فيديو: حساب مقاومة موصِّل

قُطْر سلك من الألومنيوم يساوي 10mm. أوجد مقاومة قطعة طولها 0.56km من هذا السلك تُستخدم في خطوط نقل الكهرباء. استخدِم القيمة ‎2.65 × 10^−8Ω.m للمقاومة النوعية للألومنيوم.

٠٢:١٩

‏نسخة الفيديو النصية

قطر سلك من الألمونيوم يساوي عشرة ملليمتر. أوجد مقاومة قطعة طولها ستة وخمسين من المية كيلومتر من هذا السلك، تُستخدم في خطوط نقل الكهرباء. استخدم القيمة اتنين وخمسة وستين من المية في عشرة أُس سالب تمنية أوم متر للمقاومة النوعية للألومنيوم.

ففيه قطعة سلك من الألومنيوم قطرها بيساوي عشرة ملليمتر. وطولها بيساوي ستة وخمسين من المية كيلومتر. والمقاومة النوعية للألومنيوم بتساوي اتنين وخمسة وستين من المية في عشرة أُس سالب تمنية أوم متر. والمطلوب منّنا إن إحنا نعرف مقاومة القطعة دي بكام.

ومقاومة السلك دي هي قيمة بتعبّر عن مقاومة السلك إن يمشي فيه تيار. وده بيبقى نتيجة جزيئات السلك الثابتة اللي بتعارض سريان الإلكترونات اللي بتؤدّي إن يبقى فيه تيار ماشي.

فمثلًا لو جِبنا سلك من نفس المادة، ولكن مساحة مقطعه أكبر. هنلاقي إن مساحة المقطع الأكبر دي سمحت لإلكترونات أكتر تمشي. وده معناه إن مقاومة السلك لأن تيار يمشي فيه قَلِّت. فنقدر كده نقول إن المقاومة بتاعة السلك بتتناسب عكسيًّا مع المساحة.

أمّا لو جِبنا سلك من نفس المادة، ولكن أطول. هنلاقي إن الإلكترونات خبطت في جزيئات ثابتة أكتر، وبالتالي هنلاقي إن مقاومة السلك للتيار زادت. وده معناه إن مقاومة السلك بتتناسب طرديًّا مع طوله.

فممكن من العلاقات التناسبية دي نقول إن مقاومة السلك بتساوي ثابت ما، مضروب في طول السلك، مقسوم على مساحة مقطع السلك. والثابت ده اسمه المقاومة النوعية، وقيمته بتختلف مع اختلاف المواد.

وبما إن مقطع السلك هو عبارة عن دايرة. فنقدر نعوّض مكان مساحة مقطع السلك بمساحة الدايرة؛ واللي بتساوي 𝜋 في، القطر مقسوم على اتنين تربيع.

ونقدر دلوقتي نعوّض بالقيم. ونطلّع إن المقاومة بتساوي المقاومة النوعية، اللي بتساوي اتنين وخمسة وستين من المية في عشرة أُس سالب تمنية أوم متر. مضروبة في طول السلك، اللي هو ستة وخمسين من المية كيلومتر. مقسوم على 𝜋، مضروب في قطر السلك على اتنين تربيع؛ اللي هي عشرة ملليمتر على اتنين تربيع.

ولمّا نعوّض مكان الكيلومتر بعشرة أُس تلاتة متر، والملليمتر بعشرة أُس سالب تلاتة متر. هنقدر نختصر المتر في المتر، مع المتر مربع اللي في المقام. ونطلّع إن قيمة المقاومة بتساوي تسعتاشر من المية أوم.

وبكده نبقى عرفنا نطلّع مقاومة قطعة من السلك؛ بمعرفة أبعاد القطعة، والمقاومة النوعية لمادة السلك.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.