تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: طرح عددين حتى ٩٩٩

غادة عليوة

اطرح ١٨٨ من ٧٥٣.

٠٢:٢٨

‏نسخة الفيديو النصية

اطرح مية تمنية وتمانين من سبعمية تلاتة وخمسين.

مطلوب مننا نطرح العدد مية تمنية وتمانين من العدد سبعمية تلاتة وخمسين. الجملة دي لمّا نيجي نصيغها على شكل جملة طرح. بنبدأ بالعدد اللي بعد كلمة «من» لأن هو ده العدد الأكبر. وبعدين بنحط علامة الطرح. وبعدين بنحط العدد المراد طرحه اللي هو مية تمنية وتمانين. وبعدين بنحط علامة التساوي عشان عايزين نوجد دلوقتي ناتج عملية الطرح.

هنبتدي نُجري عملية الطرح اللي عندنا رأسيًّا. بنبدأ بالعدد الأكبر اللي هو سبعمية تلاتة وخمسين. بنكتبه الأول ونتأكد إن كل رقم من الأرقام اللي بيتكوِّن منها محطوط في الخانة المكانية الصحيحة. وبعدين بنحط علامة الطرح. وبعدين بنحط العدد الأصغر اللي هو مية تمنية وتمانين، وكل رقم فيه برضو نتأكد إنه موجود في الخانة المكانية الصحيحة. وبعدين نبدأ نجري عملية الطرح، وبنبدأ دايمًا من خانة الآحاد.

نبتدي نطرح تلاتة ناقص تمنية، مش هنقدر نطرح تمنية من تلاتة عشان التمنية أكبر من التلاتة. فهنروح للخانه المكانية اللي قبلها اللي هي خانة العشرات، نشوف إيه الرقم اللي فيها، كان فيها الرقم خمسة. هناخد من الخمسة دي واحد اللي هو هيمثِّل عشرة لمّا نوديه لخانة الآحاد، وهيتبقى في خانة العشرات أربعة. فيبقى دلوقتي خانة الآحاد جيبنالها عشرة وكان فيها تلاتة، فكده أصبح فيها تلتاشر. فدلوقتي هنطرح تلتاشر ناقص تمنية. هيبقى ناتج الطرح خمسة.

دلوقتي هنيجي الخانة المكانية بتاعة العشرات ونطرح. أربعة ناقص تمنية مش هينفع نطرح التمنية من الأربعة عشان التمنية أكبر من الأربعة. دلوقتي هنشوف خانة المئات فيها الرقم كام. هنلاقي فيها الرقم سبعة. هناخد منه واحد، فهيصبح دلوقتي فيها الرقم ستة. والواحد ده لمّا يروح خانة العشرات هيكافئ عشرة. طب عشرة والخانة دي كان فيها أربعة، فهيصبح فيها دلوقتي أربعتاشر. دلوقتي نقدر نطرح أربعتاشر ناقص تمنية. ناتج الطرح هيبقى ستة. ونطرح بقى الأرقام اللي موجودة في خانة المئات. هيبقى ستة ناقص واحد هيساوي خمسة. وبكده يبقى أوجدنا ناتج عملية الطرح المطلوب، وهو خمسمية خمسة وستين.