فيديو: حل المسائل الكلامية التي تتضمَّن متتابعات حسابية

اجتاز كريم امتحانًا في الفيزياء؛ حيث حصل على ٤ درجات في كل إجابة صحيحة. في الجدول، ﻥ يُمثِّل عدد الأسئلة التي أجاب عنها كريم بإجابات صحيحة، ﺵ يُمثِّل العدد الكلي للدرجات التي حصل عليها. افترِض أنه حصل من الدرجات على ما مجموعه الكلي يساوي ٦٠ درجة في امتحان الفيزياء. ما عدد الأسئلة التي أجاب عنها بصورة صحيحة؟

٠٢:٥٤

‏نسخة الفيديو النصية

اجتاز كريم امتحانًا في الفيزياء، حيث حصل على أربع درجات في كل إجابة صحيحة. في الجدول: ن يمثل عدد الأسئلة التي أجاب عنها كريم بإجابات صحيحة. وَ ش يمثل العدد الكلي للدرجات التي حصل عليها. افترض أنه حصل من الدرجات على ما مجموعه الكلي يساوي ستين درجة في امتحان الفيزياء. ما عدد الأسئلة التي أجاب عنها بصورة صحيحة؟

ومعطى عندنا الجدول اللي قدامنا. وعندنا قيم ن هي واحد واتنين وتلاتة وأربعة. وعندنا قيم ش أربعة وتمنية واتناشر وستاشر. ومعطى عندنا إن ن بيمثّل عدد الأسئلة اللي أجاب عنها كريم بإجابات صحيحة. وأما ش فبيمثل العدد الكلي للدرجات التي حصل عليها.والمطلوب إننا نحدد عدد الأسئلة اللي أجاب عنها بصورة صحيحة، في حالة إنه حصل على مجموع كلي بيساوي ستين درجة.

وبما إن ش بتمثّل العدد الكلي للدرجات. فمعنى كده إننا عايزين نشوف لمّا تكون قيمة ش هي ستين، هنبقى عايزين نوجد قيمة ن ساعتها. واللي هي عدد الأسئلة اللي أجاب عنها بصورة صحيحة.

فأول حاجة هنلاحظها من الجدول إن عندنا قيم ن بتزيد بمقدار واحد. وأما قيم ش فهنلاحظ إن هي بتزيد بمقدار أربعة. فبما إن قيمة كل حدّ بتزيد زيادة ثابتة، وقيمتها أربعة. فمعنى كده إننا عندنا هنا متتابعة حسابية، وبتزيد بمقدار ثابت اللي هو أربعة.

وبما إن الحد الأول اللي هو ن هنا بواحد كانت قيمته أربعة؛ فبالتالي هيبقى الحد النوني هو أربعة ن. لأن لمّا كان عندنا ن بواحد، يعني الحد الأول كانت قيمته أربعة، والحد التاني كانت قيمته تمنية، وهكذا. فبالتالي هيبقى الحد النوني هو أربعة ن. وهنستخدمه علشان نوجد قيمة ن عند ش بتساوي ستين. فبما إن الحد النوني هو أربعة ن. فمعنى كده إننا عشان نوجد قيمة ن عند ش بتساوي ستين، يبقى هنفرض إن أربعة ن بتساوي ستين.

فبالتالي علشان نوجد قيمة ن، يبقى هنقسم طرفَي المعادلة على أربعة. فلمّا هنقسم أربعة ن على أربعة، نقدر نختصر أربعة مع أربعة فيتبقي ن. وأما في الطرف الأيسر، فهنقسم ستين على أربعة واللي هتساوي خمستاشر. وبالتالي هتبقى ن تساوي خمستاشر. يعني معنى كده إن الحد الخمستاشر هيبقى قيمته ستين.

وبما إن ن بتمثل عدد الأسئلة اللي أجاب عنها كريم بإجابات صحيحة. فبالتالي لمّا كان مجموع الكلي بيساوي ستين درجة. فيبقى بالتالي عدد الأسئلة اللي أجاب عنها بالصورة الصحيحة هي خمستاشر سؤالًا. وهتبقى هي دي إجابة السؤال.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.