فيديو: مقارنة الكسور ذات المقامات المختلفة

أكمل: ١٢/٧< _. [أ] ٢٤/٧ [ب] ١٢/٥ [ج] ١٩/٦ [د] ٧/٥

٠٤:٣٧

‏نسخة الفيديو النصية

أكمل: سبعة عَ الاتناشر أقل من نقط. سبعة عَ الأربعة وعشرين. ولّا خمسة عَ الاتناشر. ولّا ستة عَ التسعتاشر. ولّا خمسة عَ السبعة؟

عاوزين نعرف الكسر اللي قدّامنا ده اللي هو سبعة عَ الاتناشر، أقل من أيّ كسر من الكسور اللي قدّامنا في الاختيارات دي. فهناخد واحد واحد، ونقارنه بالسبعة عَ الاتناشر.

نبدأ أول حاجة نكتب سبعة عَ الاتناشر هنا، ونقارنها بأول كسر اللي هو سبعة عَ الأربعة وعشرين. اللي هو الاختيار ده. ونشوف هل هي أقل منه ولّا لأ. لو جينا نبصّ عليهم هنلاقي البسط زي البسط، أو العدد اللي فوق زي العدد اللي فوق. بنسمّيه البسط. والعدد اللي تحت، أو اللي إحنا بنسمّيه المقام، مش زي العدد اللي تحت. هنا اتناشر، وهنا أربعة وعشرين. يبقى مين الكبير؟ الكبير هو الاتناشر. لأن لمّا الأعداد تكون تحت شرطة الكسر، العدد الصغير هو اللي بيدّينا الكسر الكبير. والاتناشر هي الصغيرة، فده معناه إن الكسر ده هو الكبير. يبقى إذن الاختيار ده مش هو الاختيار الصح.

نشوف الاختيار اللي بعده. نكتب سبعة عَ الاتناشر تاني، ونشوف الاختيار ده. خمسة على الاتناشر. طيّب هنا عندنا العدد اللي تحت زي العدد اللي تحت. نبصّ عَ اللي فوق. هنا سبعة، وهنا خمسة. مين الكبير؟ السبعة. ما دام بنقارن بين الأعداد فوق شرطة الكسر، يبقى عادي. ما دام السبعة هي الكبيرة، يبقى الكسر ده هو الكبير. يبقى هنا الكسر ده، اللي هو سبعة عَ الاتناشر، هو الكبير. ودي برضو مش الاختيار الصح. إحنا عاوزين اختيار يكون أكبر من السبعة عَ الاتناشر. يبقى مش هو ده اللي هنختاره. نشوف اللي بعده.

نكتب سبعة عَ الاتناشر، ونقارنها المرة دي بإيه؟ ستة عَ التسعتاشر. هنا بقى الأعداد اللي تحت إيه؟ اتناشر، وتسعتاشر. الأعداد اللي فوق إيه؟ سبعة، وستة. لا الأعداد اللي فوق زيّ بعضها، ولا الأعداد اللي تحت زيّ بعضها. طيّب نعرف منين أيّ كسر هو الكبير؟

بصّوا هنعمل إيه. هنضرب التسعتاشر في السبعة. تسعتاشر في سبعة بمية تلاتة وتلاتين. تحطّها كده في دايرة هنا. بعدين هنضرب الاتناشر في ستة. الاتناشر في ستة باتنين وسبعين. وهنحطّها في دايرة هنا. إحنا كده عملنا إيه؟ ضربنا التسعتاشر في سبعة، وكتبنا الناتج هنا. وضربنا الاتناشر في ستة، وكتبنا الناتج هنا. لحدّ كده سهل جدًّا.

دلوقتي بقى هنقارن بين العددين اللي كتبناهم في الدايرتين. عندنا هنا مية تلاتة وتلاتين، وهنا اتنين وسبعين. مين الكبير؟ المية تلاتة وتلاتين. يبقى الكسر ده هو الكبير، اللي هو عند المية تلاتة وتلاتين. ويبقى برضو الاختيار ده مش صح. وإن ستة على تسعتاشر أصغر من سبعة على اتناشر. يبقى مش هو الاختيار اللي المفروض نختاره.

نيجي بقى لآخر اختيار، وهو الخمسة عَ السبعة. فهنقارن بين سبعة عَ الاتناشر، وخمسة عَ السبعة. عندنا برضو العددين اللي فوق مش زيّ بعض؛ هنا سبعة، وهنا خمسة. والعددين اللي تحت مش زيّ بعض؛ هنا اتناشر، وهنا سبعة. فهنستخدم نفس الطريقة اللي فاتت. هنضرب سبعة في سبعة. السبعة في سبعة بتسعة وأربعين. نحطّها في دايرة. بعدين نضرب اتناشر في خمسة. اتناشر في خمسة بستين. نكتبها هنا. ونحطّها هي كمان في دايرة.

ونبدأ نقارن، مين الكبير؟ التسعة وأربعين، ولّا الستين. الستين هي الكبيرة. فده معناه إن خمسة على سبعة أكبر من سبعة على اتناشر. وهو ده الاختيار المظبوط. خمسة على سبعة. لأن هي دي النتيجة اللي إحنا ممكن نكمّل بيها النقط، ونكتب هنا خمسة على سبعة. وهي اللي بتكون أكبر من السبعة عَ الاتناشر.

يبقى الاختيار الصح واللي هنختاره، هو: خمسة على سبعة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.