تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: الوقت بنصف الساعة

نهال عصمت

يتناول الفيديو طريقة قراءة وكتابة الساعة بنصف الساعة، وأمثلة توضح ذلك.

٠٣:٣٣

‏نسخة الفيديو النصية

الوقت بنصف الساعة.

هنعرف إزاي نقرا ونكتب الوقت بنصف الساعة. عندنا ساعة العقارب بتبقى بالشكل ده. عندنا العقرب الأقصر هو عقرب الساعات؛ عشان بيدلّ على الساعات. أمّا العقرب الأطول، فهو عقرب الدقايق؛ عشان يدلّ على الدقائق. ومعنى إننا نقرا الوقت بنصف الساعة، يعني عقرب الدقايق يشير إلى العدد ستة. وفي الحالة دي، هنلاقي إن عقرب الساعات هيبقى موجود بين عددين. عندنا هيبقى موجود بين العددين أربعة وخمسة. في الحالة دي، نقدر نقول: إن الساعة الرابعة والنصف. يبقى لما عقرب الدقايق يبقى موجود عند العدد ستة، وعقرب الساعات يبقى موجود بين العددين أربعة وخمسة. في الحالة دي نقدر نقول: إن الساعة هي الرابعة والنصف.

هنبدأ نجيب صفحة جديدة. ونشوف أمثلة أخرى، إزاي نقرا الوقت بنصف الساعة. عايزين نقرا الساعة اللي موجودة قدامنا.

هنلاقي إن عقرب الدقايق يشير إلى العدد ستة، وعقرب الساعات موجود بين العددين تسعة وعشرة. في الحالة دي، نقدر نقول: إن الساعة التاسعة والنصف. يبقى لمّا عقرب الدقايق بيبقى موجود عند العدد ستة، وعقرب الساعات موجود بين العددين تسعة وعشرة بناخد العدد الأقل، اللي هو التسعة. يبقى الساعة التاسعة والنصف.

نشوف مثال تاني. هنلاقي إن عقرب الدقايق يشير إلى العدد ستة، وعقرب الساعات يقع بين العددين ستة وسبعة. يبقى هناخد العدد الأقل، اللي هو الستة. ونقدر نقول في الحالة دي: إن الساعة السادسة والنصف. يبقى لمّا عقرب الدقايق يشير إلى العدد ستة، وعقرب الساعات يبقى موجود بين عددين، اللي هم الستة والسبعة، هناخد العدد الأقل. يبقى في الحالة دي الساعة السادسة والنصف.

يبقى كده عرفنا إزاي نقرا الوقت بنصف الساعة. ومعنى إن الوقت بنصف الساعة، يعني عقرب الدقايق يشير إلى العدد ستة، وعقرب الساعات بيبقى موجود بين عددين. وفي الحالة دي بناخد العدد الأقل ونزوِّد عليه كلمة والنصف. يبقى في حالة لو العقرب موجود بين العددين تسعة وعشرة، يبقى الساعة التاسعة والنصف. ولو موجود بين العددين ستة وسبعة يبقى الساعة السادسة والنصف.