تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: تقريب الأعداد العشرية

أحمد مدحت

يوضح الفيديو كيفية تقريب الأعداد العشرية، مع أمثلة توضيحية.

٠٥:٣٥

‏نسخة الفيديو النصية

هنتكلم عن تقريب الأعداد العشرية. في الفيديو ده هنعرف إزاي نقرّب الأعداد العشرية. في الأول هنبدأ نتعرّف على خطوات تقريب الأعداد العشرية. علشان نقرّب عدد عشري، بنحطّ خط تحت رقم الخانة اللي إحنا عايزين نقرّب ليها. بعد كده بنبصّ عَ الرقم اللي موجود على يمين الخانة دي. بيبقى عندنا حالتين.

الحالة الأولى، لو كان الرقم ده أربعة أو أقل، يعني أصغر من خمسة. في الحالة دي، الرقم اللي تحتيه خط، بيفضل زي ما هو. والحالة التانية، هي لو كان الرقم اللي على يمين الخانة اللي إحنا حاطّين تحتيها خط، خمسة أو أكبر. في الحالة دي، هنضيف واحد على الرقم اللي تحتيه خط. وبعد ما بنقرّب، بنحذف كل الأرقام اللي موجودة على يمين الرقم اللي تحتيه خط. وهي دي خطوات التقريب بتاعة الأعداد العشرية. بعد كده هنشوف أمثلة.

في المثال الأول، عايزين نقرّب العدد العشري واحد وتلتمية أربعة وعشرين من ألف، لأقرب عدد صحيح. بالنسبة للعدد العشري اللي عندنا، فهو واحد وتلتمية أربعة وعشرين من ألف. والعدد ده عايزين نقرّبه لأقرب عدد صحيح. وأول خطوة في تقريب العدد العشري، هي إن إحنا بنحطّ خط تحت رقم الخانة اللي إحنا عايزين نقرّب ليها.

وإحنا عايزين نقرّب لأقرب عدد صحيح، بالتالي هنحطّ خط تحت الرقم اللي موجود في خانة الآحاد، اللي هو واحد. بعد كده هنبصّ على الرقم اللي موجود على يمين خانة الآحاد، فهنلاقيه تلاتة. وعندنا حالتين. حالة لو كان الرقم أربعة أو أقل. وفي الحالة دي بيفضل الرقم اللي تحته خط زي ما هو. وحالة تانية لو كان الرقم خمسة أو أكبر. في الحالة دي بنضيف واحد للرقم اللي تحتيه خط.

فبالنسبة للعدد العشري اللي عندنا، التلاتة أصغر من الخمسة. معنى كده إن الرقم واحد هيفضل زي ما هو. بكده العدد العشري واحد وتلتمية أربعة وعشرين من ألف، لمّا هنقرّبه لأقرب عدد صحيح، هنقرّبه للعدد واحد.

نقدر نتأكد من الإجابة بتاعتنا من خلال خط الأعداد. فلمّا هنمثّل العدد العشري واحد وتلاتة من عشرة، على خط الأعداد، زي ما هيظهر لنا. لمّا هنبصّ على خط الأعداد، هنلاقي إن واحد وتلاتة من عشرة، أقرب للعدد واحد، من العدد اتنين. معنى كده فعلًا إن العدد العشري واحد وتلتمية أربعة وعشرين من ألف، لمّا هنقرّبه لأقرب عدد صحيح، هنقرّبه للعدد واحد.

بعد كده في المثال التاني، عايزين نقرّب العدد العشري تسعة وتسعين وستة وتسعين من مية، لأقرب جزء من عشرة. بالنسبة للعدد العشري اللي عندنا هو: تسعة وتسعين وستة وتسعين من مية. عايزين نقرّبه لأقرب جزء من عشرة، بالتالي هنحطّ خط تحت رقم الخانة اللي إحنا عايزين نقرّب ليها. يعني هنحطّ خط تحت التسعة، اللي موجودة في خانة الجزء من عشرة.

