تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: العلاقات بين الزوايا

سوزان فائق

يوضح الفيديو كيفية تسمية الزوايا، وأنواعها، والعلاقات بين الزوايا (الزوايا المتقابلة بالرأس، والزوايا المتجاورة)، وأمثلة توضيحية.

٠٥:١٥

‏نسخة الفيديو النصية

في الفيديو ده هنتكلّم عن العلاقات بين الزوايا. قبل ما نتكلّم عن العلاقات بين الزوايا هنتكلّم عن مفاهيم مهمة. أول مفهوم فيهم إيه هي الزاوية.

لو عندي ضلعين نهايتهم اتقابلت في نقطة، دي بتبقى اسمها رأس الزاوية. والقياس ما بينهم ده بيبقى قياس الزاوية. بنسمّيها بتلات طرق مختلفة. أول طريقة إن أنا أقول اسم الزاوية بتلات حروف، اللي هو زاوية أ ب ج. والـ ب بتمثّل رأس الزاوية عندي. ممكن بس نسمّيها باسم رأس الزاوية، اللي هو ب، يبقى هقول: الزاوية ب. أو إن أنا أسمّي ب أقول إنها واحد، وأقول إنها زاوية واحد.

المفهوم اللي معانا كمان هو أنواع الزوايا. إيه هي أنواع الزوايا اللي عندنا؟

عندنا زاوية حادة، ودي بيبقى قيمتها أقل من تسعين درجة، وبتبقى بالشكل ده. عندنا زاوية منفرجة، ودي بيبقى قياسها قيمته أكتر من تسعين درجة، وبتبقى بالشكل ده. عندنا زاوية قائمة، دي بيبقى قياسها تسعين درجة، وبتبقى بالشكل ده. عندنا زاوية مستقيمة، ودي بتبقى شكل المستقيم؛ بتاخد الشكل ده، بتبقى قيمة قياسها مية وتمانين درجة.

بعد ما خلّصنا المفاهيم اللي معانا هنتكلّم على الدرس الأساسي اللي هو العلاقات بين الزوايا. نقلب الصفحة.

العلاقات بين الزوايا.

هنتكلّم على اتنين من العلاقات دي. أول علاقة ما بينهم اسمها الزوايا المتقابلة بالرأس. في الزوايا المتقابلة بالرأس، دول عبارة عن خطين مستقيمين كوّنوا أربع زوايا. كل زاوية مع اللي قصادها بنسمّيها متقابلة بالرأس. يعني زيّ واحد واتنين، وتلاتة مع أربعة. بيبقى لهم نفس رأس الزاوية.

معانا النوع التاني اللي هو الزوايا المتجاورة؛ ودول بيبقوا جنب بعض، ومشتركين في نفس الضلع. يعني زيّ الواحد واتنين، والتلاتة مع الأربعة. لهم نفس رأس الزاوية، ولهم ضلع مشترك. نقلب الصفحة معانا، ونشوف مثال.

لو عندي عدة زوايا بالشكل ده: واحد، واتنين، وتلاتة، وأربعة، وخمسة، وستة، وسبعة. عندي الزاوية واحد بقول عليها هي والزاوية اتنين متجاورتان. الزاوية واحد والزاوية أربعة متقابلتان بالرأس. الزاوية اتنين والزاوية ستة ما فيش علاقة ما بينهم؛ لا يوجد علاقة بينهم. ناخد مثال كمان معانا، ونقلب الصفحة.

عندنا بيت في شارع، وعندنا مدرسة في شارع تاني. الشارعين دول بيتقطاعوا مع بعض، بيعملوا خطين مستقيمين متقاطعين في زوايا. الزوايا عندي اللي هي: واحد، واتنين، وتلاتة، وأربعة.

نقدر نقول إن الزاوية واحد والزاوية اتنين دول متقابلتان بالرأس. والزاوية واحد مع الزاوية تلاتة متجاورتان. وطبعًا تلاتة وأربعة متقابلتان بالرأس. واتنين وأربعة متجاورتان. واحد وأربعة متجاورتان. اتنين وتلاتة متجاورتان.

لو أنا قسمت الزاوية أربعة لزاويتين تانيين: خمسة، وستة. طيّب فيه علاقة ما بين زاوية تلاتة مع زاوية خمسة؟ لأ ما فيش؛ لأن هنا كده ما فيش تقابل بالرأس، ولا تجاور.

وده اللي إحنا أخدناه في درس النهارده؛ إيه هو مفهوم الزاوية، إيه أنواع الزوايا. وخدنا علاقتين مهمّين بين الزوايا؛ اللي هي علاقة التقابل بالرأس، والتجاور في الزوايا.