فيديو: قراءة التوقيت بأرباع الساعة‎

أيّ ساعة توضّح توقيت الساعة الواحدة إلا الرُّبع؟ [أ] ساعة أ [ب] ساعة ب [ج] ساعة ﺟ [د] ساعة د [ﻫ] ساعة ﻫ

٠٣:٣٣

‏نسخة الفيديو النصية

أيّ ساعة توضّح توقيت الساعة الواحدة إلا الرُّبع؟ اتناشر وخمستاشر دقيقة. ولّا واحدة وخمسة وأربعين دقيقة. ولّا اتناشر وتلاتين دقيقة. ولّا واحدة وخمستاشر دقيقة. ولّا اتناشر وخمسة وأربعين دقيقة.

عاوزين نعرف أيّ ساعة من الخمس ساعات الموضحين قدامنا دول، هي اللي بتقول لنا إن الساعة واحدة إلا رُبع. طيب هو يعني إيه واحدة إلا رُبع؟ يعني الساعة ناقص لها رُبع واحد بس، وتبقى واحدة بالظبط. طب هي الساعة فيها كام رُبع؟ الساعة فيها أربعة أرباع. كل رُبع بخمستاشر دقيقة. يعني إيه؟ خمستاشر، وخمستاشر، وخمستاشر، وخمستاشر. أربعة أرباع، كل رُبع مدته خمستاشر دقيقة.

طيب لمّا إحنا نيجي نقول إن الساعة ناقص لها رُبع واحد بس، وتبقى واحدة؛ معنى كده إن هي قبل واحدة كانت إيه؟ كانت اتناشر. طيب اتناشر وإيه؟ اتناشر وتلات أرباع، أو وتلات أرباع. علشان لمّا نحطّ على الاتناشر وتلات أرباع، رُبع واحد كمان، بقت واحدة. يبقى إحنا كده عندنا واحدة إلا رُبع هي هيّاها اتناشر وتلات أرباع.

طيب إحنا اتناشر عارفينها. التلات أرباع بقى، يعني إيه؟ هو إحنا مش قلنا إن الرُّبع بخمستاشر؟ طيب تعالوا ناخد تلات أرباع؛ يعني رُبع، ورُبع، ورُبع. خمستاشر زائد خمستاشر زائد خمستاشر. خمستاشر وخمستاشر، تلاتين. تلاتين وخمستاشر، خمسة وأربعين. يعني إيه الكلام ده؟ يعني الساعة اتناشر وخمسة وأربعين دقيقة.

همثلها لكم على شكل ساعة؛ عشان تفهموها أكتر. آدي دي الساعة. وهنا الاتناشر. وهنا الساعة واحدة. لمّا العقرب الصغير يكون عند الاتناشر، أو قريب منها. والعقرب الكبير يبدأ يلفّ الدورة دي كلها، ويُقَف هنا. اشمعنى وقف هنا؟ هنعرف دلوقتي.

الساعة بتاعتنا هنعمل كده، ونقسّمها أربعة أرباع، بالشكل ده. يبقى ده كده ربع، وده ربع، وده ربع، وده ربع. لمّا قلنا إن العقرب الكبير مشي من أول الاتناشر لحدّ ما وصل هنا، معناه إنه عدّى بكام رُبع؟ واحد، اتنين، تلاتة. خمستاشر، وخمستاشر، وخمستاشر. يعني هيُقَف هنا عند الخمسة وأربعين.

طب باقي له قدّ إيه؟ نركز أوي في الحتة دي. باقي له رُبع واحد بس، والساعة تقلب واحدة، بدل ما هي اتناشر. يبقى واحدة إلا رُبع هي اتناشر وتلات أرباع، هي هيّاها بالظبط.

طيب أيّ اختيار بقى من عندنا هو اللي بيقول لنا إن الساعة اتناشر وخمسة وأربعين دقيقة؟ لو بصينا عَ الاختيارات كويس، هنلاقي إن الاختيار ده، هو اللي بيقول لنا إن الساعة اتناشر وخمسة وأربعين دقيقة. وهي اللي بتعادل واحدة إلا رُبع. ويبقى هو ده الاختيار الصح: اتناشر وخمسة وأربعين دقيقة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.