تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: طرح العشرات

معاذ صالح

يوضح الفيديو كيفية استخدام حقائق الطرح لطرح العشرات، مع التوضيح باستخدام قِطَع العد، وأمثلةً عليها.

٠٥:٣٢

‏نسخة الفيديو النصية

طرح العشرات.

في الفيديو ده هنتعلّم إزاي بنستخدم حقائق الطرح، لطرح العشرات. نقدر نستخدم حقائق الطرح، لمساعدتنا في طرح العشرات. وهنشوف هنعمل ده إزاي.

عاوزين نوجد خمسين ناقص عشرة. فأول حاجة هنعبّر عن العددين بالعشرات. فخمسين هتبقى خمس عشرات. ناقص … عشرة هنكتبها واحد عشرة. بعدين نفكّر: خمسة ناقص واحد، بيساوي كام؟ خمسة ناقص واحد، بيساوي أربعة. يبقى خمس عشرات ناقص واحد عشرة، بيساوي أربع عشرات. وأربع عشرات بتساوي أربعين. يبقى ده معناه إن خمسين ناقص عشرة، هيساوي أربعين.

ممكن برضو نعبّر عن العملية، باستخدام قطع العدّ. فأول حاجة هنعبّر عن خمسين باستخدام قطع العدّ. فهنلاقي قدامنا خمس قطع عدّ، كلّ منها معبّر عن عشرة. بعدين عاوزين نطرح منهم عشرة. فهنشطب على قطعة عدّ معبّرة عن عشرة، بالشكل ده. فهيتبقّى قدامنا أربع قطع عدّ معبّرة عن عشرة. يعني أربع عشرات، أو أربعين.

نتنقل لصفحة تانية، ونحلّ مثال تاني. عاوزين نحسب ستين ناقص أربعين. فأول حاجة هنعبّر عن العددين بالعشرات. فهنعبّر عن ستين بست عشرات. ناقص … أربعين بأربع عشرات. وبعدين نفكّر: ستة ناقص أربعة، هيساوي كام؟ ستة ناقص أربعة، هيساوي اتنين. وده معناه إن ست عشرات ناقص أربع عشرات، هيساوي عشرتين أو اتنين عشرات. واتنين عشرات يعني عشرين. يبقى ستين ناقص أربعين، هيساوي عشرين.

نعبّر عن العملية برضو باستخدام قطع العدّ. فأول حاجة هنعبّر عن ستين باستخدام قطع العدّ، بالشكل ده. فهنلاقي قدامنا ست قطع عدّ، كلّ منها معبّر عن عشرة. بعدين عاوزين نطرح منهم أربعين، يعني أربع عشرات. فهنشطب على أربع قطع عدّ معبّرة عن عشرة، بالشكل ده. فهيتبقّى قدامنا قطعتين عدّ معبّرين عن عشرة. يعني عشرتين، أو عشرين.

نتنقل لصفحة تانية. عاوزين نكمّل الفراغات، في الأسئلة اللي هتظهر. أول سؤال: تلات عشرات ناقص واحد عشرة. فهنفكّر: تلاتة ناقص واحد، هيساوي كام؟ تلاتة ناقص واحد، هيساوي اتنين. يبقى تلات عشرات ناقص واحد عشرة، بيساوي اتنين عشرات. وبنستنتج من ده إن تلاتين ناقص عشرة، بيساوي عشرين.

السؤال التاني: خمس عشرات ناقص اتنين عشرات، بيساوي كام عشرات؟ فنفكّر: خمسة ناقص اتنين، بيساوي كام؟ خمسة ناقص اتنين، بيساوي تلاتة. يبقى خمس عشرات ناقص اتنين عشرات، بيساوي تلات عشرات. ونستنتج من ده إن خمسين ناقص عشرين، بيساوي تلاتين.

السؤال اللي بعده: تمانين ناقص أربعين. بنفس طريقة حلّ السؤالين اللي قبله. هيبقى تمانين بيساوي تمن عشرات. يعني الرقم المكتوب في العشرات. وأربعين هيساوي أربع عشرات. يعني الرقم المكتوب في العشرات برضو. بعدين نطرح العشرات. فهيبقى تمنية ناقص أربعة، هيساوي أربعة. يبقى تمانين ناقص أربعين، هيساوي أربع عشرات أو أربعين.

السؤال اللي بعده: سبعين ناقص تلاتين. بنفس الطريقة، هنطرح الرقمين اللي في العشرات. فهيبقى سبعة ناقص تلاتة، بيساوي أربعة. يعني سبعين ناقص تلاتين، بيساوي أربع عشرات أو أربعين.

وبكده نبقى خلّصنا الفيديو ده. اللي اتعلمنا فيه إزاي بنستخدم حقائق الطرح، بطرح العشرات.