فيديو: حل معادلات ذات متغير واحد

إذا كان ٤٧ − ٢ﺱ = ٢٧، فما قيمة ﺱ؟

٠٢:٠٤

‏نسخة الفيديو النصية

إذا كان سبعة وأربعين ناقص اتنين س تساوي سبعة وعشرين، فما قيمة س؟

عندنا المعادلة سبعة وأربعين ناقص اتنين س تساوي سبعة وعشرين، معادلة من الدرجة الأولى. لأن درجة المتغيّر س، هو أُس واحد. وفيه متغيّر واحد، وهو س. ومطلوب إننا نحل المعادلة. عشان نحلّها، هنقوم ببعض الخطوات المتعددة، وذلك بتطبيق العمليات العكسية.

الخطوة الأولى: عشان أتخلص من سبعة وأربعين، هطرح من طرفَي المعادلة، سبعة وأربعين. يعني أقدر أقول إنه سبعة وأربعين ناقص سبعة وأربعين ناقص اتنين س، هتساوي سبعة وعشرين ناقص سبعة وأربعين. سبعة وأربعين ناقص سبعة وأربعين، هيساوي صفر. وسبعة وعشرين ناقص سبعة وأربعين، هيساوي سالب عشرين. وبكده أقدر أقول إنه سالب اتنين س، هيساوي سالب عشرين.

الخطوة التانية: هتَخلّص من معامل الـ س، اللي هو سالب اتنين. هقسم طرفَي المعادلة على سالب اتنين. يعني أقدر أقول إنه سالب اتنين س على سالب اتنين، هيساوي سالب عشرين على سالب اتنين. هختصر سالب اتنين في البسط، مع سالب اتنين في المقام. هيتبقّى عندي س هتساوي … سالب عشرين على سالب اتنين، هيساوي عشرة. وبكده هنكون حلّينا المعادلة، وجِبنا قيمة المتغيّر س.

عشان نتأكد من الحل، هنعوّض في المعادلة عن س تساوي عشرة. يعني هشيل س، وأحطّ مكانها عشرة. سبعة وأربعين ناقص، اتنين في عشرة، هيساوي سبعة وأربعين ناقص عشرين. يعني هيساوي سبعة وعشرين. يعني هيساوي الطرف التاني.

وبكده اتأكدنا إن الحل صحيح. إذن هقدر أقول إن قيمة س هي عشرة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.