تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: قراءة الرسوم البيانية

أحمد مدحت

يوضح الفيديو كيفية قراءة الرسوم البيانية، واستخدامها للتنبؤ بالأحداث في المستقبل، مع أمثلة توضيحية.

٠٣:٠٤

‏نسخة الفيديو النصية

هنتكلم عن قراءة الرسوم البيانية. هدفنا من الفيديو ده إن إحنا لما يبقى عندنا رسم بياني نعرف نقراه، وكمان نقدر نستخدمه علشان نتنبأ بالأحداث في المستقبل.

بالنسبة للرسوم البيانية، فإحنا ممكن نستخدمها علشان نتنبأ بالأحداث في المستقبل؛ وده لأنها بتوضّح تغيُّر مجموعة من البيانات مع مرور الزمن. هنشوف أمثلة نوضح بيها أكتر، عندنا في المثال جدول بيوضح الجوايز المالية لمسابقة ما من عام ألفين واتناشر لعام ألفين وسبعتاشر، وكمان موجود رسم بياني للبيانات اللي في الجدول ده، ومطلوب إن إحنا نوصف اتجاه البيانات، وكمان نتنبأ بقيمة الجايزة عام ألفين وعشرين.

من خلال الرسم البياني اللي عندنا هنلاحظ إن البيانات في اتجاه الصعود، والصعود ده كمان إلى حدٍّ ما ثابت، وده معناه إن قيمة الجايزة بتزيد زيادة ثابتة إلى حدٍّ ما.

بكده إحنا وصفنا اتجاه البيانات، أما التنبؤ بقيمة الجايزة لعام ألفين وعشرين، فإحنا لما هنمدّ التمثيل البياني اللي عندنا لعام ألفين وعشرين زي ما هيظهر لنا، هنلاقي عند عام ألفين وعشرين الجايزة هتبقى حوالي مليون وخمسمية ألف جنيه.

بكده من خلال المثال ده قدرنا نستخدم الرسم البياني لمجموعة من البيانات في إن إحنا نوصف اتجاه البيانات، وكمان قدرنا من خلال مدّ التمثيل البياني للبيانات دي بإن إحنا نتوقّع أو نتنبأ بأحداث في المستقبل. هنلاحظ في الرسم البياني بتاع المثال اللي عندنا، إن إحنا موصّلين ما بين النقط بخط متقطع، وده سببه إن إحنا ما عندناش قيم حقيقية للبيانات بين السنين. بالنسبة للمثال التاني، فإحنا عندنا رسم بياني بيوضح مبيعات ألواح التزلج من شركة ما، ومطلوب نبيّن اللي بيوضحه الرسم البياني ده عن شعبية رياضة التزلج.

من خلال الرسم البياني اللي عندنا، هنلاحظ إن البيانات في حالة صعود، وده معناه إن مبيعات ألواح التزلج بتزيد كل سنة، وده يخلينا نفترض إن شعبية رياضة التزلج بتزيد.

بعد كده هنشوف مثال كمان، عندنا في المثال رسم بياني بيوضح عدد زوار معرض ما خلال ساعة واحدة، ومطلوب إن إحنا نِوجد العدد الكلي للزوار. في الرسم البياني اللي عندنا، المحور الأفقي بيمثل نوع الزوار، أما المحور الرأسي فبيمثل عدد الزوار. فهنبدأ نجيب عدد الزوار من كل نوع، بعد كده هنجمع الأعداد دي علشان نِوجد العدد الكلي للزوار. فبالنسبة لـ الرجال، فهنلاقي عدد الزوار هو عشرة، أما السيدات فهنلاقي عددهم هو خمستاشر، والأولاد فهنلاقي عددهم هو خمسة، أما بالنسبة لـ البنات فهنلاقي عدد الزوار هو عشرين زائر. بكده يبقى العدد الكلي للزوار يساوي عشرة زائد خمستاشر زائد خمسة زائد عشرين، يعني هيبقى العدد الكلي للزوار يساوي خمسين زائر.

بكده يبقى إحنا في الفيديو ده عرفنا إزاي نقرا الرسوم البيانية، وكمان عرفنا إزاي نستخدم الرسوم البيانية علشان نتوقع أو نتنبأ بأحداث في المستقبل.