تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: التعرف على نوع المضلع وتحديده طبقًا لعدد أضلاعه

سوزان فائق

يوضح الفيديو مفهوم المضلع، وكيفية التعرف عليه، وتحديده طبقًا لعدد أضلاعه.

٠٢:١٨

‏نسخة الفيديو النصية

هنتكلّم في الفيديو ده على المضلع، وإزاي نعرف نوع المضلع ونحدّده؛ طبقًا لعدد أضلاعه.

المضلع هو شكل مستوي مغلق مكوّن من ثلاث زوايا أو أكتر، وثلاث قطع مستقيمة أو أكتر. الشكل المستوي ده، اللي هو بيبقى الشكل الثنائي الأبعاد، بيبقى له طول وعرض. زيّ المستطيل اللي قدّامنا ده، له طول وعرض، ومغلق؛ لأن قِطَعه المستقيمة متصلة ببعضها، وعاملة أركان كده، دي بنسمّيها زوايا. وكل قطعة مستقيمة بنسمّيها ضلع. بنحدّد اسم الشكل طبقًا لعدد أضلاعه وزواياه. يعني الشكل اللي قدّامنا ده بيحتوي على أربع قطع مستقيمة، وأربع زوايا؛ بنقول عليه شكل رباعي.

هنشوف أشكال المضلعات. فيه شكل مثلث، اللي بيحتوي على تلات أضلاع، وتلات زوايا. الشكل الرباعي بيحتوي أربع أضلاع، وأربع زوايا. فيه الشكل الخماسي، يحتوي خمس أضلاع، وخمس زوايا. شكل السداسي بيحتوي ست أضلاع، وست زوايا. شكل الثماني بيحتوي تمن أضلاع، وتمن زوايا. نشوف أمثلة.

مضلع له ست أضلاع وستة زوايا، ما اسم هذا المضلع؟ المضلع ده يسمّى شكل سداسي، وبيبقى شكله بالشكل ده. مضلع له ثلاث أضلاع وثلاثة زوايا؟ يبقى مثلث. وده شكل من أشكال المثلث، تلات أضلاع وتلات زوايا. مضلع له أربع أضلاع وأربع زوايا، ما اسمه؟ يبقى هو شكل رباعي يحتوي أربع أضلاع، وأربع زوايا.

اتكلّمنا في الفيديو ده عن إيه هو المضلع. وإزاي بنتعرّف على نوعه وبنحدّده؛ طبقًا لعدد أضلاعه، وعدد زواياه.