تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: عرض وتحليل البيانات باستخدام الرسوم البيانية

أحمد مدحت

يوضح الفيديو كيفية عرض مجموعة من البيانات وتحليلها باستخدام الرسوم البيانية، مع أمثلة توضيحية.

٠٧:٥٢

‏نسخة الفيديو النصية

هنتكلم عن عرض وتحليل البيانات باستخدام الرسوم البيانية.

في الفيديو ده هنتعرف على التمثيل البياني باستخدام الرسوم البيانية، وهنعرف إزاي نعرض ونحلل البيانات باستخدامها.

في الأول هنبدأ نعرف إيه هو الرسم البياني، فهيظهر لنا شكل، الشكل اللي عندنا ده عبارة عن رسم بياني، وهنلاحظ من خلال عنوان الرسم البياني ده إن هو بيعرض بيانات خاصة بالثدييات المهددة بالانقراض، والرسم البياني هو طريقة من طرق التمثيل البياني، وبنستخدمه علشان نوضح تغيّر مجموعة من البيانات مع مرور الزمن. كمان في الرسم البياني بنقدر نوصف اتجاه البيانات، سواء كان بالصعود أو بالهبوط، وده من خلال ملاحظة ميل القطع المستقيمة اللي بتوصّل بين النقط.

بالنسبة للرسم البياني اللي عندنا، فهنلاحظ إن إحنا عندنا محورين؛ محور أفقي بيمثل العام، ومحور رأسي بيمثل عدد الفصائل أو التكرار. كمان هنلاحظ في الرسم البياني اللي عندنا فيه مجموعة من النقط، ومتوصّل بين كل نقطتين بقطعة مستقيمة. وبالنسبة لكل نقطة في الرسم البياني، فهي بتستخدم علشان توضح تكرار؛ بمعنى كل نقطة موجودة على الرسم البياني اللي عندنا بتوضح عدد فصائل الثدييات المهددة بالانقراض خلال السنة اللي بتقابلها. فمثلًا خلال عام ألف تسعمية وتسعين، هنلاقي النقطة اللي بتقابل العام ده هي دي، النقطة دي موجودة على ارتفاع معين، الارتفاع ده بيمثل عدد الفصائل أو التكرار، وعلشان نِوجد ارتفاع النقطة دي هنحدد عدد الفصائل أو التكرار المقابل للنقطة دي على المحور الرأسي، زي ما هيظهر لنا. هنلاحظ إن ارتفاع النقطة دي بيقابل على المحور الرأسي عدد فصائل بيساوي تلاتة وخمسين فصيلة، معنى كده إن عام ألف تسعمية وتسعين عدد فصائل الثدييات المهددة بالانقراض هو تلاتة وخمسين فصيلة. كمان هنلاحظ إن التدريج على المحور الرأسي من صفر لـ سبعين متقسّم على فترات، كل فترة عبارة عن خمسة، لكن بالنسبة للفتره دي، فهنلاحظ إنها من صفر لـ تلاتين، فهنلاقي إن فيه هنا تعرُّج، التعرُّج ده بيدُل على إن المسافة دي مش نفس المسافة بين كل تدريجين متتاليين.

بعد كده هنشوف أمثلة نوضح بيها أكتر، عندنا في المثال جدول بيوضح عدد سكان الأرض من عام ألف سبعمية وخمسين لعام ألفين، وعايزين نستخدم الرسم البياني علشان نمثل البيانات اللي موجودة في الجدول ده، وبعد كده هنوصف التغير في عدد السكان من عام ألف سبعمية وخمسين لعام ألفين.

علشان نمثل البيانات اللي عندنا باستخدام الرسم البياني، فإحنا أول حاجة هنعملها إن إحنا هنرسم المحورين الأفقي والرأسي زي ما هيظهر لنا. بالنسبة للمحور الأفقي، فإحنا هنمثل عليه الأعوام اللي موجودة عندنا في الجدول زي ما هيظهر لنا، بعد كده هنحدد التدريج اللي هيكون موجود على المحور الرأسي، فلما هنرجع للجدول اللي عندنا هنلاقي إن البيانات بتحتوي على أعداد من سبعمية وتسعين مليون، لـ ستّ آلاف وتمانين مليون، وبالتالي من المنطقي إن إحنا نختار تدريج من صفر إلى عشرة آلاف مليون، والفترة هيكون طولها ألف مليون، فهنمثل التدريج على المحور الرأسي زي ما هيظهر لنا.

بعد كده هنكتب العنوان بتاع المحورين الأفقي والرأسي؛ فبالنسبة للمحور الأفقي فهو بيمثل العام، أما المحور الرأسي فبيمثل عدد السكان بالملايين.

الخطوة اللي بعد كده إن إحنا هنمثل عدد السكان في الأعوام المختلفة بالنقط؛ فمثلًا بالنسبة لعام ألف سبعمية وخمسين، كان عدد السكان سبعمية وتسعين مليون، بالتالي لما هنمثل عدد سكان الأرض في عام ألف سبعمية وخمسين، هنمثله بالنقطة دي. بنفس الطريقة هنمثل بقية النقط زي ما هيظهر لنا، بعد كده هنوصل ما بين النقط اللي إحنا حددناها، بعد كده هنكتب عنوان التمثيل البياني اللي عندنا، والعنوان هيبقى عدد سكان الأرض من عام ألف سبعمية وخمسين إلى عام ألفين. بكده هيبقى إحنا استخدمنا الرسم البياني علشان نمثل البيانات اللي موجودة عندنا في الجدول. أما بالنسبة لوسط التغير في عدد السكان من عام ألف سبعمية وخمسين لعام ألفين، فمن خلال الرسم البياني اللي عندنا، وكمان ملاحظة ميل القطع المستقيمة اللي بتوصّل ما بين النقط؛ هنلاحظ إن عدد سكان الأرض زاد زيادة كبيرة من عام ألف سبعمية وخمسين لعام ألفين.

