فيديو: مقارنة السعات وترتيبها

نهال عصمت

يوضح الفيديو كيفية المقارنة بين السعات المختلفة، وترتيبها من الأكبر سعة إلى الأقل سعة، والعكس، ويوضح الكلمات المستخدمة للتعبير عن السعات.

٠٥:٥٩

‏نسخة الفيديو النصية

مقارنة السعات وترتيبها.

هنعرف إزّاي نقارن بين السعات. بعد كده هنرتبهم. لمّا نيجي نتكلم عن السعة، بنستخدم كلمة سعة أكبر، أو سعة أقل. ولو بنقارن بين أشياء كتير، نقدر نقول على حاجة واحدة بس من الأشياء دي إنها الأكبر سعة أو إنها الأقل سعة.

بمعنى لو عندنا كوب برتقان وزجاجة برتقان بالشكل ده. هنلاقي إن زجاجة عصير البرتقال أكبر سعة من كوب العصير؛ عشان بتستوعب كمية أكبر من العصير. لكن هنلاقي إن كوب البرتقال أقل سعة من زجاجة عصير البرتقال؛ عشان بتستوعب كمية أقل من العصير. وبكده عرفنا إزّاي نستخدم الكلمات اللي بتعبّر عن السعة.

هنبدأ نجيب صفحة جديدة، ونشوف أمثلة أخرى.

لو عندنا شنطة مدرسة وشنطة سفر، أيهما أكبر سعة؟

هنلاحظ إن شنطة السفر بتستوعب حاجات أكبر من شنطة المدرسة. يبقى نقدر نقول إن الأكبر سعة هو شنطة السفر؛ عشان نقدر نحط فيها حاجات أكتر من الحاجات اللي هنحطها في شنطه المدرسة.

نشوف مثال تاني: عايزين نعرف أيهما أقل سعة براد الشاي ولا كوب الشاي؟

هنلاحظ إن كمية الشاي اللي ممكن نحطها في البراد، هتبقى أكبر من كمية الشاي اللي ممكن نحطها في الكوباية. يبقى هنلاقي إن أقل سعة هو كوب الشاي؛ عشان بنحط فيه كمية أقل من الشاي. يبقى الأقل سعة هو كوب الشاي.

يبقى بعد ما عرفنا إزّاي نقارن بين الأشياء من حيث السعة. وعرفنا إزّاي نحدد الأكبر سعة وإزّاي نحدد الأقل سعة. هنجيب صفحة جديدة ونتكلم عن ترتيب الأشياء من حيث السعة.

لو عندنا حوض استحمام، وكوب ماء، وحمام سباحة. عايزين نقارن بينهم من حيث السعة، بعد كده نرتبهم من الأكبر سعة إلى الأقل سعة.

الأكبر سعة يعني اللي بيستوعب كمية مياه أكبر، والأقل سعة يعني اللي بيستوعب كمية مياه أقل. هنلاحظ إن الكوباية بتستوعب أقل كمية من الماء. ولو جينا نقارن بين حوض الاستحمام وحمام السباحة، هنلاقي إن حمام السباحة بيستوعب أكبر كمية ميّه يعني فيه كمية ميّه أكبر من الموجودة في حوض الاستحمام.

يبقى الأكبر سعة من التلات أشكال هو حمام السباحة، هنكتب عنده رقم واحد. بعد كده هيتبقّى عندنا كوب الماء وحوض الاستحمام. حوض الاستحمام بيبقى فيه ميّه أكبر من اللي موجودة في كوباية المية. يبقى هنكتب اتنين عند حوض الاستحمام. وهنكتب تلاتة عند كوب الماء.

يبقى لو جينا نرتّب التلات أشكال من الأكبر سعة إلى الأقل سعة، هنلاقي إن الأكبر سعة هو حمام السباحة، ويليه حوض الاستحمام. وأصغر حاجة؛ يعني أقل شكل بيستوعب كمية ميّه هو كوب الماء.

يبقى كده اتكلمنا إزّاي نرتب الأشياء من حيث السعة من الأكبر سعة إلى الأقل سعة. هنجيب صفحة جديدة.

عندنا تلات أشكال، وهم: مقلاة، وحلة، وكوب. عايزين نقارن بينهم من حيث السعة، بعد كده نرتبهم من الأقل سعة إلى الأكبر سعة.

الأقل سعة يعني اللي بيستوعب كمية أقل. والأكبر سعة يعني اللي بيستوعب كمية أكبر. هنلاقي إن الكوب بيستوعب أقل كمية؛ عشان حجمه صغير. يبقى هنكتب واحد عند الكوب. بعد كده لمّا نيجي نقارن بين المقلاة والحلة، هنلاقي إن المقلاة بتستوعب كمية أقل من الكمية اللي بتستوعبها الحلة. يبقى هنكتب اتنين عند المقلاة. وهنكتب تلاتة عند الحلة.

يبقى عشان نرتب التلات أشكال من حيث السعة من الأقل سعة إلى الأكبر سعة. هنلاقي إن أول حاجة الكوب، بعد كده المقلاة، وأكبر حاجة عندنا هي الحلة؛ عشان بتستوعب حاجات أكتر.

يبقى كده اتكلمنا عن مقارنة السعات، وإزّاي نعرف نرتّبها من الأقل سعة إلى الأكبر سعة، ومن الأكبر سعة إلى الأقل سعة. وعرفنا إيه الكلمات اللي بنستخدمها عشان نعبر عن السعة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.