تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: تقريب الأعداد الصحيحة

سوزان فائق

يوضح الفيديو كيفية تقريب الأعداد الصحيحة.

٠٦:٢٤

‏نسخة الفيديو النصية

في الفيديو ده هنتكلّم عن تقريب الأعداد الصحيحة. إزّاي أقرّب الأعداد الصحيحة؟ لو عندي رقم سبعتاشر ألف خمسمية أربعة وخمسين، عايزين نقرّبه لأقرب آلاف. ليه؟ لأن أوقات بنبقى مش محتاجين الرقم بالظبط، بنبقى محتاجين بس التقريب بتاعه.

طيب يعني إيه أقرّب للآلاف؟ الرقم ده رابع رقم، رابع خانة. بنسميه الآحاد بتاعة الآلاف. دي جات منين؟ أول تلاتة دول بنسميهم الوحدات. يعني أيّ واحدة فيهم، بناخد واحدة منها بس. يعني الأربعة دي، الآحاد بتاعة الوحدات. الخمسة دي، بتبقى العشرات بتاعة الوحدات. والخمسة دي، المئات بتاعة الوحدات.

بنبدأ بعد كده، بعد ما نخلّص التلاتة دول، بنعدّ بعد كده الألوف. أول خانة فيها دي بنسميها الآحاد بتاعة الألوف. يعني السبعة دي، بنقول واحدة ألف؛ يعني سبع آلاف. والواحد دي، بتبقى العشرة، يعني العشرات؛ يعني دي سبعتاشر ألف.

طيب عايزين نقرّب الرقم ده، لأقرب آلاف، يعني الرقم ده. طيب أقرب آلاف ده احتمال يبقى رقم أصغر أو رقم أكبر. يعني يبقى أصغر من السبعتاشر ألف خمسمية أربعة وخمسين، هيبقى السبعتاشر ألف. وأكبر إن أنا أزوّد السبعتاشر دي واحد، يعني تمنتاشر ألف. دي الألف اللي بعدها. يعني الألف الأصغر والألف الأكبر.

يبقى لمّا يقول لنا عايز أقرّب للآلاف. يبقى إحنا هنشوف الخانة بتاعة الآلاف، الآحاد بتاعة الآلاف. وهنخلّيها يا إمّا أصغر من الرقم، على الخانة رقم سبعة، فيبقى السبعتاشر ألف. أو إنها تبقى تمنتاشر ألف للرقم الأكبر.

ده على أساس إيه؟ على أساس إن إحنا هنشوف الآلاف دي هنقف عندها. وننزل خانة تحت، يعني هنقف عند خانة المئات. طيب خانة المئات دي، لو لقيناها أكبر من أربعة، يعني أكبر من أربعة؛ يبقى أنا هاخد الرقم اللي أكبر من السبعتاشر. يعني هاخد الرقم الكبير … هاخد الرقم الكبير.

طيب يعني لو الرقم عندي في المئات: خمسة، ستة، سبعة، تمنية، تسعة؛ يبقى هاخد الرقم الأكبر من السبعتاشر ألف. طيب لو كان أصغر من الأربعة؛ يعني: تلاتة، أو أربعة، أو اتنين، أو واحد، أو صفر … يعني هيبقى الأربعة في ما أصغر، هناخد السبعتاشر ألف. هناخد الصغير.

نقول مثال. لو عندنا رقم تسعمية سبعة وعشرين. عايزين نقرّبه لأقرب عشرة. هنشوف العشرة فين هنا. الخانة بتاعة العشرة هي الاتنين. طيب يبقى أنا أقرب عشرة، يا إمّا تسعمية وعشرين، اللي هي أقل من تسعمية سبعة وعشرين. أو تسعمية … إيه اللي أكبر مِ الاتنين؟ هتبقى التلاتة. يبقى تسعمية وتلاتين.

يبقى أنا يا إمّا هقرّب تسعمية وعشرين، أو تسعمية وتلاتين. هنحدّدها إزّاي؟ إن إحنا نبصّ عَ الخانة الأقل. هنلاقي فيها سبعة. والسبعة دي أكبر من الأربعة. يبقى هنخلّي الرقم الأكبر. الرقم الأكبر عندي هنا كام؟ تسعمية وتلاتين. يبقى تسعمية سبعة وعشرين هقرّبها، هتبقى تسعمية وتلاتين. وهي دي الإجابة المطلوبة.

نقلب الصفحة وناخد مثال كمان. عندنا عدد تلاتة وأربعين ألف اتنين وتلاتين. عايزين نقرّبه لأقرب عشر آلاف. هنعمل إيه؟ أول حاجة نقسّم الرقم. هنشوف الوحدات، والألوف. والألوف هنلاقيها فيها آحاد، وبعدين عشرات. وهو عايز يقرّب للعشرة آلاف. يعني عايز الأربعة دي، تبقى الصغيرة، يعني تبقى الرقم أربعين ألف … هنكمّل أصفار. أو خمسين ألف، بإننا أكبّره.

طيب هناخد الأربعين ألف ولّا الخمسين ألف؟ هنبصّ عَ التلاتة، اللي هي في الخانة اللي قبلها على طول. هنلاقيها إيه؟ التلاتة هتبقى أصغر من الأربعة. يبقى هناخد الرقم الأصغر. اللي هو عندي هنا كام؟ أربعين ألف. ويبقى هو ده الحل بتاعي. طب لو كانت التلاتة دي مكانها سبعة؟ يبقى هناخد الرقم الأكبر، اللي هو الخمسين ألف. وهي دي تبقى الإجابة بتاعته.

عايزين نقرّب العدد مليون سبعمية وتسعة ألف ربعمية خمسة وتمانين، لأقرب مليون. هنقسّم الخانات بتاعتنا. أول تلاتة بنسميهم الوحدات. وعبارة عن آحاد، عشرات، مئات. تاني مجموعة هتبقى الألوف. آحاد، عشرات، مئات. وبعد كده الملايين. ده أول مليون، الآحاد بتاع المليون. إحنا عايزين نقرّب لأول مليون.

طيب يا إمّا هتبقى المليون دي زي ما هي، يعني هتبقى واحد، وبعدين ست أصفار. أو إنها تبقى اتنين، وبعدين ست أصفار. طيب هناخد المليون، ولّا اتنين مليون؟ هنشوف الرقم اللي قبلها على طول، الخانة اللي قبلها. اللي هي هتبقى عندي هنا مئات الألوف. مئات الألوف فيها سبعة. والسبعة أكبر من الأربعة. يبقى إحنا هناخد الرقم الأكبر. والرقم الأكبر عندنا هنا هو هيبقى الاتنين مليون، وهو ده الحل بتاعنا.

يبقى لمّا يجيب لنا رقم، عايزين نقرّبه. هنشوف الخانة بتاعة الرقم ده فين. وهناخد الخانة اللي قبلها على طول، نقارنها بينها وبين الأربعة. لو كانت تساوي أربعة أو أقل، هناخد القيمة الصغيرة في التقريب. لو كانت لا تساوي الأربعة، بس أكبر، يبقى هناخد الرقم الأكبر في التقريب.