تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: عرض وتحليل وقراءة البيانات باستخدام الرسم الخطي

أحمد مدحت

يوضح الفيديو كيفية عرض البيانات وتحليلها وقراءتها باستخدام الرسم الخطي، مع أمثلة توضيحية.

٠٦:٠٢

‏نسخة الفيديو النصية

هنتكلم عن عرض وتحليل وقراءة البيانات باستخدام الرسم الخطي.

في الفيديو ده هنعرف إيه هو الرسم الخطي، وكمان هنعرف إزاي نستخدمه علشان نعرض ونحلل ونقرا البيانات من خلاله. فبالنسبة للرسم الخطي هو عبارة عن شكل بيوضّح تكرار البيانات على خط الأعداد. وده من خلال إن إحنا بنحط علامة زي دي فوق كل عدد من أعداد البيانات على خط الأعداد. وده في كل مرة بيظهر فيها العدد ده.

بمعنى لو إحنا عندنا مجموعة من البيانات وعايزين نمثّلها باستخدام الرسم الخطي. فأول حاجة هنعملها إن إحنا هنرسم خط أعداد. بعد كده هنشوف كل عدد موجود في البيانات ونحط العلامة دي فوقيه على خط الأعداد. ولو اتكرر العدد ده مرة كمان بنحط فوق العلامة علامة تانية زيها، وهكذا في كل مرة لو اتكرر العدد تاني. هنوضّح أكتر إزاي نعرض مجموعة من البيانات باستخدام الرسم الخطي من خلال مثال.

عندنا في المثال جدول بيوضح متوسط العمر المتوقّع لعدد من الحيوانات بالسنوات. وعايزين نمثل البيانات دي باستخدام الرسم الخطي. علشان نمثل البيانات اللي عندنا باستخدام الرسم الخطي، فأول حاجة هنعملها إن إحنا هنرسم خط أعداد. ومن خلال الجدول اللي عندنا هنلاقي إن أصغر قيمة في البيانات هي تلات سنوات، وأكبر قيمة هي عشرين سنة.

وبالتالي لمّا هنرسم خط الأعداد هيبقى التدريج بتاعه من صفر لعشرين زي ما هيظهر لنا. بعد ما رسمنا خط الأعداد هنبدأ نحط العلامة دي فوق كل عدد بيمثّل متوسط العمر المتوقّع لكل حيوان.

فبالنسبة للدُّب الأسود هنلاقي إن متوسط العمر المتوقّع ليه هو تمنتاشر سنة. والعدد تمنتاشر على خط الأعداد مكانه هنا. فهنحط فوق العدد تمنتاشر على خط الأعداد علامة. أما متوسط العمر المتوقع للقط فهو اتناشر سنة. والعدد اتناشر على خط الأعداد هنا. وبالتالي هنحط علامة فوق العدد اتناشر. بعد كده متوسط العمر المتوقع للبقرة هو خمستاشر سنة. والعدد خمستاشر على خط الأعداد أهو، هنحط فوقيه علامة.

أما الزرافة فهنلاقي متوسط العمر المتوقّع ليها هو عشر سنوات. والعدد عشرة على خط الأعداد أهو، هنحط فوقيه علامة. بعد كده الحصان متوسط العمر المتوقع ليه هو عشرين سنة. العدد عشرين على خط الأعداد أهو، هنحط فوقيه علامة. بعد كده الفهد، فهنلاقي متوسط العمر المتوقع هو اتناشر سنة. والعدد اتناشر هنا هنلاحظ إن فيه علامة موجودة على العدد اتناشر قبل كده، لكنه اتكرر تاني في مجموعة البيانات. فهنحط علامة تانية فوق العلامة الأولى.

بعد كده متوسط العمر المتوقّع للأسد هنلاقيه خمستاشر سنة. والعدد خمستاشر على خط الأعداد هنلاقي فوقيه علامة. فهنحط علامة تانية فوق العلامة اللي موجودة. بعد كده متوسط العمر المتوقّع للفار هنلاقيه تلات سنوات. والعدد تلاتة على خط الأعداد هيبقى هنا، هنحط فوقيه علامة. بعد كده الأرنب هنلاقي إن متوسط العمر المتوقّع للأرنب هو خمس سنوات. والعدد خمسة على خط الأعداد أهو، هنحط فوقيه علامة.

