تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: تفسير الرسومات البيانية الخطية

سوزان فائق

يوضح الفيديو مفهوم الرسومات البيانية الخطية، وخطوات رسمها، وتفسيرها.

٠٥:٣٨

‏نسخة الفيديو النصية

في الفيديو ده هنتكلّم على تفسير الرسومات البيانية الخطية.

الرسومات البيانية الخطية بتُستخدم لتوضيح تغيُّر مجموعة من البيانات على مرور الزمن، وغالبًا بتُستخدم لتوقُّع الأحداث في المستقبل. يبقى هي دي الرسومات البيانية الخطية، وهي دي أهمية الرسومات البيانية الخطية.

إزاي نرسم الرسومات البيانية الخطية؟ فيه عندنا أربع خطوات. أول خطوة: التدريج والفترات. التدريج ده هو بنشوف أقل قيمة موجودة عندنا في الجدول، وأعلى قيمة موجودة عندنا في الجدول. وناخد القيمتين دول نحطّهم جوّه تدريج؛ يعني لازم يتواجدوا جوّه تدريج. ممكن نبدأ بأقل منه لغاية أعلى منه، المهم نغطّي القيمتين اللي هي الأقل إلى الأعلى. الفترات هي تقسيم التدريج لفترات متساوية.

تاني خطوة عندنا: تسمية المحاور الأفقية والرأسية. تالت خطوة: تمثيل تكرار كل مجموعة بنقطة، وتوصيل النقط بخطوط مستقيمة. رابع خطوة عندنا: دراسة البيانات المعطاة، وتوقُّع البيانات.

هنرسم بالشكل ده. أول حاجة في الرسم إن إحنا هنرسم التدريج على الخط الرأسي. هنبدأ التدريج بتاعنا مثلًا من صفر، هننتهي لغاية مية. وهنعمل الفترات بتاعتنا عشرة، عشرة، عشرة؛ يعني: عشرة، عشرين، تلاتين، أربعين … لغاية ما هنوصل للمية.

هنعمل على المحور الأفقي المجموعات اللي هيدّيها لنا. يعني لو ادّى لنا مثلًا السنين: ألفين وحداشر، ألفين واتناشر، وألفين وتلتاشر. وجينا قُلنا إن المحور الرأسي ده بيمثّل درجة الحرارة في القاهرة، والمحور الأفقي بيمثّل السنة. هنيجي نمثّل تكرار كل مجموعة. يعني هنُقَف عند السنة ألفين وحداشر نشوف درجة الحرارة كانت فيها كام، هنلاقيها مثلًا كانت خمسة وتلاتين. سنة ألفين واتناشر درجة الحرارة زادت شويّة بقت أربعين. درجة الحرارة زادت بعد كده وصلت لغاية فوق الخمسين.

يبقى المفروض إن إحنا هنوصّل النقط دي ببعض بخط مستقيم. لكن إحنا عشان ما عندناش تفاصيل السنة للسنة فممكن نعملها بخط متقطّع كده؛ خط مستقيم مقطّع. من الشكل ده نقدر نتوقّع درجة الحرارة في السنين اللي جايّة كام. يعني هنا السنة ألفين وتلتاشر كانت خمسين. ممكن نقول ألفين وأربعتاشر هتبقى ستين، وهكذا … قدِرنا نعرف الأحداث اللي جايّة في المستقبل هتبقى عاملة إزاي، ودي فوايد تفسير الرسومات البيانية الخطية. نقلب الصفحة، وناخد مثال.

بيقول لنا عدد مبيعات لُوَح التزحلق كانت كالآتي: سنة ألفين واتنين إلى سنة ألفين وسبعة بالأعداد دي.

أول حاجة هنعملها: هنجيب التدريج، ونحدّد الفترات. التدريج هنا هنبصّ على أقل قيمة في الجدول هنلاقيها هنا مليون. وأعلى قيمة في الجدول هنلاقيها مليون تلتمية وخمسة ألف. يبقى نقدر نقول إن التدريج يبدأ من عند الصفر، وينتهي عند أعلى شويّة من أعلى قيمة؛ يعني نقول مليون وربعمية ألف. هنيجي بعد كده نقول الفترات. هنقسّم الفترات، هنقول إن بين كل فترة وفترة مية ألف.

نرسم الكلام ده على الرسم البياني. وعلشان أقل قيمة عندنا هي مليون، فإحنا لو بدأنا من عند الصفر هنقعد نعدّ كتير أوي لغاية ما نوصل لمليون وربعمية ألف. علشان كده ممكن نقدر نمسح الجزء ده، ونحطّ مكانه خط منكسر كده. معنى الخط المنكسر ده إن إحنا ممكن نقول إن إحنا هنبدأ التدريج بتاعنا من عند مثلًا تسعمية ألف. عشان تبقى أول قيمة جايّة بعد كده هي مليون. هنعمل التدريج: تسعمية ألف، مليون، مليون ومية ألف، مليون وميتين ألف، وهكذا … هنحطّ عَ المحور الأفقي السنين اللي عندنا: ألفين واتنين، ألفين وتلاتة …

تاني خطوة عندنا: هنسمّي المحاور. نقدر نقول إن المحور الأفقي بيمثّل السنة، والمحور الرأسي هيمثّل عدد لُوَح التزحلق.

بعد كده هنيجي عند كل سنة ونعبّر عنها بنقطة للقيمة بتاعتها. يعني سنة ألفين واتنين كان قيمة عدد لُوَح التزحلق كان: مليون، ألفين وتلاتة: مليون وتمانين ألف، وهكذا … لغاية ما نكمّل لغاية ألفين وسبعة. هنوصّل ما بين النقط دي بخطوط مستقيمة. وعلشان ما نعرفش القيم الوسيطة اللي ما بين السنة والسنة، هنعملها بخطوط مستقيمة متنقّطة كده متقطّعة.

رابع خطوة معانا هو: تحليل البيانات اللي على الرسم. واضح من الرسم إن المبيعات بتاعة لُوَح التزحلق بتزيد باستمرار، يعني ممكن سنة ألفين وتمنية هتبقى الرقم أعلى كتير من مليون وتلتمية وخمسة ألف. يبقى كده قدِرنا نعرف معلومات عن أحداث المستقبل في مبيعات لُوَح التزحلق.

ويبقى اتكلّمنا في الفيديو ده عن تفسير الرسومات البيانية الخطية. يعني الخطوط ما بين النقط بتمثّل لنا إذا كان فيه تزايد للبيانات، أو فيه تناقص؛ وده من خلال الرسم اللي إحنا بنرسمه.