تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: ضرب الأعداد الصحيحة

أحمد لطفي

يوضح الفيديو كيفية ضرب الأعداد الصحيحة التي لها نفس الإشارة، وكيفية ضرب الأعداد الصحيحة المختلفة الإشارة.

٠٧:٠٧

‏نسخة الفيديو النصية

هنتكلم عن ضرب الأعداد الصحيحة، وهنعرف إزاي هنقدر نضرب عددين صحيحين لهما الإشارة نفسها، أو نضرب عددين صحيحين مختلفي الإشارة.

في البداية هنستخدم قِطع العد الموجبة والسالبة عشان نعبّر عن تلاتة في اتنين. عشان نعبّر عن تلاتة في اتنين هنضع تلات مجموعات كل مجموعة فيها قطعتين عدّ موجبتين، وبالتالي هنجد إن عندنا ست قطع عدّ موجبة؛ يعني تلاتة في اتنين هيساوي ستة.

بنفس الطريقة لو هنوجد اتنين في اتنين هيساوي أربعة، وأيضًا واحد في اتنين هيساوي اتنين. هنلاحظ إننا كل ما نقلل العدد المضروب في اتنين بواحد، الناتج هيقل بمقدار اتنين. وبنفس النمط نقدر نستنتج إن صفر في اتنين هيساوي صفر، قللنا الناتج باتنين، وإن سالب واحد في اتنين هيساوي سالب اتنين، وإن سالب اتنين في اتنين هيساوي سالب أربعة، وإن سالب تلاتة في اتنين هيساوي سالب ستة.

بنفس الطريقة لو عايزين نمثّل تلاتة في سالب اتنين، عشان نقدر نمثّل تلاتة في سالب اتنين، هنضع تلات مجموعات، كل مجموعة فيها قطعتين عدّ سالبتين، هنلاقي إن عندنا ست قطع عدّ سالبة، وبالتالي تلاتة في سالب اتنين هيساوي سالب ستة.

وبنفس الطريقة اتنين في سالب اتنين هيساوي سالب أربعة، وواحد في سالب اتنين هيساوي سالب اتنين. هنلاحظ أيضًا إن كل ما قللنا العدد المضروب في سالب اتنين بمقدار واحد، الناتج كان بيزيد بمقدار اتنين. وبالتالي بنفس النمط صفر في سالب اتنين هيساوي صفر، وسالب واحد في سالب اتنين هيساوي اتنين، وسالب اتنين في سالب اتنين هيساوي أربعة، وسالب تلاتة في سالب اتنين هيساوي ستة. لو حبينا نركز على تلاتة في اتنين بيساوي ستة، وسالب تلاتة في اتنين بيساوي سالب ستة، وتلاتة في سالب اتنين بيساوي سالب ستة، وسالب تلاتة في سالب اتنين بيساوي ستة؛ هنلاحظ إن ناتج ضرب عددين صحيحين ليهم نفس الإشارة بيكون عدد موجب، وهنلاحظ إن ناتج ضرب عددين صحيحين مختلفي الإشارة بيكون عدد سالب، وبالتالي نقدر نستنتج قاعدتين لضرب الأعداد الصحيحة؛ أول قاعدة: ناتج ضرب عددين صحيحين لهما نفس الإشارة هيكون عدد موجب؛ يعني مثلًا تلاتة في اتنين هيساوي ستة، أو سالب تلاتة في سالب اتنين هيساوي ستة. وتاني قاعدة هي: ناتج ضرب عددين صحيحين مختلفي الإشارة هو عدد سالب؛ يعني مثلًا سالب تلاتة في اتنين هيساوي سالب ستة، أو تلاتة في سالب اتنين هيساوي سالب ستة.

لو مثلًا عندنا مثال بالشكل ده، مطلوب إيجاد ناتج أربعة في تمنية. بما إن العددين الصحيحين أربعة وتمنية ليهم نفس الإشارة، وإشارتهم موجبة، يعني الناتج هيكون عدد موجب؛ وبالتالي أربعة في تمنية هيساوي اتنين وتلاتين.

لو عندنا مثال آخر بالشكل ده، مطلوب نوجد ناتج سالب خمسة في سالب ستة. بما إن العددين الصحيحين سالب خمسة وسالب ستة ليهم نفس الإشارة، وإشارتهم سالبة، يبقى الناتج هيكون عدد موجب؛ وبالتالي سالب خمسة في سالب ستة هيساوي تلاتين.

لو هنشوف مثال على ضرب أعداد صحيحة مختلفة الإشارة، لو مطلوب إيجاد ناتج أربعة في سالب اتنين. هنلاحظ إن أربعة وسالب اتنين هما عددين صحيحين، ليهم إشارات مختلفة، وبالتالي الناتج هيكون عدد سالب؛ يعني أربعة في سالب اتنين هيساوي سالب تمنية.

لو عندنا مثال آخر بالشكل ده، مطلوب إيجاد ناتج سالب اتنين في تلاتة في سالب أربعة. عشان نقدر نوجد الناتج هنضرب سالب اتنين في تلاتة، وناتج الضرب هنضربه في سالب أربعة. وبالتالي سالب اتنين في تلاتة في سالب أربعة هيساوي، هنضرب سالب اتنين في تلاتة، هنلاحظ إن سالب اتنين وتلاتة هما عددين صحيحين، إشاراتهم مختلفة، يعني الناتج هيكون سالب، وبالتالي سالب اتنين في تلاتة هيساوي سالب ستة مضروبة في سالب أربعة، هنضرب سالب ستة في سالب أربعة هنلاحظ إن سالب ستة وسالب أربعة هما عددين صحيحين، ليهم نفس الإشارة، وبالتالي الناتج هيكون عدد موجب؛ يعني هيساوي أربعة وعشرين. وبالتالي نكون قدرنا نوجد ناتج سالب اتنين في تلاتة في سالب أربعة.

لو عندنا مثال آخر بالشكل ده تبدأ غواصة الغطس من سطح الماء بسرعة تبلغ تلات أمتار في الدقيقة، مطلوب إيجاد العمق اللي هتصل إليه بعد سبع دقايق. عشان نقدر نحصل على العمق اللي هتصل إليه الغواصة بعد سبع دقايق محتاجين نضرب سرعة الغواصة في سبع دقايق، وبالتالي عمق الغواصة بعد سبع دقايق هيكون بيساوي سبعة في سالب تلاتة. هنلاحظ إن سبعة وسالب تلاتة هما عددين صحيحين، إشاراتهم مختلفة، وبالتالي الناتج هيكون عدد سالب، يعني سبعة في سالب تلاتة هيساوي سالب واحد وعشرين؛ وبالتالي سوف تصل الغواصة إلى عمق واحد وعشرين مترًا من السطح.

وفي النهاية نكون عرفنا إزاي نضرب عددين صحيحين لهما نفس الإشارة، أو نضرب عددين صحيحين مختلفي الإشارة.