بكده هيبقى إحنا مثلنا البيانات اللي موجودة عندنا في الجدول باستخدام الرسم الخطي. فبعد كده هنكتب عنوان للتمثيل اللي عندنا. فالعنوان هيبقى متوسط العمر المتوقَّع لعدد من الحيوانات بالسنوات.

هنلاحظ من خلال المثال ده إن التمثيل باستخدام الرسم الخطي بيسهّل علينا إن إحنا نحدّد عدد البيانات لنوع معيّن. فمثلًا عدد الحيوانات اللي متوسط عمرها المتوقّع هو خمستاشر سنة هيبقى اتنين. وده لأن إحنا عندنا علامتين فوق العدد خمستاشر على خط الأعداد. وده بيقابل التكرار بتاع القيم اللي موجودة عندنا في الجدول. فهنلاقي فعلًا إن متوسط العمر المتوقّع لكل من البقرة والأسد هو خمستاشر سنة.

كمان الرسم الخطي بيساعدنا على تحليل توزيع البيانات، أو بمعنى تاني معرفة طريقة تجمُّعها أو انتشارها بسهولة. فهنشوف مثال نعرف بيه إزاي نحلل البيانات اللي متمثِّلة بالرسم الخطي.

عندنا في المثال رسم خطي بيعرض درجات طلاب في اختبار مادة الرياضيات. وعندنا تلات مطاليب. في المطلوب أ عايزين نعرف عدد الطلاب الحاصلين على تمن درجات. وفي المطلوب ب عايزين نعرف الفرق بين أصغر وأكبر درجة من خلال الرسم الخطي. وفي المطلوب ج عايزين نعرف كام طالب كانت نتايجهم أقل من عشر درجات.

هنبدأ بالمطلوب أ. في المطلوب أ عايزين نعرف عدد الطلاب الحاصلين على تمن درجات.

بالنسبة للرسم الخطي اللي عندنا، القيم اللي على خط الأعداد دي بتعبّر عن درجات الطلاب. وكل إشارة أو علامة موجودة بتوضّح إن فيه طالب حصل على الدرجة اللي موجودة تحتيه على خط الأعداد. وعلشان كده هيبقى عدد الطلاب الحاصلين على تمن درجات هو عدد الإشارات اللي موجودة فوق العدد تمنية على خط الأعداد. والعدد تمنية على خط الأعداد أهو، هنلاقي فوقيه خمس علامات. معنى كده إن هيبقى عدد الطلاب الحاصلين على تمن درجات هو خمس طلاب.

بعد كده هنشوف المطلوب ب. في المطلوب ب عايزين نعرف الفرق بين أصغر وأكبر درجة من خلال الرسم الخطي اللي عندنا.

من خلال الرسم الخطي هنلاقي إن أقل درجة هي اتنين. وأكبر درجة هي أربعتاشر. بكده الفرق يساوي أربعتاشر ناقص اتنين. يعني يساوي اتناشر درجة.

بعد كده هنشوف المطلوب ج. في المطلوب ج عايزين نعرف كم طالب كانت نتايجهم أقل من عشر درجات.

بالنسبة لعدد الطلاب اللي نتائجهم أقل من عشرة درجات، فهو هيساوي عدد العلامات اللي فوق الأعداد الأقل من عشرة على خط الأعداد. فلمّا هنعدّ العلامات اللي فوق الأعداد الأقل من عشرة على خط الأعداد. هنلاقي فيه أربعتاشر علامة. بكده هيبقى عدد الطلاب اللي نتايجهم أقل من عشر درجات هو أربعتاشر طالب.

بكده يبقى إحنا في الفيديو ده عرفنا إن الرسم الخطي عبارة عن شكل بيوضّح تكرار البيانات على خط الأعداد. وده من خلال إن إحنا بنحُطّ علامة فوق كل عدد من أعداد البيانات على خط الأعداد. وده في كل مرة بيظهر العدد ده في مجموعة البيانات. بعد كده وضّحنا إزاي نعرض ونحلِّل ونقرا البيانات من خلال الرسم الخطي.