تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: طرح الأعداد الصحيحة مع وجود أصفار

سوزان فائق

يوضح الفيديو كيفية طرح الأعداد الصحيحة التي تحتوي أصفارًا في خاناتها، وكيفية استخدام إعادة التسمية وإعادة التجميع، وأمثلة موضَّحة من حياتنا العملية.

٠٧:٤٢

‏نسخة الفيديو النصية

هنتكلم في الفيديو ده عن طرح الأعداد الصحيحة، مع وجود أصفار. هنعرف إزاي نطرح الأعداد اللي تحتوي على أصفار في خانتها. مثلًا لو فيه عددين: السبعمية، والخمسمية اتنين وتلاتين، عايزين نطرحهم من بعض. فأول خطوة هنرتب العددين فوق بعض، بالشكل ده. بحيث إن كل خانة، تحتها الخانة اللي زيها. يعني الصفر في الآحاد، تحتيه الاتنين في الآحاد. الصفر في السبعمية في خانة العشرات، تحتيه التلاتة اللي في العدد التاني في خانة العشرات. السبعة في خانة المئات، يبقى تحتها الخمسة اللي في خانة المئات في العدد التاني. وبعدين نطرحهم من بعض.

عملية الطرح بنعملها على تلات خطوات. أول واحدة الآحاد؛ طرح الآحاد. تاني خطوة طرح العشرات. تالت خطوة طرح المئات. كل خانة بنعمل لها خطوة. علشان نطرح الآحاد هنا، هيبقى الصفر ناقص الاتنين. يعني المفروض ننقّص من الصفر اتنين. ده طبعًا ما ينفعش. فبنضطر إن إحنا نستلف من الخانة اللي بعد الصفر؛ خانة العشرات.

خانة العشرات فيها صفر. ما أقدرش آخُد من الصفر. يبقى الصفر اللي في خانة العشرات، هياخذ ويستلف من السبعة اللي في خانة المئات. لمّا هنستلف من السبعة، هتبقى ستة. هنعيد تجميع خانة العشرات، بإن إحنا هندّي لها الواحد اللي من المئات، هيبقى قيمته عشرة. يبقى عشرة في العشرات على الصفر، هتبقى عشرة. كده نقدر نستلف من خانة العشرات، واحد لخانة الآحاد، فهتبقى تسعة. ونجمّع الواحد اللي أخدناه من خانة العشرات؛ علشان يبقى عشرة على خانة الآحاد. فبالتالي خانة الآحاد هتبقى عشرة.

هنطرح عشرة ناقص اتنين، هتبقى تمنية. كده خانة العشرات بقى فيها تسعة، ناقص التلاتة، يبقى ستة. دي تاني خطوة، إن إحنا بنطرح العشرات. وبعدين تالت خطوة، الستة ناقص الخمسة، هتبقى واحد. يبقى ناتج طرح السبعمية ناقص خمسمية اتنين وتلاتين، يساوي مية تمنية وستين.

في مثال إذا كانت كتلة حمولة بطيخ تلتمية كيلوجرام. وكتلة حمولة أخرى مية أربعة وتلاتين كيلوجرام. فما الفرق بين كتلتيهما؟

أول خطوة، هنرتب العددين تحت بعض؛ بحيث إن كل خانة تحتها الخانة اللي زيّها، وبعدين نطرح. نطرح الآحاد، يبقى الصفر ناقص الأربعة، ما ينفعش؛ لأن الصفر أصغر من الأربعة. وبالتالي ما ينفعش نستلف من الصفر. يبقى هنروح نستلف من الخانة اللي بعدها. هنلاقي فيها صفر، يبقى معنى كده إن الصفر اللي في خانة العشرات، يستلف من خانة المئات. التلاتة ناخد منها واحد، تبقى اتنين. وبعدين الواحد اللي خدناه من خانة المئات، هيبقى قيمته عشرة في خانة العشرات. هنضيفه على الصفر، يبقى عشرة.

