فيديو: مقارنة طولَي عنصرين بطريقة غير مباشرة باستخدام عنصر ثالث

أكمل العبارات التالية بأطول أو أقصر. الأرنب _ من ٨ مكعبات. الجزرة _ من ٨ مكعبات. الأرنب _ من الجزرة

٠٣:٢٢

‏نسخة الفيديو النصية

أكمل العبارات التالية بأطوَل أو أقصَر: الأرنب نقط من تمن مكعبات. الجزرة نقط من تمن مكعبات. الأرنب نقط من الجزرة.

عاوزين نكمّل التلات عبارات اللي قدامنا دول. بس هنكمّلهم بكلمتين اتنين بس؛ يا كلمة أطوَل، يا كلمة أقصَر. أول عبارة عندنا بتقول لنا إيه؟ الأرنب نقط من تمن مكعبات. آدي الأرنب، وآدي التمن مكعبات. الأرنب أطوَل منهم ولّا أقصَر؟

الخط المنقّط ده جايب آخِر الأرنب، الأرنب مش معدّيه. يعني الجزء ده كده هو طول الأرنب. طيب وبالنسبة لأن ده هو طول التمن مكعبات، ولسّه ناقص جزء اللي هو هنا ده؛ علشان نوصل لطول الإيه؟ الأرنب. فده معناه إيه؟ ده معناه إن الأرنب أطوَل من التمن مكعبات. يبقى لمّا نيجي نكمّل العبارة بأطوَل أو أقصَر، نختار كلمة أطوَل من التمن مكعبات. لأن التمن مكعبات آخرهم هنا، والأرنب آخره فوقيهم هنا.

ده بالنسبة لأول جزء من السؤال. نيجي لتاني جزء: الجزرة نقط من تمن مكعبات. آدي الجزرة أهي، والتمن مكعبات أهي. الجزرة أطوَل ولّا أقصَر من التمن مكعبات؟ ده الخط اللي الجزرة مش بتعدّيه. وده معناه إن ده كده هو طول الجزرة؛ من أول هنا، لحدّ هنا. أمّا بالنسبة للتمن مكعبات، فأولهم هنا، وبيخلصوا هنا، فوق خط الجزرة. فده معناه إن الجزرة أقصَر من التمن مكعبات. لأن التمن مكعبات آخرهم هنا، وتحتهم آخر الجزرة هنا. يبقى ده معناه إن الجزرة أقصَر من تمن مكعبات.

كده إحنا كمّلنا أول جزئين في السؤال. نكمّل الجزء التالت: الأرنب نقط من الجذر. إحنا قلنا إن الأرنب طويل، أطوَل من التمن مكعبات. والجزرة قصيرة، أقصَر من التمن مكعبات. فده معناه إن الأرنب إيه؟ الأرنب ما دام هو الطويل، فهو أطوَل من الجزرة.

تاني؛ إحنا قلنا الأرنب أطوَل من تمن مكعبات، يعني حوالي تسع مكعبات أو عشرة. والجزرة أقصَر من تمن مكعبات، يعني حوالي سبع مكعبات. طب لمّا قلنا الأرنب حوالي تسعة أو عشرة. قولوا تسعة. والجزرة حوالي سبعة. يبقى مين الطويل؟ الأرنب؛ لأن التسعة أكبر من السبعة. فده معناه إن الأرنب أطوَل من الجزرة.

وبكده نكون جاوبنا على أجزاء السؤال التلاتة. أول جزء إجابته: أطوَل. وتاني جزء إجابته: أقصَر. والتالت إجابته: أطوَل.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.