نسخة الفيديو النصية
الكسور التي تدل على أكثر من جزء.
هنتعلم في الدرس ده إزاي نقدر نوصف أكتر من جزء، من مجموعة أجزاء متطابقة بتكوّن شكل، أو مجموعة من الأشكال المتطابقة. يعني على سبيل المثال، المجموعة اللي قدامنا دي، مجموعة بتتكوّن من تلات دوائر متطابقة. يعني إيه متطابقة؟ يعني متماثلة في الشكل والحجم. بس لو بصّينا، هنلاقي إن فيه اتنين بس من الدوائر دي ملوّنة. يبقى لو حبينا نكتب كسر بيعبّر عن عدد الدوائر الملوّنة في المجموعة اللي قدامنا، هيبقى عبارة عن … هي عدد الدوائر الكلية كام؟ واحد، اتنين، تلاتة. طب عدد الدوائر الملوّنة؟ عبارة عن واحد، اتنين. يبقى الكسر اللي هيعبّر عن عدد الدوائر الملوّنة اللي في المجموعة، يبقى عبارة عن اتنين على تلاتة.
بنفس الطريقة، لو بصّينا على الدائرة اللي قدامنا دي، هنلاقيها متقسّمة لتلات أجزاء متطابقة. لو عايزين نشوف الكسر اللي بيمثّل عدد الأجزاء الملوّنة في الدائرة. الأول هنعدّ الأجزاء الملوّنة. هنلاقي إن واحد، اتنين. يبقى عندنا اتنين من تلات أجزاء متطابقة، اللي بتتكوّن منهم الدائرة دي، ملوّنين. يبقى الكسر اللي بيمثّل عدد الأجزاء الملوّنة اللي في الدائرة، هو نفس الكسر؛ اتنين على تلاتة.
يبقى نقدر نستنتج إن الجزء العلوي من الكسر، بيمثّل عدد الأجزاء الملوّنة. أمّا الجزء السفلي، فبيمثّل عدد الأجزاء الكلية، اللي بيتكوّن منها الشكل، أو مجموعة الأشكال المتطابقة اللي بتكوّن المجموعة اللي عندنا.
هنجيب صفحة جديدة، ونتدرّب أكتر مع مجموعة أخرى من الأمثلة. لو مطلوب منّنا نشوف عدد الأجزاء الملوّنة في كل شكل من الأشكال اللي هتظهر قدامنا، ونشوف الكسر اللي بيمثّل عدد الأجزاء الملوّنة. هنشوف أول شكل عندنا. هنلاقي إن المستطيل اللي قدامنا ده، متقسّم لأربع أجزاء متطابقة. عدد الأجزاء الملوّنة في الشكل قدّ إيه؟ هنعدّهم دلوقتي: واحد، اتنين، تلاتة. يبقى عندنا تلات أجزاء من أربع أجزاء متطابقة، هم اللي ملوّنين في الشكل اللي قدامنا.
طب لو حبينا نكتب الكسر اللي بيمثّل عدد الأجزاء الملوّنة. عدد الأجزاء الملوّنة هو تلاتة. وعدد الأجزاء الكلية هو أربعة. يبقى الكسر اللي بيمثّل عدد الأجزاء الملوّنة في الشكل، هو تلاتة على أربعة.
أمّا لو بصّينا على الشكل التاني اللي ظهر قدامنا ده، يا ترى فيه كام جزء ملوّن؟ واحد، اتنين. وعدد الأجزاء الكلية كام؟ هنكمّل ونشوف. أربع أجزاء. يبقى نقدر نقول إن عندنا عدد اتنين من الأجزاء ملوّنين، من أربع أجزاء متطابقة، بيتكوّن منها الشكل. لو حبينا نكتب الكسر اللي بيعبّر عن عدد الأجزاء الملوّنة اللي في الشكل، هيبقى عبارة عن اتنين على أربعة.
