فيديو: تقدير وقياس وحدات السعة في النظام المتري

الفيديو يتناول الوحدات شائعة الاستخدام لقياس السعة في النظام المتري ، وكيفية تحديد الوحدة المناسبة لقياس السعة، وتقدير السعة، مع حل أمثلة توضيحية.

٠٦:٣٠

‏نسخة الفيديو النصية

تقدير وقياس وحدات السعة في النظام المتري.

في الفيديو ده هنراجع تعريف السعة، وهنتعرّف على الوحدات شائعة الاستخدام لقياس السعة في النظام المتري. وهنعرف إزاي نقدر نحدّد الوحدة المناسبة لقياس سعةٍ ما. وكمان هنعرف كيفية تقدير السعة من خلال حل أمثلة. بنبدأ أول حاجة بتعريف السعة. وهي مقدار ما يمكن أن يحويه وعاء. يعني لو عندنا وعاء، ومليناه لحدّ الآخر بسائل ما. لو قِسنا كمية السائل اللي جوّه الوعاء ده، بكده نقدر نقيس سعة هذا الوعاء.

ودلوقتي هنشوف جدول، هيوضح لنا أشهر وحدات قياس السعة المترية. بنلاقي في الجدول التالي الوحدة على اليمين، ومثال على الوحدة على الشمال. الوحدة الأولى لقياس السعة في النظام المتري، هي واحد ملليلتر، أو بنقول رمزها مل. بنلاقي مثال على الملليلتر قطرة العين. بنلاقي إنها تُقاس سعتها بالملليلتر. بعد كده بنلاقي الواحد لتر، وبنرمز له بالرمز ل. بنلاقي مثال عندنا زجاجة المياه المعبّأة، بتقاس باللتر. ممكن نلاقي زجاجة لتر، أو زجاجة لتر ونصف، أو زجاجة لترين. لازم نعرف حاجة أخيرة؛ يوجد ألف ملليلتر في اللتر الواحد. والمعلومة دي مفيدة؛ عشان نقدر نحوّل من ملليلتر إلى لتر، والعكس.

بعد كده هنحلّ أمثلة على إيجاد الوحدة المناسبة لقياس سعة شيء ما. بنكمّل في صفحة جديدة. بنكمّل ونقرا المثال التالي: ما الوحدة المناسبة لقياس سعة كلًّا مما يأتي؟ ثم قدّر السعة.

أولًا عبوّة مياه، كما في الصورة الموضَّحة، زي ما إحنا شايفين كده. بنلاقي إن عبوّة المياه دي أكبر من زجاجة المياه المعبّأة. يعني أكبر من واحد لتر. وبالتالي وحدة القياس المناسبة لقياس سعة هذه العبوّة، هتكون اللتر. إذن الوحدة المناسبة هي اللتر.

بعد كده مطلوب مننا تقدير السعة. عشان نقدر نقدّر السعة، عندنا عبوّة المياه هذه أكبر من زجاجة المياه المعبّأة. فبنكتب التقدير: تُقدَّر سعة العبوّة عشرة لتر تقريبًا. مش لازم عشرة بالظبط، ممكن تسعة لتر، ممكن حداشر لتر. بس بتقديرنا تقريبًا هي عشرة لتر، أو رقم مقارب لعشرة لتر.

تاني حاجة عندنا، مطلوب إيجاد الوحدة المناسبة لقياس سعتها، هي كوب عصير. بما أن سعة كوب العصير ده، زي ما إحنا شايفين كده، أكبر من قطرة العين، وأصغر من زجاجة المياه المعبّأة. يبقى الملليمتر هو الوحدة المناسبة لقياس سعة هذا الكوب. يبقى بنكتب كده: الوحدة المناسبة هي الملليلتر.

بعد كده مطلوب تقدير السعة. بنلاقي إن زجاجة المياه المعبّأة، اللي هي تعادل سعتها واحد لتر، بتحتوي تقريبًا على أربع أكواب من العصير. فبنكتب كده: زجاجة المياه المعبّأة بتحتوي تقريبًا على أربع أكواب من العصير. وزجاجة المياه المعبّأة سعتها واحد لتر؛ أيّ تساوي ألف ملليلتر. بنكتب التقدير: سعة الكوب الواحد هتساوي ألف على أربعة. ألف عبارة عن ألف ملليلتر؛ سعة زجاجة المياه المعبّأة. أربعة؛ فهي تحتوي على أربع أكواب من العصير تقريبًا. ناتج القسمة هيكون ميتين وخمسين ملليلتر. يبقى سعة الكوب الواحد عبارة عن ميتين وخمسين ملليلتر تقريبًا.

هنكمّل ونحل مثال آخر. بنكمّل ونقرا المثال التالي: الجدول الموضح يبيّن مكونات عصير الفواكه. فهل مجموع كميتَي عصير الرمان وعصير الفراولة، يزيد عن واحد لتر، أم يقل عنه؟

زي ماحنا شايفين كده، من خلال الجدول التالي. مكونات عصير الفواكه على اليمين، والكمية بالملليلتر على الشمال. بنلاقي إن عصير الفواكه عبارة عن عصير رمان، وعصير فراولة، مضاف إليه ماء. لتحديد مجموع كميتَي عصير الرمان والفراولة، أكبر من واحد لتر أم أقل؛ لازم نوجد مجموع كميتَي عصير الرمان والفراولة. بنلاقي إن كمية عصير الرمان عبارة عن خمسمية وعشرة ملليلتر. وكمية عصير الفراولة تلتمية خمسة وسبعين ملليلتر. وبالتالي مجموعهم هيكون عبارة عن تمنمية خمسة وتمانين ملليلتر.

بنفتكر مع بعض كده، إن الواحد لتر يساوي ألف ملليلتر. يبقى مجموع كميتَي عصير الرمان والفراولة، عبارة عن تمنمية خمسة وتمانين ملليلتر. ولكن اللتر الواحد بيحتوي على ألف ملليلتر. يبقى بنكتب: إذن مجموع كميتَي عصير الرمان والفراولة، يقلّ عن واحد لتر. وده لأن مجموعهم تمنمية خمسة وتمانين ملليلتر. والواحد لتر بيحتوي على ألف ملليتر. وتمنمية خمسة وتمانين أقل من ألف. يبقى مجموع كميتَي عصير الرمان والفراولة فعلًا أقل من واحد لتر.

يبقى في الفيديو ده راجعنا تعريف السعة. واتعرّفنا على الوحدات شائعة الاستخدام لقياس السعة في النظام المتري. وعرفنا إزاي نقدر نحدّد الوحدة المناسبة لقياس سعةٍ ما، وكيفية تقدير السعة، من خلال حل أمثلة توضيحية.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.