فيديو: كتابة الأعداد في الصورة القياسية

عبر عن ٠٫٠٠٧٧ × ١٠^٥ في الصورة القياسية.

٠٣:٢٥

‏نسخة الفيديو النصية

عبّر عن سبعة وسبعين من عشر آلاف في عشرة أُس خمسة، في الصورة القياسية.

يعني معطى عندنا المقدار ده، والمطلوب إننا نكتبه في الصورة القياسية. وفي الأول خلينا نفتكر إن الصورة القياسية لعددٍ ما هي: أ في عشرة أُس ن. حيث واحد أقل من أو يساوي القيمة المطلقة لـ أ أقل من عشرة. وفي نفس الوقت تكون ن عدد صحيح. فمعنى كده إن القيمة المطلقة لـ أ لازم تكون أكبر من أو يساوي واحد، وتكون أقل من عشرة.

فلمّا نيجي نشوف المقدار اللي عندنا، فهنلاحظ إن أ هنا اللي هي سبعة وسبعين من عشر آلاف. وعلشان نخلّي السبعة وسبعين من عشر آلاف بتطابق الشرط بتاع أ، يعني لازم تكون أكبر من أو يساوي واحد، وفي نفس الوقت أقل من عشرة. فمعنى كده إننا عايزين نحرّك العلامة العشرية تلات أماكن جهة اليمين.

أو بمعني آخر، نقدر نعتبر إن سبعة وسبعين من عشر آلاف هي عبارة عن سبعة وسبعة من عشرة على ألف. لأننا لمّا بنقسم على عشرة، بنحرّك العلامة العشرية تلات أماكن جهة اليسار. فساعتها هترجع تاني، وهتبقى سبعة وسبعين من عشر آلاف. فبالتالي إحنا هنكتبها كده؛ علشان نخلّي سبعة وسبعة من عشرة بينطبق عليها الشروط؛ إن هي تكون أكبر من أو يساوي واحد، وفي نفس الوقت أقل من عشرة.

بعد كده نقدر نكتب سبعة وسبعة من عشرة على ألف، في صورة: سبعة وسبعة من عشرة، في واحد على ألف. ولمّا بنحوّل عدد عشري إلى الصورة القياسية … خلينا نفتكر إن واحد على عشرة بتساوي عشرة أُس سالب واحد. وبنفس الطريقة واحد على مية يعني كأنها واحد على عشرة، أُس اتنين. فهتبقى بتساوي عشرة أُس سالب اتنين. وهكذا … فمثلًا لو عندنا واحد على ألف، يعني كأنها واحد على عشرة، أُس تلاتة. فنقدر نكتبها في صورة عشرة أُس سالب تلاتة.

فبالتالي لمّا نشوف المقدار اللي عندنا، هنيجي عند واحد على ألف، وهنكتبها في صورة عشرة أُس سالب تلاتة. فبالتالي هيبقى سبعة وسبعين من عشر آلاف بتساوي سبعة وسبعة من عشرة في عشرة أُس سالب تلاتة. بعد كده لمّا نيجي نكتب المقدار ده في الصورة القياسية، فهيبقى بيساوي … هنعوّض عن سبعة وسبعين من عشر آلاف، بسبعة وسبعة من عشرة في عشرة أُس سالب تلاتة، في عشرة أُس خمسة اللي هي موجودة في السؤال.

فهيبقى المقدار بيساوي … وخلينا في الأول نفتكر إننا لمّا بنضرب عددين مرفوعين لأسس، وليهم نفس الأساس، فبنجمع الأُسُس. فمعنى كده إن المقدار هيبقى بيساوي سبعة وسبعة من عشرة في عشرة أُس، وهنجمع سالب تلاتة زائد خمسة. فعشرة أُس، سالب تلاتة زائد خمسة، هنجمع سالب تلاتة زائد خمسة، واللي هتساوي اتنين. فهيبقى المقدار هو سبعة وسبعة من عشرة في عشرة أُس اتنين.

وبالتالي هتبقى هي دي الصورة القياسية للمقدار؛ لأننا قدرنا نحوّله في صورة: أ في عشرة أُس ن. لأن أ هنا، اللي هي سبعة وسبعة من عشرة، انطبق عليها الشرط ده. وفي نفس الوقت ن، اللي هي الأُس، عدد صحيح، اللي هي اتنين. وبالتالي هتبقى الصورة القياسية هي: سبعة وسبعة من عشرة في عشرة أُس اتنين.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.