تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: إيجاد مساحة متوازي الأضلاع

سوزان فائق

يوضح الفيديو إيجاد مساحة متوازي الأضلاع بمعلومية طول قاعدته، وارتفاعه.

٠٤:٠٦

‏نسخة الفيديو النصية

في الفيديو ده هنتكلّم على إيجاد مساحة متوازي الأضلاع. هنعرف إزاي نوجد المساحة بمعلومية طول القاعدة، وارتفاع متوازي الأضلاع.

في متوازي الأضلاع كل ضلعين متقابلين بيبقوا متوازيين ومتساويين في الطول. يعني الضلع ده بيساوي في الطول الضلع ده، وبيوازيه. والضلع ده بيساوي في الطول الضلع ده، وبيوازيه.

وقاعدة متوازي الأضلاع بيُمكن أن تكون أيّ ضلع من أضلاعه. وارتفاع متوازي الأضلاع بيبقى هو المسافة بين القاعدة والضلع المقابل لها.

وعلشان نوجد قيمة مساحة متوازي الأضلاع لازم نعرف طول القاعدة والارتفاع. لأن مساحة متوازي الأضلاع بتبقى هي حاصل ضرب القاعدة في الارتفاع؛ يعني بتساوي طول القاعدة في الارتفاع. هناخد مثال ونعرف إزاي نحسب مساحة متوازي الأضلاع.

اوجد مساحة متوازي الأضلاع في الشكل المجاور.

دي قاعدة متوازي الأضلاع. وده الارتفاع اللي هو المسافة ما بين القاعدة والضلع المقابل لها. هنعدّ عدد الوحدات علشان نعرف طول القاعدة. آدي واحد، اتنين، تلاتة، أربعة، خمسة. يبقى القاعدة طولها خمس وحدات. والارتفاع: واحد، اتنين، تلاتة، أربعة. أربع وحدات. يبقى القاعدة خمس وحدات، والارتفاع أربع وحدات.

وبما إن مساحة متوازي الأضلاع بتساوي طول القاعدة في الارتفاع. يبقى مساحة متوازي الأضلاع اللي في الشكل اللي قدّامنا ده هتساوي الخمسة في الأربعة. يعني يساوي عشرين وحدة مربعة؛ لأن المساحة بتتقاس بالوحدات المربعة. يبقى هي دي مساحة متوازي الأضلاع المطلوبة. هناخد مثال كمان.

اوجد مساحة متوازي الأضلاع في الشكل المجاور.

في الشكل اللي قدّامنا القاعدة طولها عشرين سنتيمتر. والارتفاع اللي هو المسافة ما بين القاعدة دي والضلع المقابل هو الحداشر سنتيمتر. ممكن نستخدم الارتفاع اللي برّه ده، أو بنُسقِط من هنا ارتفاع هيطلع برضو طوله حداشر سنتيمتر. واللي هو بيمثّل زاوية قايمة مع القاعدة.

مساحة متوازي الأضلاع بتساوي طول القاعدة في الارتفاع. هنعوّض بطول القاعدة اللي هو عشرين سنتيمتر، في الارتفاع حداشر سنتيمتر. يبقى المساحة ميتين وعشرين سنتيمتر مربع. وهي دي مساحة متوازي الأضلاع المطلوبة. هناخد مثال كمان من حياتنا العملية.

قامت منى برسم لوحة على شكل متوازي أضلاع. اوجد مساحة اللوحة لوضعها داخل إطار على شكل متوازي أضلاع.

طول القاعدة اتنين وأربعين سنتيمتر. والارتفاع اتنين وعشرين سنتيمتر زيّ ما هو موجود قدّامنا في الشكل. يبقى مساحة اللوحة اللي هي على شكل متوازي الأضلاع هيساوي طول القاعدة في الارتفاع. يعني هتساوي اتنين وأربعين سنتيمتر في اتنين وعشرين سنتيمتر. يعني هتساوي تسعمية أربعة وعشرين سنتيمتر مربع. وهي دي مساحة اللوحة المطلوبة.

اتكلّمنا في الفيديو ده عن مساحة متوازي الأضلاع باستخدام طول قاعدته وارتفاعه. وعرفنا إن القاعدة بتبقى أيّ ضلع من أضلاع متوازي الأضلاع. والارتفاع بيبقى المسافة ما بين القاعدة والضلع المقابل لها. وعرفنا إن مساحة متوازي الأضلاع بتبقى وحدتها هي الوحدات المربعة.