فيديو: قصص الجمع

يوضِّح الفيديو مفهوم الجمع للأشياء باستخدام سيناريوهات مصورة متعددة.

٠٣:٤٥

‏نسخة الفيديو النصية

قصص الجمع.

هنتعلم في الدرس ده إزاي من خلال الصور، وباستخدام العدّ، نفهم يعني إيه مفهوم الجمع.

لو بصينا عَ الصورة اللي قدامنا، هنلاقي طائرين طايرين في السما مع بعض. وفي الاتجاه الآخَر فيه طائر طاير لوحده، وبيقرّب منهم. يا ترى مجموعة الطيور اللي قدامنا مع بعض دلوقتي، لمّا يتجمعوا، هيبقوا كام طائر؟ الفكرة إن هم كانوا اتنين. جمعنا عليهم واحد كمان، أو ضِفنا لهم، أو زوّدنا لهم واحد كمان. عشان نقدر نعرف هما كام طائر دلوقتي، هنعدّ مع بعض. واحد، اتنين، تلاتة. كده بقى عندنا الطيور دي لو اتجمعت مع بعض، هيبقى عندنا تلات طيور.

هنجيب صفحة جديدة، ونشوف مثال تاني. في الصورة اللي قدامنا فيه حديقة، كان فيها المجموعة دي من الفراشات. وبعدين زادت الفراشات، ولقينا مجموعة تانية من الفراشات بتقرّب من الحديقة. يا ترى الحديقة دلوقتي بقى فيها كام فراشة؟ كان الأول فيه أربعة. زوّدنا عليهم، أو ضِفنا لهم المجموعة التانية، اللي هي عبارة عن فراشتين. يا ترى كل الفراشات هيبقى عددهم كام؟ دي هي عملية الجمع. عايزين نعدّ؛ عشان نعرف كل الفراشات اللي دلوقتي هيبقوا في الحديقة، هيبقوا كام. هنبتدي نعدّ. واحد، اتنين، تلاتة، أربعة، خمسة، ستة. كده بقى عندنا ست فراشات في الحديقة.

هنجيب صفحة جديدة، نشوف كمان مثال. لو بصّينا عَ الصورة اللي قدامنا دي، هنلاقي إن فيه مجموعة من الطيور متجمّعة عند أحد الأشجار. وفيه مجموعة أخرى من الطيور جايّة تنضمّ ليهم عند نفس الشجرة. دلوقتي عايزين نعرف فيه طيور قدّ إيه هتبقى موجودة عند الشجرة دي. يعني دلوقتي كان عندنا مجموعة، زوّدنا عليهم مجموعة تانية. عايزين نعرف عدد الطيور الكلي هيبقى كام. هنبتدي نعدّ؛ عشان نشوف المجموع بتاع الطيور دي كلها لمّا تبقى مع بعض. هيبقى عندنا: واحد، اتنين، تلاتة، أربعة، خمسة، ستة، سبعة، تمنية. كده هيبقى عندنا … كده هيبقى عندنا تمن طيور متجمّعين عند الشجرة دي.

هنجيب صفحة جديدة، ونشوف مثال كمان. لو بصينا عَ الصورة اللي قدامنا دي، هنلاقي فيه مجموعتين من البط بيسبحوا في البحيرة. المجموعة الأولى أهي. والمجموعة التانية أهي. لو عايزين نعرف عدد البط كله اللي بيسبح في البحيرة، هنضيف المجموعتين على بعض. ونبدأ نعدّ البط اللي موجود في المجموعتين. هنبتدي نشوف. واحد، اتنين، تلاتة، أربعة، خمسة، ستة. كده بقى عندنا عدد ستة من البط موجود في البحيرة.

كده اتعرّفنا على مفهوم الجمع. وإزاي إن إحنا بنضُمّ مجموعتين على بعض، ونجيب العدد اللي موجود في المجموعتين مع بعض. هي دي فكرة الجمع.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.