فيديو: إيجاد طول العمودي المرسوم من أحد رءوس متوازي الأضلاع إلى أحد أضلاعه

إذا كان أبﺟد متوازي أضلاع، دﻫ = ١٣ سم، فأوجد طول القطعة المستقيمة دز.

٠٣:١٢

‏نسخة الفيديو النصية

إذا كان أ ب ﺟ د متوازي أضلاع، وَ د ﻫ‎ تساوي تلتاشر سنتيمتر؛ فأوجد طول القطعة المستقيمة د ز.

ومعطى عندنا الشكل اللي قدّامنا. وهو عبارة عن متوازي الأضلاع أ ب ﺟ د. ومعطى عندنا ب ﺟ تساوي خمسة وأربعين سنتيمتر، وَ أ ب تساوي تسعة وتلاتين سنتيمتر. ومعطى عندنا في السؤال إن د ﻫ‎ بتساوي تلتاشر سنتيمتر. والمطلوب في السؤال إننا نوجد طول القطعة المستقيمة د ز، اللي هي القطعة المستقيمة دي.

وخلينا في الأول نفتكر إن مساحة متوازي الأضلاع بتساوي طول القاعدة في الارتفاع. فنقدر نعتبر الضلع ب ﺟ هو قاعدة متوازي الأضلاع. ومعطى عندنا إن ب ﺟ بتساوي خمسة وأربعين سنتيمتر. ونقدر نعتبر إن القطعة المستقيمة د ﻫ‎ هي ارتفاع متوازي الأضلاع. ومعطى عندنا إن د ﻫ‎ بتساوي تلتاشر سنتيمتر. فبمعلومية طول القاعدة والارتفاع، نقدر نوجد مساحة متوازي الأضلاع. بعد كده هنقدر نستخدم المساحة اللي أوجدناها؛ علشان نوجد طول القطعة المستقيمة د ز.

فبالتالي هيبقى مساحة متوازي الأضلاع أ ب ﺟ د بتساوي طول القاعدة، واللي معطاة عندنا بخمسة وأربعين سنتيمتر؛ في الارتفاع، واللي معطى عندنا بتلتاشر سنتيمتر. بعد كده هنوجد حاصل ضرب خمسة وأربعين في تلتاشر، فهتبقى بتساوي خمسمية خمسة وتمانين. وما ننساش الوحدة هتبقى سنتيمتر مربع؛ لأننا بنحسب مساحة.

فكده قدرنا نوجد مساحة متوازي الأضلاع أ ب ﺟ د، واللي بتساوي خمسمية خمسة وتمانين سنتيمتر مربع. وهنستخدم المساحة دي في إننا نوجد طول القطعة المستقيمة د ز. فهنعوّض في قانون مساحة متوازي الأضلاع عن المساحة بخمسمية خمسة وتمانين. فهيبقي خمسمية خمسة وتمانين بتساوي طول القاعدة. والمرة دي هنعتبر إن قاعدة متوازي الأضلاع هي أ ب. ومعطى عندنا إن أ ب بتساوي تسعة وتلاتين سنتيمتر. فهيبقى بتساوي تسعة وتلاتين في الارتفاع. والارتفاع عندنا هو طول القطعة المستقيمة د ز، وهو اللي عايزين نوجد طوله. فهنعوّض عن الارتفاع بـ د ز.

بعد كده عشان نوجد قيمة د ز، يبقى هنقسم طرفَي المعادلة على تسعة وتلاتين. فهيبقى الطرف الأيمن للمعادلة خمسمية خمسة وتمانين على تسعة وتلاتين. فلمّا نحسبها هتبقى بتساوي … وأمّا الطرف الأيسر للمعادلة، فهيبقى تسعة وتلاتين في د ز، على تسعة وتلاتين، واللي هتساوي د ز. فبالتالي هيبقى د ز بيساوي خمستاشر. فمعنى كده إن طول القطعة المستقيمة د ز بتساوي خمستاشر سنتيمتر.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.