فيديو: تحليل المقادير التربيعية عندما يكون المُعامِل الرئيسي ليس ١

حلِّل ٦ﺱ^٢ − ﺱ − ١٢.

٠٣:٥١

‏نسخة الفيديو النصية

حلّل: ستة س تربيع ناقص س ناقص اتناشر.

أول حاجة نحلّل الحدين الأول والتالت. فالحد الأول ستة س تربيع، هيساوي ستة س في س. أو هيساوي تلاتة س في اتنين س. والحد التالت سالب اتناشر، هيساوي سالب اتناشر في واحد. أو هيساوي سالب ستة في اتنين. أو هيساوي سالب أربعة في تلاتة. أو هيساوي سالب تلاتة في أربعة. أو هيساوي سالب اتنين في ستة. أو هيساوي سالب واحد في اتناشر.

بعد كده عشان نحلّل المقدار ستة س تربيع ناقص س ناقص اتناشر. تحليله هيبقى بيساوي … نكتب قوسين بالصورة دي. وكل قوس من الاتنين هيكون فيه أحد عوامل الحد الأول زائد أو ناقص أحد عوامل الحد التاني. بعدين نكتب العوامل بالصورة دي، ونضربهم بشكل تبادلي. يعني هنضرب ستة س في واحد، وَ س في سالب اتناشر.

نلاحظ إننا أخدنا العوامل: ستة س، وَ س؛ لأن حاصل ضربهم بيساوي ستة س تربيع اللي هو الحد الأول. والعناصر: سالب اتناشر، وواحد؛ لأن حاصل ضربهم بيساوي الحد التالت اللي هو سالب اتناشر. حاصل الضرب التبادلي هيساوي … ستة س في واحد هيساوي ستة س. وسالب اتناشر في س هيساوي سالب اتناشر س. بعد كده نجمع، فالمفترض إن مجموعهم هيساوي الحد الأوسط؛ يعني هيساوي سالب س. فنجمع، ستة س زائد سالب اتناشر س، هيساوي سالب ستة س. وده لا يساوي سالب س. فنبدّل أماكن العاملَين: ستة س، وَ س، ونكرّر عملية الضرب التبادلي بنفس الطريقة.

فهيبقى حاصل الضرب التبادلي بيساوي … س في واحد بيساوي س. وستة س في سالب اتناشر، هيساوي سالب اتنين وسبعين س. بعد كده نجمع، س زائد سالب اتنين وسبعين س، هيساوي سالب واحد وسبعين س. وده برضو لا يساوي سالب س. فهنبدّل العوامل: سالب اتناشر، وواحد بأيّ عاملَين آخرين. زيّ: سالب ستة، واتنين. ونكرّر نفس العملية بنفس الطريقة لحد ما نوصل للعوامل: اتنين س في تلاتة س، وسالب تلاتة في أربعة.

نعمل عملية الضرب التبادلي، فيبقى حاصل الضرب التبادلي بيساوي … اتنين س في أربعة، بيساوي تمنية س. وتلاتة س في سالب تلاتة، بيساوي سالب تسعة س. وبجمعهم؛ تمنية س زائد سالب تسعة س هيساوي سالب س. يعني بيساوي الحد الأوسط. فبالتالي ستة س تربيع ناقص س ناقص اتناشر، بيساوي اتنين س ناقص تلاتة، في تلاتة س زائد أربعة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.