فيديو: تمثيل الجمع

يوضح الفيديو كيفية تمثيل عملية الجمع رياضيًّا، عن طريق جملة الجمع، مع أمثلة تطبيقية.

٠٩:١٣

‏نسخة الفيديو النصية

تمثيل الجمع.

هنتعلم مع بعض إزاي نقدر نكتب جمل الجمع بطريقة رياضية. لو حبينا نجمع مجموعتين الفراشات اللي قدامنا دول … يعني إيه نجمعهم؟ يعني لو ضمّيناهم مع بعض في مجموعة واحدة، المجموعة الجديدة دي هيبقى فيها كام فراشة؟ هنعمل أول خطوة، ونشوف عدد الفراشات اللي موجودة في المجموعة الأولى. هنلاقيهم تلاتة. الخطوة اللي بعد كده، اللي بنفهم منها إن إحنا هنضمّ المجموعتين مع بعض، هي كلمة «زائد». «زائد» معناها إن إحنا هنزوّد على المجموعة الأولى، العدد اللي بيمثّل المجموعة التانية.

الخطوة اللي بعد كده، هنحطّ العدد اللي بيمثّل المجموعة التانية، اللي هو اتنين. معناها كده إن إحنا المجموعة الأولى اللي عددها تلاتة، زائد؛ يعني هنضيف عليها أو هنزوّد عليها، العدد اللي بيمثّل المجموعة التانية، اللي هو اتنين. بنقول بعد كده يساوي … يعني المجموعة الجديدة اللي هتتكوّن بعد ضمّ المجموعتين، هتبقى فيها عدد بيساوي … ونحطّ بعد كده ناتج الجمع. ناتج الجمع هنجيبه بإن إحنا هنعدّ مجموعة الفراشات كلها مع بعض. هنبتدي نعدّهم: واحد، اتنين، تلاتة، أربعة، خمسة. يبقى ناتج الجمع هو خمسة.

دلوقتي هنكتب جملة الجمع دي ، س بشكل رياضي. فبدل كلمة «زائد» … إحنا هنكتب العدد اللي بيمثّل المجموعة الأولى زيّ ما هو. بدل كلمة «زائد»، بنستخدم الرمز ده، العلامة دي هي بنقراها «زائد». يبقى تلاتة، اللي هو العدد اللي بيمثّل المجموعة الأولى؛ «زائد»، هي العلامة اللي بتعني الجمع؛ وبعدين العدد اللي بيمثّل المجموعة التانية. وبدل كلمة «يساوي» هنحطّ العلامة دي. العلامة دي هي «يساوي». وبعدين بنحطّ ناتج الجمع، اللي هو خمسة. العدد الأول، وعلامة الجمع، والعدد التاني اللي هنضيفه عليه، وعلامة اليساوي، وناتج الجمع؛ كل دول مع بعض بنسميهم جملة الجمع.

هنشوف مع بعض مجموعة أخرى من الأمثلة، هنكوّن فيها جمل جمع مختلفة. هنشوف أول مثال عندنا. هنبدأ أول حاجة بالعدد اللي بيمثّل المجموعة الأولى. المجموعة الأولى فيها عدد اتنين بالون لونهم أزرق. يبقى العدد اللي بيمثّلها هو اتنين. وبعدين هنحط علامة زائد، اللي بيها بنفهم إن دي عملية جمع لمجموعتين مع بعض المجموعة. التانية عبارة عن اتنين بالون لونهم أحمر. يبقى هنضيف على المجموعة الأولى عدد اتنين. وبعدين بنستخدم علامة يساوي، اللي بنحط بعدها ناتج الجمع. ناتج الجمع اللي هو عبارة عن العدد الكلي للبالونات كلها لمّا نحطّها جنب بعض. هنبتدي نعدّهم مع بعض؛ عشان نشوف ناتج الجمع. واحد، اتنين، تلاتة، أربعة. يبقى الناتج هيبقى بيساوي أربعة. كده كوّنّا جملة الجمع في المثال ده.

نشوف المثال التاني. ونبتدي نشوف العدد اللي بيمثّل أول مجموعة من الكرات. هنلاقي إن أول مجموعة بتتكوّن من تلات كرات. هنستخدم بعد كده علامة الجمع، اللي هي زائد. وبعدين العدد اللي بيمثّل مجموعة الكرات اللي في المجموعة التانية. هم برضو تلات كرات. وبعدين نستخدم علامة يساوي، اللي هي بنحطّ بعدها ناتج الجمع للمجموعتين. ناتج الجمع بيبقى عبارة عن عدد الكرات كلها لمّا تتجمع مع بعض. هنعدّ عشان نشوف ناتج الجمع. واحد، اتنين، تلاتة، أربعة، خمسة، ستة. يبقى ناتج الجمع هيبقى بيساوي ستة. يبقى تلاتة زائد تلاتة يساوي ستة. كده كوّنّا جملة الجمع دي.

