نسخة الفيديو النصية
قرّب العدد سبعة آلاف ربعمية واتناشر إلى أقرب ألف.
في المثال ده، بما إنه التقريب لأقرب ألف، فأول حاجة بنعملها إننا بنحدّد الرقم الموجود في الخانة دي، اللي هي خانة الألوف، وهو الرقم سبعة. وتاني حاجة بنعملها هو إننا بنشوف الرقم اللي في الخانة اللي قبلها على طول، وهو خانة المئات، في المثال ده هو الرقم أربعة. تالت حاجة بنعملها هو إننا بنقارنه بالعدد خمسة. إذا كان أقل من الخمسة، مش بزوّد على الألوف واحد، ولكن هحوّله لصفر، وهخلي كل اللي قبله أصفار. وإذا كان أكتر من خمسة أو خمسة نفسها، هزوّد على الألوف واحد، وهحوّل بقية الأرقام برضو لصفر.
معنى كده إن الأربعة والتلاتة والاتنين و الواحد والصفر، مش هيقدروا يزوّدوا للآلاف واحد؛ لأنهم صغيرين. إنما الخمسة والستة والسبعة والتمنية، عشان هم كبار، فهيزوّدوا لخانة الآلاف واحد، لمّا آجي أقرّب.
وبالتالي عشان نيجي نقرب سبعة آلاف ربعمية واتناشر لأقرب ألف، هنكتب السبعة زي ما هي، والأربعة هتبقى صفر، والواحد صفر، والاتنين صفر. خلينا الأربعة صفر ليه؟ علشان خاطر هي من الأعداد اللي أقل من الخمسة. إذن سبعة آلاف ربعمية واتناشر يساوي تقريبًا سبعة آلاف.
