فيديو: إكمال جدول الدالة

يوضح الفيديو الدالة، والقيم المدخلة والمخرجة، وكيفية إيجاد قاعدة الدالة وتطبيقها باستخدام جدول الدالة.

٠٣:٥٧

‏نسخة الفيديو النصية

إكمال جدول الدالة.

في الفيديو ده هنتعلم إزاي بنكمّل وبنستخدم جداول الدوال. الدالة هي علاقة بين متغيرين، بتربط بين قيمة مُدخلة وقيمة مُخرجة. وبنستخدم جداول الدوال لتنظيم القيم المُدخلة والمُخرجة. والقيمة المُدخلة هي القيمة اللي بتدخل للدالة، وبنطبّق عليها قاعدة الدالة. وقاعدة الدالة هي عملية أو أكتر بنجريها على القيم المُدخلة. أما القيمة المُخرجة هي القيمة اللي بتخرج من الدالة، بعد إجراء العمليات أو تطبيق قاعدة الدالة على القيم المُدخلة.

تنام الزرافة ساعتين كل يوم. باستخدام جدول الدالة، أوجد كم ساعة تنامها خلال خمسة أيام.

عشان نعرف نعمل جدول الدالة، لازم أول حاجة نحدّد القاعدة بالكلمات. فبما إن الزرافة بتنام ساعتين في اليوم، فبالتالي عدد ساعات نومها هيساوي اتنين في عدد الأيام. تبقى القاعدة بالكلمات هي: عدد الأيام في اتنين. ولو عايزين نعبّر عنها بشكل جبري، فممكن نرمز لعدد الأيام بالرمز م. فهتبقى القاعدة هي اتنين في م، أو اتنين م. بعدين نرسم جدول الدالة بالشكل ده. وفي الجدول المُدخلات، اللي هي عدد الأيام، والمُخرجات هي عدد ساعات النوم.

فهنكتب في المُدخلات عدد الأيام. يوم واحد، ويومين، وتلات أيام، وأربع أيام، وخمس أيام. بعدين نطبّق قاعدة الدالة على كل الأعداد في عمود المُدخلات. فبالنسبة للقيمة المُدخلة الأولى، اللي هي واحد … فبالنسبة للقيمة المُدخلة الأولى، اللي هي واحد، هنطبق قاعدة الدالة. فهتبقى اتنين في واحد. واتنين في واحد بتساوي اتنين. يبقى القيمة المُخرجة الأولى هي اتنين.

بعدين نطبق قاعدة الدالة على القيمة المُدخلة التانية، اللي هي اتنين. فهتبقى اتنين في اتنين. واتنين في اتنين بتساوي أربعة. تبقى القيمة المُخرجة هي أربعة. ونطبق بنفس الطريقة على باقي القيم. وبالتالي من الجدول، هنلاقي إن الزرافة بتنام خلال خمس أيام، عشر ساعات.

تستهلك سيارة لترًا واحدًا من الوقود لقطع مسافة عشرة كيلومترات. أوجد قاعدة الدالة، ثم أوجد المسافة التي تقطعها السيارة إذا استهلكت لتران، وثلاثة لترات، وأربعة لترات.

بما إن السيارة بتستهلك لتر واحد، لقطع مسافة عشرة كيلومترات. هتبقى القاعدة إن عدد الكيلومترات هو عدد اللترات مضروب في عشرة، اللي هو عدد الكيلومترات لكل لتر. ولو رمزنا لعدد اللترات بالرمز ل، فهتبقى القاعدة هي: عشرة في ل، أو عشرة ل. بعدين نرسم جدول الدالة بالشكل ده؛ عشان نقدر نوجد منه المسافة اللي هتقطعها السيارة، إذا استهلكت لترين، أو تلات لترات، أو أربع لترات.

فهنكتب في عمود المُدخلات اتنين وتلاتة وأربعة. هنطبّق القاعدة على القيم المُدخلة الأولى، اللي هي لترين، فهتبقى عشرة في اتنين. فهتبقى القيمة المُخرجة الأولى هي عشرين. ونطبّقها على تلات لترات، فهتبقى عشرة في تلاتة، يعني تلاتين. وهنطبّقها على أربع لترات، فهتبقى عشرة في أربعة، بتساوي أربعين.

تبقى المسافة اللي هتقطعها السيارة، إذا استهلكت لترين، هي عشرين كيلومتر. وإذا استهلكت تلات لترات، هي تلاتين كيلومتر. وإذا استهلكت أربع لترات، هي أربعين كيلومتر.

يبقى في الفيديو ده عرفنا إيه هي الدالة، وإيه هي القيم المُدخلة والقيم المُخرجة. وعرفنا إزاي بنوجد قاعدة الدالة، وإزاي بنطبّقها باستخدام جداول الدوال.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.