فيديو: ضرب عدد مكون من ثلاثة أرقام أو أقل في عدد مكون من رقم واحد

يوضح الفيديو كيفية ضرب عدد مكوَّن من ثلاثة أرقام أو أقل في عدد مكوَّن من رقم واحد، مع أمثلة توضيحية.

٠٥:٥٨

‏نسخة الفيديو النصية

في الفيديو ده هنعرف إزاي نضرب عدد مكوّن من ثلاثة أرقام أو أقل في عدد مكون من رقم واحد. وهنحل بعض الأمثلة.

تدرّب كريم على كتابة تمنية وعشرين صفحة في اليوم الواحد؛ استعدادًا للمشاركة في مسابقة الإملاء. كم صفحة كتبها كريم في سبع أيام؟

يعني كريم بيكتب تمنية وعشرين صفحة في اليوم الواحد. فعايزين نعرف كام صفحة كتبها في سبع أيام. فمعنى كده إن إحنا هنوجد حاصل ضرب تمنية وعشرين في سبعة. فمعنى كده إننا عايزين نقوم بضرب عدد مكوّن من رقمين، في عدد مكوّن من رقم واحد.

وقبل ما نشوف إزاي هنقدر نوجد حاصل ضرب تمنية وعشرين في سبعة، هنحاول نقدّر الإجابة. فتمنية وعشرين نقدر نقرّبها للعدد تلاتين. فنقدر نوجد حاصل ضرب تلاتين في سبعة. والإجابة هتبقى قريبة من حاصل ضرب تمنية وعشرين في سبعة.

فلمّا نيجي نضرب تلاتين في سبعة، هنضرب الأول تلاتة في سبعة، واللي بتساوي واحد وعشرين. لكن إحنا هنا بنضرب تلاتين في سبعة، مش تلاتة في سبعة. فمعنى كده إننا نضرب تلات عشرات. فهيبقى حاصل الضرب هو واحد وعشرين عشرة؛ يعني ميتين وعشرة. فمتين وعشرة هي تقدير للإجابة.

لكن دلوقتي عايزين نوجد حاصل ضرب تمنية وعشرين في سبعة. وعشان عملية الضرب تبقى أسهل، هنكتب الأعداد تحت بعض. فهنكتبها بالشكل ده. بعد كده هيبقى عندنا عدد مكوّن من رقمين اللي هو تمنية في الآحاد واتنين في العشرات. وهنضربه في العدد سبعة اللي هو مكوّن من رقم واحد، اللي هو سبعة في الآحاد.

فأول حاجة هنعملها إننا هنضرب الآحاد في بعض؛ يعني هنضرب في الأول تمنية في سبعة. وزي ما إحنا عارفين من جدول الضرب، إن حاصل ضرب تمنية في سبعة هو ستة وخمسين. لكن ما ينفعش إننا نكتب العدد ستة وخمسين بالشكل ده؛ لأننا كنا بنضرب الآحاد. فيبقى لازم نخلّي خانة الآحاد هنا لوحدها، والخمسة اللي هي في خانة العشرات هنكتبها فوق العشرات.

بعد كده هنضرب العشرات. يعني هنضرب العدد سبعة هنا في اتنين اللي في خانة العشرات. فهنضرب سبعة في اتنين، والناتج اللي هيطلع هنكتبه هنا في خانة العشرات. فلمّا نضرب سبعة في اتنين هتساوي أربعتاشر.

لكن هناخد بالنا إن إحنا كنا حاطين خمسة هنا في خانة العشرات، فمعنى كده إننا هنجمع الخمسة على الأربعتاشر. فلمّا نجمع خمسة زائد أربعتاشر، هتساوي تسعتاشر. فهتبقى الإجابة مية ستة وتسعين.

فمعنى كده إن حاصل ضرب تمنية وعشرين في سبعة هو مية ستة وتسعين. ولو قارنّا الإجابة اللي حصلنا عليها بالإجابة اللي إحنا حاولنا نقدّرها في الأول، اللي هي ميتين وعشرة؛ هنلاقي إن هي قريبة منها. فبالتالي هيبقى كتب كريم مية ستة وتسعين صفحة.

ونشوف مثال آخر: تحتوي طائرة على ميتين وستين مقعدًا. فما هو عدد المسافرين عليها في تسع رحلات؟

يعني عايزين نعرف عدد المسافرين على الطيارة في تسع رحلات، إذا كان الطيارة فيها ميتين وستين مقعد. فمعنى كده إننا عايزين نوجد حاصل ضرب ميتين وستين في تسعة. فهنلاحظ إننا بنضرب عدد مكوّن من تلات أرقام، في عدد مكوّن من رقم واحد.

وأول حاجة هنعملها إننا هنكتبهم تحت بعض بالشكل ده. بعد كده هنضرب العدد تسعة الأول في الآحاد، وبعد كده في العشرات، وبعد كده هنضرب تسعة في المئات.

ففي الأول هنضرب صفر في تسعة فهتساوي صفر. بعد كده هنضرب ستة في تسعة، فمن جدول الضرب حاصل ضرب ستة في تسعة بيساوي أربعة وخمسين. فهتبقى عندنا هنا الأربعة في خانة العشرات، والخمسة في خانة المئات.

لكن إحنا لسه هنضرب في المئات. فمعنى كده إننا هنشيل خمسة اللي في المئات هنا، وهنكتبها فوق خانة المئات. فهنضرب الأول تسعة في اتنين، وبعد كده هنجمع خمسة على حاصل الضرب. فتسعة في اتنين بتساوي تمنتاشر. بعد كده هنجمع الخمسة اللي كتبناها فوق خانة المئات، زائد التمنتاشر اللي عندنا. فلمّا نجمع تمنتاشر زائد خمسة هتساوي تلاتة وعشرين.

فمعنى كده إن المفروض الإجابة تبقى هنا بدل من تمنتاشر تبقى تلاتة وعشرين. فهنمسح تمنتاشر دي، وهنكتب تلاتة وعشرين. فمعنى كده إن هيبقى حاصل ضرب ميتين وستين في تسعة هو ألفين تلتمية وأربعين. وبالتالي هيبقى عدد المسافرين على الطيارة في تسع رحلات هو ألفين تلتمية وأربعين مسافر. وبكده نكون عرفنا إزاي نضرب عدد مكوّن من تلات أرقام أو أقل، في عدد مكوّن من رقم واحد. وحلينا بعض الأمثلة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.