في المثال التاني عندنا رسم بياني بيوضح أعمار مية وعشرين شخص، ومطلوب إن إحنا نكمّل الجدول التكراري اللي عندنا، وكمان عايزين نعرف أي فترة عمرية بتشمل أكبر عدد من الأشخاص.

بالنسبة للرسم البياني اللي عندنا، فهنلاقي المحور الأفقي بيمثل العمر بالسنوات، أما المحور الرأسي فبيمثل التكرار، والتكرار ده يعتبر عدد الأشخاص اللي ليهم نفس العمر. وعلشان نكمل الجدول اللي عندنا، فإحنا هنشوف النقطة المقابلة لكل عمر موجود عندنا على المحور الأفقي، ونحدد التكرار المقابل ليها على المحور الرأسي. فمثلًا بالنسبة للعمر لما يبقى خمس سنوات، هتبقى هي دي النقطة المقابلة لعمر خمس سنوات، فهنلاقي التكرار المقابل ليها على المحور الرأسي هو عشرة، معنى كده إن فيه عشر أشخاص من الـ مية وعشرين شخص عمرهم خمس سنوات، وبالتالى التكرار لما يبقى العمر خمس سنوات هو عشرة.

أما بالنسبة للعمر لما يبقى عشر سنوات، هتبقى هي دي النقطة المقابلة للعمر ده، فهنلاقي التكرار المقابل ليها هو تلاتين، معنى كده إن في تلاتين شخص من الـ مية وعشرين شخص عمرهم عشر سنوات؛ بالتالي التكرار لما يبقى العمر عشر سنوات هو تلاتين. بنفس الطريقة هنكمل بقية الجدول زي ما هيظهر لنا.

بعد ما كملنا الجدول هنِوجد المجموع بتاع التكرارات اللي عندنا، فلما هنجمع عشرة زائد تلاتين زائد خمسة وعشرين زائد خمسة وتلاتين زائد عشرين، هنلاقي إن المجموع هو مية وعشرين؛ وده منظقي لأن الرسم البياني بيوضح أعمار مية وعشرين شخص، بالتالي هيبقى مجموع التكرارات بتاع الفترات العمرية اللي عندنا هيبقى مية وعشرين.

بالنسبة للمطلوب التاني، فإحنا عايزين نحدد الفترة العمرية اللي بتشمل أكبر عدد من الأشخاص، ودي هتبقى الفترة العمرية اللي ليها أكبر تكرار، وهتبقي هي الفترة العمرية اللي بتقابل النقطة صاحبة أكبر ارتفاع. فمن خلال الرسم البياني اللي عندنا هنلاقي النقطة صاحبة أكبر ارتفاع هي النقطة دي، وإن التكرار المقابل ليها هو خمسة وتلاتين، فهنلاقي الفترة العمرية المقابلة للنقطة دي على المحور الأفقي هي عشرين سنة؛ معنى كده إن الفترة العمرية اللي بتشمل أكبر عدد من الأشخاص هي عشرين سنة، وعدد الأشخاص هو خمسة وتلاتين شخص، وده اللي بيأكده الجدول التكراري اللي إحنا كملناه، فهنلاقي إن أكبر تكرار هو خمسة وتلاتين، وده بيقابل العمر اللي هو عشرين سنة.

بعد كده هنشوف مثال كمان، عندنا في المثال رسم بياني بيوضح مساحة الأراضي المزروعة بالفدان في دولة ما من عام ألفين وواحد لعام ألفين وخمسة، وعايزين نعرف هل مساحة الأراضي المزروعة نقصت خلال الفترة الزمنية دي ولا لأة. لما هنرجع للرسم البياني اللي عندنا، هنلاحظ إن ارتفاع النقطة دي، واللي بتمثل مساحة الأراضي المزروعة بالفدان عام ألفين وخمسة، أكبر من ارتفاع النقطة دي، واللي بتمثل مساحة الأراضي المزروعة بالفدان عام ألفين وواحد؛ ده معناه إن مساحة الأراضي المزروعة عام ألفين وخمسة أكبر من مساحة الأرض المزروعة عام ألفين وواحد. فمن خلال الرسم البياني اللي عندنا، هنلاحظ إن مساحة الأراضي المزروعة في عام ألفين وواحد حوالي ست آلاف مية وخمسين فدان، أما مساحة الأراضي المزروعة في عام ألفين وخمسة فهتبقى حوالي ست آلاف ستمية وخمسين فدان. فهنلاحظ إن مساحة الأراضي المزروعة من عام ألفين وواحد لعام ألفين وخمسة زادت حوالي خمسمية فدان؛ بالتالي هتبقى الإجابة بتاعتنا هي لا؛ وده لأن المساحة بتاعة الأرض المزروعة ما نقصتش، بل بالعكس زادت.

بكده يبقى إحنا في الفيديو ده عرفنا إن الرسم البياني طريقة من طرق التمثيل البياني، بنستخدمه علشان نوضح تغيُّر مجموعة من البيانات مع مرور الزمن، وكمان عرفنا إزاي نعرض ونحلل البيانات باستخدام الرسوم البيانية.