بعد كده العشرة اللي بقت في خانة العشرات، هنستلف منها واحد؛ علشان نودّيها للآحاد، هتبقى تسعة. ويبقى كده خانة الآحاد نضيف عليها العشرة اللي استلفناها، ويبقى قيمتها عشرة. يبقى هنطرح عشرة ناقص الأربعة، هيبقى ستة. وخانة العشرات بقى فيها تسعة. التسعة ناقص تلاتة، بستة. وبعد كده الاتنين ناقص الواحد، بواحد. إذن الفرق بين الكتلتين مية ستة وستين كيلوجرام.

باع أحد محلات الأطعمة، ألفين قطعة دجاج ولحم. إذا كان عدد قطع اللحم المباعة هو ستمية خمسة وتسعين. اوجد عدد قطع الدجاج المباعة.

العددين اللي إحنا هنطرحهم من بعض، هو الألفين وستمية خمسة وتسعين. هنرتب العددين؛ بحيث إن الأكبر هو اللي فوق، وكل خانة تحتها الخانة اللي زيّها. أول خطوة هنطرح الآحاد. صفر ناقص الخمسة، ما ينفعش. فهنستلف من الخانة اللي بعدها. الخانة اللي بعدها فيها صفر، ما ينفعش ناخد منها. يبقى هنشوف الخانة اللي بعدها. هنلاقي الخانة اللي بعدها هي كمان ما ينفعش ناخد منها. فهناخد من الخانة الرابعة.

يبقى الاتنين اللي في خانة الألوف، هتبقى واحد. والواحد اللي في خانة الألوف، هيروح خانة المئات، هيبقى عشرة من المئات. وبعد كده العشرة اللي من المئات، هنسلّف منها واحد لخانة العشرات، فهيبقى تسعة. وخانة العشرات هتزيد واحد من العشرات، يعني هتبقى عشرة. وبعد كده العشرة اللي في خانة العشرات، هتسلّف واحد لخانة الآحاد؛ عشان الآحاد تبقى عشرة، وهي هتبقى تسعة.

العشرة اللي في خانة الآحاد، لمّا هنجمعها على الصفر، هتبقى عشرة زيّ ما هي. يبقى عشرة ناقص الخمسة، هيبقى خمسة. بعد كده التسعة اللي في خانة العشرات، لمّا هنجمعها على الصفر اللي موجود في خانة العشرات، هتفضل تسعة زيّ ما هي. وبعدين هنطرح منها تسعة، يبقى تسعة ناقص تسعة، هيبقى صفر. هنروح لخانة المئات، هيبقى التسعة زائد الصفر اللي موجودة في خانة المئات، يبقى هتبقى تسعة. تسعة ناقص ستة، هتبقى تلاتة. وبعد كده الخانة الرابعة، خانة الألوف، هيبقى واحد ناقص الصفر، هتفضل واحد. يبقى عدد قطع الدجاج المباعة هو ألف تلتمية وخمسة.

اتكلمنا في الفيديو ده عن إزاي هنطرح الأعداد الصحيحة، اللي موجود في خاناتها أصفار. وعرفنا إزاي إن إحنا بنعيد تجميع الخانات، وتسميتها، لغاية ما نوصل إن الخانة يبقى فيها عدد، نقدر نطرح منه العدد التاني.

مثلًا الصفر ناقص الخمسة، ما ينفعش؛ لأن المفروض نطرح من الخمسة صفر، والصفر صغيرة مافيهاش خمسات. فنستلف من الخانة اللي بعدها؛ عشان الصفر دي تبقى أكبر من الخمسة. فلمّا بنستلف من الخانة اللي بعدها، لو لقيناها صفر، ناخذ الخانة اللي بعدها. لغاية ما ناخذ الخانة اللي نقدر نستلف منها. وبعد كده ننقّصها واحد. والواحد ده يروح للخانة الأقل، بقيمة العشرة. بعد كده لغاية ما نوصل لأول خانة مثلًا كانت زي الصفر، بقت عشرة. يبقى العشرة ناقص الخمسة، بقت خمسة.