فيديو: طرح عددين حتى ٩٩٩

أوجد الفرق بين ٨٧١، ٣١٩.

٠٢:٤٢

‏نسخة الفيديو النصية

أوجد الفرق بين تمنمية واحد وسبعين، وتلتمية وتسعتاشر.

عاوزين نعرف الفرق بين العددين دول. فعلشان نجيب الفرق ما بينهم، هنطرحهم. ولمّا بنطرح، بنطرح العدد الصغير من العدد الكبير. عندنا هنا التلتمية وتسعتاشر، هي العدد الصغير. والتمنمية واحد وسبعين، هو العدد الكبير. فأول حاجة هنكتبها العدد الكبير تمنمية واحد وسبعين. تمنية، بعدين واحد، بعدين سبعة. وهنطرح منه؛ يعني هنشيل، يعني نعمل ناقص. العدد الصغير تلتمية وتسعتاشر. التلاتة في المئات تحت التمنية، والواحد في العشرات تحت السبعة، والتسعة في الآحاد تحت الواحد. بعدين نشدّ خط الناتج، ونبدأ نطرح.

نطرح الآحاد، واحد ناقص تسعة. هل ينفع نشيل تسعة من الواحد؟ لأ طبعًا؛ ده الواحد هو الصغير. طيّب في الحالة دي هنستلف. الواحد هيروح للعدد اللي جنبه السبعة آسفة؛ الرقم اللي جنبه اللي هو السبعة، وياخد منها واحد. فتبقى هي ستة. والواحد اللي خده منها، تخلّيه هو بقى حداشر. كده ممكن نطرح، نقول حداشر ناقص تسعة. حداشر ناقص تسعة كام؟ لو عدّينا بعد التسعة لحد ما نوصل للحداشر، هنقول إيه؟ بعد التسعة: عشرة، حداشر. عدّينا رقمين، فده معناه إن هو بعد التسعة بنعدّ اتنين؛ علشان نوصل للحداشر. يعني حداشر ناقص تسعة بتساوي اتنين.

بعدين نطرح العشرات، ستة ناقص واحد. آدي الست كلاب، هنشيل منهم كلب واحد. فيتبقّى لنا كام؟ واحد، اتنين، تلاتة، أربعة، خمسة. يبقى ستة ناقص واحد بتساوي خمسة. بعدين نطرح المئات، تمنية ناقص تلاتة. آدي التمن قطط عندنا هنا، هنشيل منهم تلاتة؛ واحد، اتنين، تلاتة. يتبقّى لنا دول، هم كام؟ واحد، اتنين، تلاتة، أربعة، خمسة. خمسة. يبقى تمنية ناقص تلاتة بتساوي خمسة.

وكده نكون خلّصنا عملية الطرح. وعرفنا الفرق ما بين تمنمية واحد وسبعين، وتلتمية وتسعتاشر؛ وهو خمسمية اتنين وخمسين. وهي دي الإجابة الصح.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.