صفوف، لغاية ما نخلص التمنية وأربعين قطعة عدّ اللي عندنا. ونشوف إحنا بقى عندنا كام قطعة في كل صف، بالشكل ده. ونفضل نوزّع قطعة في كل صف، لغاية ما نخلّص القطع العدّ اللي عندنا. كده وصلنا لتمنية وأربعين قطعة عدّ، متوزعين بالتساوي على تمن صفوف. لو عدّينا فيه كام قطعة عدّ في كل صف، هنلاقي عندنا ست قطع في كل صف. يبقى ده معناها إن العامل المجهول في جملة الضرب اللي عندنا ده، هو ستة. فيبقى حاصل ضرب تمنية في ستة هيساوي تمنية وأربعين. وكده لو رتبنا التمنية وأربعين خاتم اللي عندنا، في تمن صفوف بالتساوي، هيبقى عندنا ست خواتم في كل صف.

في المثال اللي عندنا ده، مطلوب منّنا نوجد عدد العجلات الموجودة في ست سيارات. عشان نقدر نوجد عدد العجلات اللي في السيارات الستة، هنضرب عدد العجلات اللي في السيارة الواحدة، في عدد السيارات اللي عندنا. وده هيدّينا حاصل الضرب هيبقى عدد العجلات كلها. إحنا عارفين إن عدد العجلات في أيّ سيارة بيبقى أربع عجلات. أمّا عدد السيارات اللي عندنا فهو ستة. يبقى حاصل ضرب أربعة في ستة، هيمثّل عدد العجلات المطلوبة.

نقدر نوجد حاصل الضرب ده، باستخدام النماذج. هنبتدي بأربع قطع عدّ، اللي بيمثّلوا عدد العجلات اللي في السيارة الأولى. وبعدين نستخدم أربع قطع عدّ تانيين، عشان نمثّل بيهم عجلات السيارة التانية. وبرضو بنفس الطريقة أربع قطع عدّ كمان، عشان نمثّل بيهم عجلات السيارة التالتة. وهكذا أربع قطع عدّ لتمثيل عجلات السيارة الرابعة. وأربعة تانيين للسيارة الخامسة. وآخِر حاجة أربع قطع عدّ لتمثيل عجلات السيارة الساتّة. لو عدينا قطع العدّ اللي استخدمناهم، هنلاقي إن إحنا استخدمنا أربعة وعشرين قطعة عدّ. يبقى كده قدرنا نوجد حاصل ضرب أربعة في ستة. حاصل الضرب هيبقى أربعة وعشرين.

ونقدر لإيجاد حاصل الضرب ده، نستخدم طريقة أخرى، زيّ طريقة الجمع المتكرّر. فهنجمع عدد العجلات اللي في السيارة الأولى. زائد عدد عجلات السيارة التانية. زائد عجلات السيارة التالتة. زائد الرابعة. زائد الخامسة. زائد الساتّة. هنلاقي إن المجموع بيساوي أربعة وعشرين. وده بيمثّل حاصل الضرب، أو عدد العجلات اللي في الست سيارات كلها.

عرفنا في الفيديو ده إزاي نقدر نوجد حاصل الضرب في العدد ستة بأكتر من طريقة. وعرفنا كمان إزاي نقدر نوجد العامل المجهول في جملة الضرب.