فيديو: حل المسائل الكلامية عن طريق جمع عددين كسريين

في أحد الأيام حلّق سرب من الطيور لمدّة ٤/٣ ٢ ساعة. وفي اليوم التالي، حلّق السرب لمدّة ٥/٤ ٣ ساعات. ما إجمالي عدد الساعات التي حلّقها السرب؟

٠٢:٣٥

‏نسخة الفيديو النصية

في أحد الأيام حلّق سرب من الطيور لمدّة اتنين وتلاتة على أربعة ساعة. وفي اليوم التالي حلّق السرب لمدّة تلاتة وأربعة على خمسة ساعات. ما إجمالي عدد الساعات التي حلّقها السرب؟

دلوقتي في اليوم الأول السرب ده حلّق اتنين وتلاتة على أربعة ساعة. وفي اليوم التالي حلّق تلاتة وأربعة على خمسة ساعة. يبقى إجمالي الساعات اللي حلّقها السرب هيبقى عبارة عن مجموع المدّتين اللي حلقهم في اليومين مع بعض. هيبقى بيساوي … عشان نقدر نجمع العددين اللي عندنا دول، وهم أعداد كسرية، هنحوّلهم ونكتبهم على صورة كسور غير فعلية.

هنبدأ بالعدد الأول: اتنين في أربعة بتمنية. نجمع عليهم تلاتة هيبقى حداشر. يبقى العدد الأول هيبقى حداشر على أربعة. بنفس الطريقة، العدد الكسري التاني هنحوّله هو كمان لكسر غير فعلي. تلاتة في خمسة بخمستاشر، زائد أربعة يبقى تسعتاشر. يبقى الكسر التاني هيبقى تسعتاشر على خمسة. دلوقتي أصبح العددين دول عبارة عن كسرين، بس المقامات بتاعتهم مختلفة.

عشان نقدر نجمع كسرين لازم المقامات تبقى موحّدة. بنوحد المقامات على المضاعف المشترك الأصغر. عشان نوجد المضاعف المشترك الأصغر للعددين اللي عندنا، بنكتب كل واحد فيهم كحاصل ضرب عوامله الأولية. وبعدين المضاعف المشترك الأصغر بيبقى عبارة عن حاصل ضرب مجموعة العوامل دي. بس لو فيه عامل مشترك بين العددين بنكتبه مرة واحدة. وبالتالي فالمضاعف المشترك الأصغر هنا هيبقى عشرين. يعني عايزين الكسرين دول يبقى المقام بتاعهم عشرين. الأربعة عشان تصبح عشرين يبقى هيحصل لها ضرب في خمسة.

وزيّ ما ضربنا المقام في خمسة، يبقى البسط بتاع الكسر لازم نضربه في خمسة هو كمان؛ عشان قيمته ما تتغيّرش. الكسر الآخر عشان يصبح مقامه عشرين هيبقى الخمسة دي تمّ ضربها في أربعة. يبقى البسط بتاع الكسر لازم نضربه في نفس العدد، يعني نضربه في أربعة. هيبقى عندنا كده خمسة وخمسين على عشرين، زائد ستة وسبعين على عشرين، اللي مجموعهم هيطلع مية واحد وتلاتين على عشرين.

ونقدر نكتبها على صورة عدد كسري. لو قسمنا مية واحد وتلاتين على عشرين، هيبقى فيه عدد صحيح؛ ستة، وهيتبقّى حداشر. يبقى نقدر نكتبها في الصورة دي: ستة وحداشر على عشرين.

ويبقى كده إجمالي عدد الساعات التي حلّقها السرب هيبقى: ستة وحداشر على عشرين ساعة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.