بعد كده هنبصّ على الرقم اللي موجود على يمين الخانة دي. هنلاقيه ستة. وكان بيبقى عندنا حالتين. حالة لو كان الرقم أربعة أو أقل، يعني أصغر من خمسة. في الحالة دي الرقم اللي تحتيه خط، بيبقى زي ما هو. والحالة التانية، لو كان الرقم خمسة أو أكبر. فبنضيف واحد على الرقم اللي تحتيه خط. وبما إن الرقم اللي موجود في الخانة اللي على يمين الرقم اللي تحتيه خط، هو ستة. فإحنا هنضيف واحد للرقم اللي تحتيه خط.

فلمّا هنضيف واحد على التسعة اللي تحتيها خط. ونحذف كل الأرقام اللي موجودة على يمينها. هنلاقي إن العدد العشري تسعة وتسعين وستة وتسعين من المية. لمّا هنقرّبه لأقرب جزء من عشرة. هنقرّبه إلى مية وصفر من عشرة.

نقدر نتأكد من الإجابة بتاعتنا باستخدام خط الأعداد. فهنمثّل العدد العشري تسعة وتسعين وستة وتسعين من مية، على خط الأعداد، زي ما هيظهر لنا. وبالفعل من خلال خط الأعداد، هنلاحظ إن العدد العشري تسعة وتسعين وستة وتسعين من مية، أقرب للعدد مية وصفر من مية، من العدد تسعة وتسعين وتسعين من مية. معنى كده فعلًا، لمّا هنقرّب العدد العشري تسعة وتسعين وستة وتسعين من مية، لأقرب جزء من عشرة، هنقرّبه لمية وصفر من عشرة.

بعد كده هنشوف المثال التالت. عندنا في المثال إن متوسط ارتفاع الجمل العربي، هو واحد وخمسة وتمانين من مية متر تقريبًا. عايزين نقرّب العدد العشري واحد وخمسة وتمانين من مية، لأقرب متر.

معنى إن إحنا عايزين نقرّبه لأقرب متر، يعني إحنا عايزين نقرّبه لأقرب عدد صحيح. فبالنسبة للعدد العشري اللي عندنا هو: واحد وخمسة وتمانين من مية. وعايزين نقرّبه لأقرب عدد صحيح، فهنحط خط تحت الرقم اللي موجود في خانة الآحاد. والرقم الموجود في خانة الآحاد هو واحد، بالتالي هنحطّ خط تحت الواحد.

بعد كده هنبصّ على الرقم اللي موجود على يمين خانة الآحاد. وهنشوف هل الرقم ده أصغر من خمسة؛ في الحالة دي هيفضل الرقم اللي تحتيه خط زي ما هو. ولّا الرقم ده خمسة أو أكبر من خمسة؛ في الحالة دي بنضيف واحد للرقم اللي تحتيه خط. فبالنسبة للعدد العشري اللي عندنا، هنلاقي الرقم اللي موجود على يمين خانة الآحاد، هو تمنية. معنى كده إن إحنا هنضيف واحد على الرقم اللي تحتيه خط. وبعد كده هنحذف كل الأرقام اللي موجودة على يمين الرقم اللي تحتيه خط. معنى كده إن لأقرب متر، هيبقى متوسط ارتفاع الجمل العربي هو: اتنين متر.

بكده يبقى إحنا في الفيديو ده عرفنا إزاي نقرّب الأعداد العشرية. وكنا علشان نقرّب عدد عشري، بنحط خط تحت رقم الخانة اللي إحنا عايزين نقرّب ليها. بعد كده بنبصّ على الرقم اللي موجود على يمين الخانة دي. وبيبقى عندنا حالتين. حالة لو كان الرقم ده أربعة أو أقل، يعني أصغر من خمسة. فبيفضل الرقم اللي تحتيه خط زي ما هو. أمّا لو كان الرقم ده خمسة أو أكبر من خمسة، فإحنا بنضيف واحد للرقم اللي تحتيه خط. وبعد ما بنقرّب، بنحذف كل الأرقام اللي موجودة على يمين الرقم اللي تحتيه خط.