فيديو: تبسيط النِّسَب بين كميتين تتضمَّنان تحويل وحدات الطول

ضع النسبة بين الطولين ١٢٠ سم و٣٫٢ م في أبسط صورة.

٠٢:٠٨

‏نسخة الفيديو النصية

ضع النسبة بين الطولين مية وعشرين سنتيمتر، وتلاتة واتنين من عشرة متر في أبسط صورة.

فعشان نوجد النسبة بين الطولين اللي عندنا في السؤال، فأول حاجة هنعملها إننا هنحوّل الوحدات؛ علشان يبقى الطولين بنفس الوحدة. وخلّينا في الأول نفتكر إن المتر الواحد بيساوي مية سنتيمتر. فبالتالي لو عندنا مقدار معطى بالمتر، وعايزين نحوّله إلى سنتيمتر، فبنضرب المقدار في مية. وأمَّا لو عندنا مقدار بالسنتيمتر، وعايزين نحوله إلى متر، فبنقسم المقدار على مية.

فبالتالي لو عايزين نحوّل تلاتة واتنين من عشرة متر إلى سنتيمتر. فزيّ ما عرفنا، لمّا يكون مقدار معطى بالمتر، وعايزين نحوّله إلى سنتيمتر، يبقى هنضرب المقدار في مية. فبالتالي هنضرب تلاتة واتنين من عشرة في مية. فهنحرّك العلامة العشرية هنا مكانين جهة اليمين. فيبقى المقدار بيساوي تلتمية وعشرين سنتيمتر. فبكده يبقى إحنا خلّينا الأطوال كلهم بالسنتيمتر.

بعد كده نقدر نوجد النسبة بينهم. فبالتالي هتبقى النسبة هي مية وعشرين إلى تلتمية وعشرين. لكن إحنا عايزين نكتب النسبة في أبسط صورة. فعشان نبسّط النسبة، أول حاجة هنعملها إننا هنقسم الطرفين على عشرة. فلمّا نقسم مية وعشرين على عشرة هتبقى بتساوي اتناشر. وأمَّا تلتمية وعشرين، لمّا نقسمها على عشرة هتبقى بتساوي اتنين وتلاتين. فهتبقى النسبة هي اتناشر إلى اتنين وتلاتين.

لكن لسه نقدر نبسّطها أكتر من كده. فهنلاحظ إن العددين اتناشر واتنين وتلاتين همّ الاتنين بيقبلوا القسمة على أربعة. فنقدر نقسم الطرفين على أربعة. وفي الأول هنقسم اتناشر على أربعة، واللي هتساوي تلاتة. وأمَّا اتنين وتلاتين لمّا نقسمها على أربعة، هتبقى بتساوي تمنية. فهتبقى النسبة هي تلاتة إلى تمنية. وهنلاحظ إن النسبة تلاتة إلى تمنية ما نقدرش نبسّطها أكتر من كده.

فمعنى كده إن هتبقى النسبة بين الطولين مية وعشرين سنتيمتر، وتلاتة واتنين من عشرة متر هي: تلاتة إلى تمنية. وهتبقى هي دي إجابة السؤال.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.