فيديو: الضرب في ۲

نادر عاطف

يوضح الفيديو كيفية الضرب في العدد ۲ باستخدام الشبكة وطريقة العد المتقطع، مع أمثلة توضيحية.

٠٦:٠٨

‏نسخة الفيديو النصية

في الفيديو ده هنتكلّم عن الضرب في العدد اتنين، وهنحلّ بعض الأمثلة المختلفة.

في حصة التربية الفنية طلب المعلم من الطلاب أن يعملوا في مجموعات. ووزّع الطلاب في تمن مجموعات، وكل مجموعة فيها طالبين؛ علشان يعملوا مشروع فنّي. فما عدد جميع الطلاب؟

يعني عندنا تمن مجموعات من الطلاب، وكل مجموعة فيها طالبين. وعشان نعرف عدد جميع الطلاب، فيه عندنا طريقتين بنستخدمهم. أول طريقة هي تكوين شبكة، والطريقة التانية إننا نرسم صورة. ودلوقتي هنشوف إزاي نستخدم كل طريقة فيهم.

فأول طريقة هي إننا نكوّن شبكة. فزيّ ما قلنا عندنا تمن مجموعات من الطلاب، وكل مجموعة فيها اتنين. يبقى هنعمل شبكة مكوّنة من تمن صفوف، وكل صف فيه قطعتين. يعني هتبقى الشبكة عبارة عن تمن صفوف، وعمودين.

فدلوقتي علشان نوجد عدد الطلاب، يبقى هنجمع الصفوف. وكل صف عندنا فيه اتنين، وعندنا تمن صفوف. فمعنى كده إننا هنجمع العدد اتنين تمن مرات. فلمّا نجمع اتنين زائد اتنين، زائد اتنين، زائد اتنين، زائد اتنين، زائد اتنين، زائد اتنين، زائد اتنين؛ هيبقى المجموع بيساوي ستاشر. فلمّا جمعنا اتنين تمن مرات يبقى كأننا بنضرب تمنية في اتنين. فتمنية في اتنين هتساوي ستاشر. طيّب خلّينا نشوف الطريقة التانية.

والطريقة التانية هي رسم صورة. فهنرسم تمن مجموعات، وكل مجموعة فيها قطعتين؛ اللي هم العلامتين اللي عندنا في كل مجموعة. فبرضو بنفس الطريقة علشان نوجد عدد الطلاب الكلي، يبقى هنجمع كل المجموعات، اللي هم التمن مجموعات. يعني نجمع الاتنين اللي هنا، زائد الاتنين اللي هنا، زائد الاتنين اللي هنا، وهكذا …

فمعنى كده إننا هنجمع اتنين تمن مرات. فلمّا نجمع العدد اتنين تمن مرات هيبقى بيساوي ستاشر. فلمّا نجمع العدد اتنين تمن مرات فمعنى كده كأننا ضربنا تمنية في العدد اتنين، فهيبقى برضو تمنية في اتنين بيساوي ستاشر. وبالتالي هيبقى العدد الكلي للطلاب بيساوي تمنية في اتنين، فتمنية في اتنين بتساوي ستاشر. فمعنى كده إن هيبقى عندنا ستاشر طالب.

ونقدر برضو علشان نوجد حاصل الضرب في العدد اتنين إننا نستخدم طريقة اسمها العدّ المتقطّع. وخلّينا نشوف مثال نعرف منه طريقة العدّ المتقطّع.

يذهب كريم إلى المدرسة راكبًا دراجته ثلاثة أيام في الأسبوع، فيقطع في كل يوم كيلومترين. فكم كيلومترًا يقطع في الأيام الثلاثة؟

يعني كريم بيروح المدرسة بدراجته تلات أيام في الأسبوع، وبيمشي بيها في اليوم الواحد اتنين كيلومتر. فعلشان نعرف عدد الكيلومترات اللي بيمشيها كريم في التلات أيام، يبقى هنوجد حاصل ضرب تلاتة في اتنين. تلاتة اللي هم عدد الأيام اللي بيروح بيهم كريم المدرسة بالدراجة. واتنين هو عدد الكيلومترات اللي بيمشيها بدراجته في اليوم الواحد. فهنستخدم العدّ المتقطّع علشان نوجد حاصل ضرب تلاتة في اتنين.

فأول حاجة بنعملها إننا بنرسم خط أعداد. وبعد كده بنبدأ نعدّ على خط الأعداد تلات قفزات متساوية، وفي كل قفزة فيه وحدتين. يعني هنبدأ أول قفزة من هنا من عند الصفر. وبعد كده نبدأ نقفز وحدتين؛ يعني مش عند أول واحدة لأ، هنيجي عند تاني واحدة. يبقى دي كده أول قفزة. والقفزة اللي بعدها هنبدأ من هنا، وبعد كده نقفز وحدتين. وتالت قفزة هتبدأ من هنا، وبرضو هنقفز وحدتين. فلمّا نيجي بعد كده نكتب الأعداد فهيبقى عندنا: واحد، اتنين، تلاتة، أربعة، خمسة، ستة.

وبما إن كل قفزة فيها وحدتين، فأول قفزة كانت عند اتنين. بعد كده عند أربعة. بعد كده تالت قفزة عند ستة. فمعنى كده إننا لمّا نضرب تلاتة، اللي هم التلات قفزات. في اتنين، اللي هم الوحدتين. هيبقى حاصل الضرب عندنا ستة، اللي هو آخِر عدد وقفنا عنده على خط الأعداد. وبالتالي بيقطع كريم مسافة بتساوي تلاتة في اتنين؛ واللي هي بتساوي ستة كيلومترات في ثلاثة أيام.

وبكده نكون اتكلّمنا عن الضرب في العدد اتنين. وعرفنا إننا نقدر نضرب في العدد اتنين عن طريق تكوين شبكة. أو عن طريق رسم صورة، اللي هو باستخدام المجموعات زيّ اللي في الشكل هنا. وعرفنا إزاي نضرب في العدد اتنين باستخدام طريقة العدّ المتقطّع، واللي بنستخدم فيها خط الأعداد؛ علشان نوجد حاصل الضرب في العدد اتنين. وحلّينا بعض الأمثلة المختلفة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.