أمّا في الشكل اللي قدامنا ده، فمطلوب منّنا نظلّل الأجزاء اللي بيمثّلها الكسر اللي معطى عندنا ده؛ اللي هو اتنين على تلاتة. طب إحنا عارفين إن العدد اللي موجود فوق، في الجزء العلوي من الكسر، بيمثّل عدد الأجزاء المظلّلة. أمّا العدد اللي موجود تحت في الكسر، فبيمثّل عدد الأجزاء الكلية. وبالفعل الشكل بيتكوّن من تلات أجزاء كلية. يبقى عشان نمثّل الكسر ده، محتاجين نظلّل جزئين من التلات أجزاء الكلية، اللي بيتكوّن منها الشكل؛ بالشكل ده.
هنجيب صفحة جديدة، ونشوف مع بعض مجموعة أخرى من الأمثلة. مطلوب منّنا في مجموعة الأشكال اللي قدامنا دي، إن إحنا نظلّل عدد الأجزاء اللي بيمثّل الكسر اللي مكتوب تحت كل شكل من الأشكال دي. فهنشوف أول شكل عندنا، الكسر اللي مكتوب تحته، عبارة عن نصف، أو واحد على اتنين. إحنا عارفين إن العدد اللي فوق بيمثّل عدد الأجزاء الملوّنة في الشكل. أمّا العدد اللي تحت اللي في المقام، فبيمثّل عدد الأجزاء الكلية المتطابقة، اللي بيتكون منها الشكل. بالفعل الشكل اللي عندنا بيتكوّن من جزئين متطابقين. يبقى إحنا محتاجين نلوّن جزء واحد من الجزئين دول؛ بالشكل ده.
هنشوف دلوقتي الشكل التاني اللي عندنا. هنلاقيه بيتكوّن من أربع أجزاء متطابقة. محتاجين نلوّن كام جزء، عشان يبقى بيمثّل الكسر اللي مكتوب؟ الكسر اللي عندنا، الجزء اللي فوق مكتوب فيه العدد اتنين، اللي هو المفروض بيمثّل عدد الأجزاء الملوّنة. وتحت هو عدد الأجزاء الكلية اللي بيتكوّن منها الشكل. يبقى إحنا محتاجين نلوّن جزئين من الأربع أجزاء اللي بيتكوّن منها الشكل؛ بالطريقة دي.
تالت شكل عندنا، عبارة عن دائرة، متقسّمة لأربع أجزاء متطابقة. هنشوف الكسر اللي عندنا. هنلاقي إن الجزء اللي فوق مكتوب فيه العدد تلاتة، اللي هو المفروض بيمثّل عدد الأجزاء الملوّنة. أمّا المقام، أو الجزء اللي تحت من الكسر، عبارة عن أربعة، اللي هو عبارة عن عدد الأجزاء المتطابقة اللي بيتكوّن منها الشكل. ده معناه إن إحنا محتاجين نلوّن تلات أجزاء من الأربع أجزاء المتطابقة، اللي بتتكوّن منها الدائرة اللي قدامنا؛ بالشكل ده.
أما في الشكل اللي ظاهر قدامنا ده، اللي عبارة عن مجموعة من الدوائر المتطابقة. مطلوب منّنا نظلّل عدد الدوائر اللي بيمثّلوا الكسر اللي مكتوب تحت. إحنا عارفين إن العدد اللي فوق بيمثّل عدد الأجزاء الملوّنة، اللي بتتكوّن منها المجموعة. والعدد اللي تحت هو عدد الأجزاء المتطابقة، اللي بتتكوّن منها المجموعة. يبقى ده معناه، إن إحنا محتاجين نلوّن دائرة واحدة من الأربع دوائر اللي عندنا، اللي بتتكوّن منهم المجموعة اللي قدامنا دي. وبكده يبقى لوّنا عدد الدوائر اللي بيمثّل الكسر اللي مكتوب عندنا ده.
عرفنا في الدرس ده إزاي نقدر نوصف أكتر من جزء من مجموعة الأجزاء المتطابقة، اللي بتكوّن شكل. أو مجموعة الأشكال اللي بتتكوّن منها مجموعة. لو عندنا كسر، بالشكل ده. فالعدد اللي فوق اللي موجود في البسط، بيمثّل عدد الأجزاء الملوّنة، أو اللي عايزين نوصفها من المجموعة. أمّا العدد اللي تحت اللي في المقام، هو عدد الأجزاء المتطابقة، اللي بيتكوّن منها الشكل، أو بتتكوّن منها المجموعة.
