فيديو الدرس: تحديد القيمة المكانية ضمن عشرات الألوف الرياضيات

نسخة الفيديو النصية

تحديد القيمة المكانية ضمن عشرات الألوف.

هنعرف في الفيديو ده إزاي لو عندنا عدد بيتكون من خمس أرقام، نحدد القيمة المكانية لأي رقم من الأرقام اللي بيتكوّن منها العدد اللي عندنا.

لو عرفنا إن المسافة حول الكرة الأرضية بتُقدر بالعدد اللي قدامنا ده من الكيلومترات تقريبًا. إزاي هنعرف نقرا العدد اللي قدامنا ده؟ بنستخدم جدول القيم المكانية عشان نقدر نعرف نقرا أي عدد. هنبدأ نشوف الأرقام اللي بيتكون منها العدد اللي عندنا. بنبدأ دايمًا من أول رقم على اليمين اللي هو بيبقى في الآحاد. هنحطه في جدول القيم المكانية في خانة الآحاد. الرقم اللي بعد كده اللي هو السبعة هيبقى في خانة العشرات. اللي بعده صفر هيبقى في خانة المئات. وبعدين الصفر اللي بعده هيبقى في خانة الألوف. بعد كده عندنا أربعة في خانة عشرات الألوف. لو جينا نقرا العدد اللي عندنا ده. عندنا أربعة في خانة عشرات الألوف؛ يعني قيمتها أربعين ألف. فلمّا نيجي نقرا العدد ده هنقراه أربعين ألف خمسة وسبعين.

كده لو حابِّين نعبر عن القيمة المكانية لكل رقم من الأرقام دي، هنبتدي مثلًا نشوف الخمسة دي في الآحاد؛ فالقيمة المكانية بتاعتها هتبقى حاصل ضرب الرقم ده في القيمة المكانية للخانة بتاعته. يعني حاصل ضرب خمسة في واحد، اللي هي هتبقى خمسة.

أما لو بصينا للرقم اللي بعد كده اللي في العشرات اللي هو سبعة. فقيمته المكانية هتبقى حاصل ضرب الرقم في القيمة المكانية للخانة اللي هو فيها. القيمة المكانية لخانة العشرات هي عشرة. فيبقى حاصل ضرب سبعة في عشرة اللي هو سبعين. يبقى كده القيمة المكانية للرقم سبعة هنا هي سبعين.

بعد كده عندنا صفر في المئات صفر لو اتضرب في أي عدد هيديني صفر. فحتى لو ضربته في مية اللي هي قيمة الخانة المكانية اللي هو فيها، هيدّيني برضو صفر. فيبقى كده القيمة بتاعته بصفر. وبالمثل برضو الصفر اللي موجود في خانة الألوف.

كده بقى هنشوف آخر رقم عندنا اللي هو أربعة، واللي موجود في خانة عشرات الألوف. القيمة المكانية للخانة دي هي عشرة آلاف. يبقى عشان نوجد القيمة المكانية للرقم في الخانة دي، هنجيب حاصل ضرب أربعة في عشرة آلاف. يبقى هيبقى قيمته المكانية أربعين ألف.

هنشوف دلوقتي مثال تاني. في المثال اللي عندنا ده مطلوب مننا نوجد القيمة المكانية للرقم اللي موجود بين القوسين في العدد اللي قدامنا ده.

عشان نوجد القيمة المكانية لأي رقم موجود جوه عدد ما. هنكتب جدول القيم المكانية، ونحط كل رقم من الأرقام في الخانة الخاصة بيه. هنبدأ بأول رقم من جهة اليمين اللي هو أربعة. ده بيبقى في خانة الآحاد. الرقم اللي بعد كده تلاتة هيبقى في خانة العشرات. بعد كده عندنا صفر في خانة المئات. وبعدين خمسة في خانة الألوف. وبعدين عندنا سبعة في خانة عشرات الألوف.

إحنا مطلوب مننا نحدّد القيمة المكانية للرقم تلاتة. هنلاقي إن الرقم تلاتة ده موجود في خانة العشرات. فمعناها إن قيمته المكانية هتبقى تلاتين، اللي هي حاصل ضرب الرقم اللي هو تلاتة، في القيمة المكانية للخانة اللي هو فيها اللي هي عشرة. تلاتة في عشرة بتلاتين. فهتبقى قيمته المكانية تلاتين.

طب لو عندنا عدد زي العدد اللي قدامنا ده. عايزين نوجد القيم المكانية لكل رقم من الأرقام اللي بيتكوّن منها العدد ده.

هنبدأ من أول رقم من جهة اليمين. ده هيبقى في الآحاد. فقيمته المكانية هتبقى حاصل ضرب ستة في واحد، اللي هي هتبقى ستة.

الرقم اللي بعد كده اللي هو الأربعة موجود في خانة العشرات. يعني قيمته المكانية هتبقى حاصل ضرب الرقم في قيمة الخانة المكانية اللي هي عشرة. فهيبقى القيمة المكانية ليه أربعين.

الرقم اللي بعد كده هو اتنين. هيبقى موجود في خانة المئات، فهتبقى قيمته المكانية حاصل ضرب اتنين في مية، هنلاقيها هتبقى ميتين.

الرقم اللي بعد كده هو صفر ده موجود في خانة الألوف. يبقى قيمته المكانية … ما دام صفر هنضربه في أي حاجة … هو القيمة المكانية للخانة دي ألف. فصفر لو اتضرب في أي حاجة هيفضل صفر. فبالتالي القيمة المكانية ليه هتفضل زي ما هي صفر.

أما الرقم اللي بعد كده اللي هو تمنية ده هيبقى موجود في خانة عشرات الألوف. فقيمته المكانية هتبقى حاصل ضرب الرقم في قيمة الخانة المكانية اللي هو فيها. يعني حاصل ضرب تمنية في عشرة آلاف. فكده قيمته المكانية هتبقى تمانين ألف.

وجدول القيم المكانية ده مش بس بيساعدنا على تحديد القيمة المكانية لكل رقم من الأرقام اللي بيتكون منها عدد ما. لأ ده كمان بيساعدنا على قراية الأعداد الكبيرة. فعشان نقرا العدد اللي عندنا ده بنبتدي نقرا من الشمال. عندنا تمنية في خانة عشرات الألوف يعني تمانين ألف. فأول ما هنبتدي نقرا بنقرا من الشمال بنقول تمانين ألف. وعندنا اتنين في خانة المئات يبقى ميتين. وعندنا أربعة في العشرات وستة في الآحاد يعني ستة وأربعين. يبقى هنقراه تمانين ألف ميتين ستة وأربعين.

عرفنا في الفيديو ده إزاي لو عندنا عدد بيتكوّن من خمس أرقام. يعني العدد ده ضمن عشرات الألوف؛ إزاي نقدر نوجد القيم المكانية لكل رقم من الأرقام اللي بيتكوّن منها. وعرفنا إزاي جدول القيم المكانية بيساعدنا لإيجاد القيم المكانية لكل رقم منهم، وكمان بيساعدنا على قراءة الأعداد الكبيرة.