فيديو: إيجاد الفرق بين محيطَيْ دائرتين بمعلومية نصف قطر إحداهما وقطر الأخرى

باعتبار ٣٫١٤ قيمة 𝜋 التقريبية، ما الفرق في المحيط بين دائرة قطرها ١٠٠ سم ودائرة أخرى نصف قطرها ١٥ سم؟

٠١:٥٣

‏نسخة الفيديو النصية

باعتبار تلاتة وأربعتاشر من مية قيمة 𝜋 التقريبية، ما الفرق في المحيط بين دائرة قطرها مية سنتيمتر ودائرة أخرى نصف قطرها خمستاشر سنتيمتر؟

العلاقة اللي بنحسب منها محيط أي دائرة هي اتنين في 𝜋 في نق، يعني حاصل ضرب اتنين في 𝜋 في نصف قطر الدائرة اللي بنحسب محيطها. يبقى الفرق في المحيط اللي مطلوب نوجده، هنوجده بإننا هنوجد محيط الدايرة الأولى ونطرح منه محيط الدايرة التانية.

بالتعويض في القانون في محيط الدايرة الأولى، هيبقى حاصل ضرب اتنين في 𝜋، اللي هي قيمتها التقريبية تلاتة وأربعتاشر من مية، في نصف قطر الدائرة الأولى. طب إحنا الدائرة الأولى معطى عندنا قطرها مش نصف قطرها، يبقى هنقسم القطر على اتنين، يبقى كده ده نصف قطر الدائرة الأولى، هنطرح منه محيط الدائرة الثانية، اللي هو حاصل ضرب اتنين في القيمة التقريبية لـ 𝜋، اللي هي تلاتة وأربعتاشر من مية، في نصف قطر الدائرة الثانية، اللي هو معطى عندنا بخمستاشر سنتيمتر.

دلوقتي هنبتدي نشوف محيط الدايرة الأولى قد إيه، هنلاقي إننا نقدر نقسم اتنين على اتنين، هيبقى ناتج القسمة واحد. وحاصل ضرب التلاتة وأربعتاشر من مية في مية، هيدّينا تلتمية وأربعتاشر، كده ده محيط الدائرة الأولى. عايزين نوجد محيط الدائرة الثانية، هنقدر نضرب اتنين في خمستاشر بتلاتين، وبعدين تلاتين في تلاتة وأربعتاشر من مية، هيطلع حاصل الضرب أربعة وتسعين واتنين من عشرة. دلوقتي عايزين نوجد الفرق في المحيط، هنطرح المحيط الأول ناقص المحيط التاني، هيطلع الفرق بينهم ميتين وتسعتاشر وتمنية من عشرة، وهو ده الفرق بين محيط الدايرتين.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.