فيديو: استخدام أشكال فِن لتصنيف وعَدِّ العناصر‎

انظر إلى الشكل. ما عدد العناصر الموجودة في مجموعة «الحيوانات»؟ ما عدد العناصر في مجموعة «الأشياء التي تطير»؟ ما عدد الحيوانات التي يمكن أن تطير؟ ما عددها كلها؟

٠٣:٢٤

‏نسخة الفيديو النصية

انظر إلى الشكل. ما عدد العناصر الموجودة في مجموعة الحيوانات؟ ما عدد العناصر في مجموعة الأشياء التي تطير؟ ما عدد الحيوانات التي يمكن أن تطير؟ ما عددها كلها؟

عندنا الشكل اللي قدامنا ده، وفيه عليه أربع أسئلة، عاوزين نجاوب عليهم. طب هو الشكل ده عبارة عن إيه؟ عبارة عن مجموعتين. المجموعة دي اللي هي بتمثلها الدايرة دي، والمجموعة دي. طب هي المجموعة الأولى دي اسمها إيه؟ الأشياء التي تطير. زي الطيارة، والطيارة الورق، والمنطاد. وحاجات تانية؛ زي النحلة، والدبانة، والعصفورة. دي كلها حاجات بتطير.

طيب والمجموعة التانية، مجموعة الإيه؟ الحيوانات. فيها إيه؟ فيها شوية حيوانات. زي الحصان، والدودة والقطة، والبقرة، والكلب، والنحلة، والدبانة، والعصفورة. ناخد بالنا إن النحلة والدبانة والعصفورة موجودين في المجموعتين؛ علشان هم حيوانات، وفي نفس الوقت بيطيروا.

كده إحنا فهمنا المجموعتين، واللي فيهم. نبدأ بقى نجاوب على أول سؤال: ما عدد العناصر الموجودة في مجموعة الحيوانات؟ دي هي مجموعة الحيوانات. عاوزين نعرف عدد العناصر اللي فيها. حلو أوي، تعالوا نعدّهم. واحد اللي هو الحصان، اتنين، تلاتة، أربعة، خمسة، ستة، سبعة، تمنية. يبقى كده إحنا لمّينا كل الحيوانات، وعديناهم، وطلع عددهم تمنية. فتبقى الإجابة تمنية.

طيب نجاوب على تاني سؤال: ما عدد العناصر في مجموعة الأشياء التي تطير؟ هي دي مجموعة الأشياء التي تطير. يلّا نعدّ العناصر اللي فيها. واحد، اتنين، تلاتة، أربعة، خمسة، ستة. يبقى العناصر عددها إيه؟ ستة. وعدينا برضو الدبانة والنحلة والعصفورة معاهم برضو؛ عشان هم بيطيروا.

نيجي للسؤال اللي بعده: ما عدد الحيوانات التي يمكن أن تطير؟ فين بقى الحيوانات عندنا اللي ممكن تطير؟ الحصان ما بيطيرش، ولا الدودة، ولا القطة، ولا الكلب، ولا البقرة. أُمّال بقى مين اللي بيطير؟ الدبانة، والنحلة، والعصفورة. اللي هم فين؟ واحد، اتنين، تلاتة. هم دول. يبقى عدد الحيوانات اللي بتطير، تلاتة.

طيب ما عددها كلها؟ يعني إيه بقى عدد العناصر دي كلها اللي إحنا عمّالين نعدّ فيها؟ تعالوا بقى نعدّهم كلهم. واحد … أو خلينا نمسح من الأول، يلّا نعدّهم. واحد، اتنين، تلاتة، أربعة، خمسة، ستة، سبعة، تمنية، تسعة، عشرة، حداشر. يبقى عدد العناصر كلها حداشر.

وكده نكون جاوبنا على كل أجزاء السؤال. أول جزء عدد الحيوانات، تمنية. وعدد الأشياء اللي بتطير، ستة. وعدد الحيوانات اللي بتطير، تلاتة. وعدد العناصر كلها، حداشر.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.