تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: ضرب الكسور

سوزان فائق

يوضِّح الفيديو ضرب الكسور، وضرب الكسر في عدد صحيح.

٠٤:١٤

‏نسخة الفيديو النصية

في الفيديو ده هنتكلّم على ضرب الكسور.

لضرب كسرين بنضرب البسطين في المقامين. يعني لو عندنا خُمسين هنضربهم في نُصّ هيساوي … هنضرب البسطين اللي هم اتنين في واحد، والمقامين اللي هم خمسة في اتنين. يبقى الناتج هيبقى … عندنا البسط اتنين في واحد باتنين. وخمسة في اتنين بعشرة. نختصرها هتبقى واحد على خمسة.

يعني لو عندنا أ على ب، في ج على د. هنضرب أ في ج، والـ ب في د. ونبقى الـ ب والـ د لا يساويَا صفر. ناخد مثال.

اوجد ناتج: تُلت في ربع.

هيساوي … البسطين واحد في واحد. المقامين تلاتة في أربعة. يبقى واحد عَ الاتناشر.

يبقى لو رسمناه بالنماذج التُّلت … أهو التُّلت. والربع … ده الربع. وده التُّلت. يبقى نقطة التقاطع ما بينهم اللي هي حاصل الضرب اللي هي واحد على اتناشر. نقلب الصفحة ونشوف إزاي هنضرب الكسور في أعداد صحيحة.

لضرب كسر في عدد صحيح اكتب العدد الصحيح في صورة كسر في الأول. يعني لو عندنا تلاتة على خمسة، في أربعة؛ هتساوي … هنخلّي الأربعة في صورة كسر. يعني هتبقى التلاتة على خمسة، في أربعة على واحد. تساوي … نضرب البسطين تلاتة في أربعة. وخمسة في واحد. يبقى اتناشر على خمسة. بالتبسيط هتبقى اتنين وخُمسين.

لو عملناها بصورة النماذج. يعني التلاتة على خمسة اللي هي دي، هتتكرّر أربع مرات. يبقى هنا اتكرّرت أربع مرات. اللي هي هتمثّل اتناشر وحدة اللي هي مغمّقينها بالأسود دي. على خمسة اللي هو عدد الوحدات الكسرية. ناخد مثال كمان.

اوجد ناتج: تلاتة على أربعة، في خمسة على ستة.

يعني تلاتة على أربعة، في خمسة على ستة هتساوي … لو لقينا عامل مشترك ما بين الكسرين، نقدر نختصرهم مع بعض. يعني البسط اللي هو التلاتة مع الستة في المقام فيه بينهم عامل مشترك. نقدر نختصرهم مع بعض، يبقى التلاتة مع الستة هيتبقّى اتنين. يبقى البسط عندي هنا التلاتة بقت واحد. واحد في خمسة، على أربعة في اتنين؛ هتساوي خمسة على تمنية.

يبقى معنى كده لو عندنا عوامل مشتركة ما بين البسط والمقام في الكسرين. نقدر نختصرهم مع بعض قبل ما نبدأ عملية الضرب.

مثال كمان بيقول إذا كانت أ تساوي تُلتين، وَ ب تساوي تلات أتمان؛ احسب قيمة أ ب.

يعني أ مضروبة في الـ ب هتساوي اتنين على تلاتة، في تلاتة على تمنية. هنضرب البسطين في المقامين. بس قبل ما نبدأ عملية الضرب نشوف هل فيه عوامل مشتركة ولّا لأة. هنلاقي إن التلاتة ممكن نختصرها مع التلاتة، هيتبقّى واحد، وواحد. والاتنين ممكن نختصرها مع التمنية، هنا هيتبقّى واحد، وهنا هيتبقّى أربعة. نضرب البسطين في المقامين هيبقى واحد على أربعة.

يبقى اتكلّمنا في الفيديو ده إزاي نضرب كسرين. إزاي نضرب كسر في عدد صحيح، وإزاي نختصر قبل ما نعمل عملية الضرب.