بنفس الطريقة في المثال اللي بعد كده. أول مجموعة بتتكون من عروسة واحدة. يبقى العدد اللي بيمثّلها واحد. وبعدين هنستخدم علامة زائد، اللي هي بتمثّل عملية الجمع. وبعدين العدد اللي بيمثّل المجموعة التانية المجموعة التانية. المجموعة التانية بتتكوّن من برضو عروسة واحدة بس. بعدين بنحطّ علامة يساوي، اللي بنحطّ بعدها ناتج الجمع. هنشوف دلوقتي لمّا نضمّهم على بعض، هيبقى عندنا اتنين من العرائس. يبقى ناتج الجمع في الحالة دي، هيبقى بيساوي اتنين. يبقى واحد زائد واحد يساوي اتنين. دي جملة الجمع الخاصة بالمثال ده.

في المثال اللي بعده، هنبتدي نشوف المجموعة الأولى. هنلاقي العدد اللي بيمثّلها هو واحد. بعدين نحطّ زائد، اللي هي علامة الجمع. وبعدين نشوف المجموعة التانية بتتكوّن من كام. هنلاقيها بتتكوّن من اتنين من الحصنة. هيبقى واحد زائد اتنين. وبعدين نحطّ علامة يساوي، اللي بنحطّ بعدها ناتج الجمع. ناتج الجمع عبارة عن مجموعة الحصنة اللي عندنا دي لمّا نضمّهم على بعض، هنشوف عددهم كام. واحد، اتنين، تلاتة. يعني ناتج الجمع هيبقى عبارة عن تلاتة. وبكده يبقى كوّنّا جملة الجمع للمثال ده.

الجمع عمومًا هي فكرته ضمّ مجموعتين. «أَجمع» يعني «أَضُم». يبقى الجمع هو ضَمّ مجموعتين. هنكمّل مع بعض في صفحة جديدة في تمثيل الجمع.

لو عندنا مجموعتين، عايزين نجمعهم على بعض، يعني نضمّهم مع بعض. أول مجموعة عبارة عن أربع أجزاء حمراء. المجموعة التانية عبارة عن جزء واحد أصفر. يبقى ساعتها المجموع، اللي هو بيمثّل الكل، بعد ما هنضّم الأجزاء على بعض، هتبقى عبارة عن … الأربع قطع حمراء أهُم، هنحطّهم زي ما هم. وهنزوّد عليهم، يعني هنجمع عليهم، القطعة الصفراء. فهيبقى الكل هو عبارة عن الجزئين هنضمّهم مع بعض. يعني هنجمع الجزئين دول، فيطلع لنا ناتج الجمع، اللي هو الكل. اللي هو نقدر نمثّله رياضيًّا بإن المجموعة الأولى بتتكوّن من عدد أربع أجزاء. والمجموعة التانية بتتكوّن من جزء واحد. الكل في الحالة دي، اللي هي المجموعة الناتجة من ضمّ الجزئين، زي ما شُفنا، عبارة عن واحد، اتنين، تلاتة، أربعة، خمسة. الكل في الحالة دي، اللي هو عبارة عن ناتج جمع الجزئين مع بعض، هيبقى بيساوي العدد خمسة.

لو مطلوب منّنا نجمع اتنين زائد واحد. اتنين دي عبارة عن أول جزء في عملية الجمع، اللي بنمثّله بقطعتين عدّ حمراء. أمّا واحد، اللي هو العدد التاني اللي بيتمّ جمعه، هو بيمثّل المجموعة التانية، اللي هو عبارة عن قطعة عدّ صفراء. في الحالة دي، الكل هيبقى عبارة عن إيه؟ قطعتين عدّ حمراء، وقطعة عدّ صفراء. لو عدّيناهم، هيبقى تلات قطع. هيبقى الكل، اللي هو بيمثّل ناتج الجمع، هيبقى بيساوي تلاتة.

لو مطلوب مننا نجمع خمسة زائد تلاتة. معناها إن أول جزء بيتكوّن من خمس قطع عدّ حمراء. والجزء التاني هيبقى بيمثّل تلات قطع عدّ صفراء. يبقى الكل في الحالة دي … هنحطّهم كلهم جنب بعض. آدي خمس قطع عدّ حمراء. هنحطّ جنبهم تلات قطع عدّ صفراء. ولو عدّيناهم دلوقتي مع بعض … واحد، اتنين، تلاتة، أربعة، خمسة، ستة، سبعة، تمنية. هيبقى الكل بيمثّله العدد تمنية، اللي هو ناتج الجمع. يبقى بناخد جزء، وبنضيف أو بنزود عليه جزء تاني. الناتج اللي هو بيبقى الكل، عبارة عن الجزئين مضمومين مع بعض، اللي هو عبارة عن كل العناصر اللي في المجموعتين مع بعض. هي دي عملية الجمع؛ بنضمّ فيها مجموعتين.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.