فيديو: إيجاد الجذر التربيعي لعدد مُعطًى

أوجد الجذر التربيعي للعدد ١١٥٦.

٠٢:٤٦

‏نسخة الفيديو النصية

أوجد الجذر التربيعي للعدد ألف مية ستة وخمسين.

فعندنا طريقتين علشان نوجد الجذر التربيعي للعدد ألف مية ستة وخمسين. فأول طريقة هي باستخدام الآلة الحاسبة. فباستخدام الآلة الحاسبة نقدر نضغط على علامة الجذر التربيعي، وبعد كده نكتب العدد ألف مية ستة وخمسين. فلمّا نحسبها هيبقى الناتج هو أربعة وتلاتين.

وخلينا نفتكر إن الجذر التربيعي لعدد ممكن يكون قيمته سالبة أو موجبة. فبالتالي هيبقى الجذر التربيعي لألف مية ستة وخمسين هو موجب أو سالب أربعة وتلاتين. لأن لو ضربنا العدد أربعة وتلاتين في نفسه، هيبقى بيساوي ألف مية ستة وخمسين. وبنفس الطريقة لو ضربنا العدد سالب أربعة وتلاتين في نفسه، هيبقى الناتج ألف مية ستة وخمسين. فبالتالي هيبقى الإجابة هي أربعة وتلاتين، وسالب أربعة وتلاتين.

وفيه عندنا طريقة تانية نقدر نوجد بيها الجذر التربيعي، وهي باستخدام تحليل العدد إلى عوامله الأولية. يعني هنحلّل العدد ألف مية ستة وخمسين إلى عوامله الأولية، عشان نوجد الجذر التربيعي ليه. وفي الأول هنلاحظ إن العدد زوجي، فبالتالي نقدر نقسمة على أقل عدد أولي اللي هو العدد اتنين. فلمّا نقسم العدد ألف مية ستة وخمسين على اتنين، هيبقى بيساوي خمسمية تمنية وسبعين. وبالتالي هيبقى ألف مية ستة وخمسين هي حاصل ضرب اتنين في خمسمية تمنية وسبعين.

وبما إن اتنين عدد أولي فهيفضل زي ما هو. فبعد كده نقدر نحلل العدد خمسمية تمنية وسبعين إلى عوامله الأولية. فهنلاحظ إن خمسمية اتنين وسبعين، هو حاصل ضرب اتنين في ميتين تسعة وتمانين. وأما الاتنين فهتنزل زي ما هي. فهيبقى عندنا العددين اتنين هنا أعداد أولية. بعد كده هنلاحظ العدد ميتين تسعة وتمانين عايزين نحلّله إلى عوامله الأولية.

فبعد أكتر من محاولة للقسمة على أعداد أولية، هنلاحظ إن العدد ميتين تسعة وتمانين بيقبل القسمة على سبعتاشر. ولمّا نقسمه على السبعتاشر، هيبقى بيساوي سبعتاشر. فهيبقى هو عبارة عن حاصل ضرب سبعتاشر في سبعتاشر.

فكده يبقى إحنا خلّصنا تحليل العدد إلى عوامله الأولية؛ لأن كل الأعداد اللي عندنا بقت أعداد أولية. فهنلاحظ إن عوامل العدد ألف مية ستة وخمسين الأولية، هي اتنين في اتنين، في سبعتاشر في سبعتاشر. فلمّا نضرب اتنين في سبعتاشر، هتبقى بتساوي أربعة وتلاتين. ولمّا نضرب اتنين في سبعتاشر برضو هتساوي أربعة وتلاتين.

فبالتالي هيبقى ألف مية ستة وخمسين، بتساوي أربعة وتلاتين في أربعة وتلاتين؛ يعني أربعة وتلاتين تربيع. فبنفس الطريقة هيبقى الجذر التربيعي لألف مية ستة وخمسين، هو موجب أو سالب أربعة وتلاتين. وهي نفس الإجابة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.