فيديو: طرح ثلاثة أعداد مكوَّنة من عدة أرقام

٩٥٢‎٢٥ − ٢٧٧‎١ − ٩٣٨‎٢ = _.

٠٤:٢٠

‏نسخة الفيديو النصية

خمسة وتسعين ألف ميتين خمسة وعشرين، ناقص ألفين سبعمية واحد وسبعين، ناقص تسعة آلاف تلتمية اتنين وتمانين، يساوي عدد مجهول.

عشان نقدر نجري عمليات الطرح اللي عندنا دي، محتاجين إن إحنا نعملها على خطوتين. في الخطوة الأولى هنجري أول عملية طرح ونوجد الناتج. أما الخطوة التانية فهتبقى إننا هنطرح من الناتج اللي أوجدنا ده آخر عدد موجود عندنا.

هنبدأ دلوقتي بإجراء عملية الطرح الأولى. هنحط العدد الأول وبعدين نحط علامة الطرح وبعدين العدد التاني. ونتأكد إن كل رقم من الأرقام اللي بيتكوّن منها العددين موجود في الخانة المكانية الصحيحة.

ودايمًا بنبدأ عملية الطرح من خانة الآحاد. هنبدأ نطرح الأرقام اللي موجودة في الخانة دي؛ خمسة ناقص واحد هيساوي أربعة.

بعد كده هنبتدي نطرح الأرقام اللي موجودة في خانة العشرات. اتنين ناقص سبعة مش هينفع نطرح السبعة من الاتنين؛ عشان السبعة أكبر من الاتنين. فهنروح لخانة المئات ونشوف الرقم اللي فيها، هنلاقيه اتنين، هناخد منه واحد فهيتبقى فيها واحد. الواحد اللي أخدناه من خانة المئات لمّا نستخدمه في خانة العشرات، هيبقى بيساوي عشر عشرات. طب خانة العشرات كان فيها اتنين، هيصبح فيها دلوقتي اتناشر. دلوقتي نقدر نطرح الأرقام اللي في خانة العشرات. اتناشر ناقص سبعة يساوي خمسة.

بعدين نروح نشوف الأرقام اللي في خانة المئات. واحد ناقص سبعة، بنفس الطريقة مش هينفع نطرح السبعة من الواحد عشان السبعة أكبر. فهنشوف الخانة المكانية اللي قبلها اللي هي الألوف، ونشوف الرقم اللي فيها. فيها الرقم خمسة، هناخد منه واحد فهيصبح فيها دلوقتي الرقم أربعة. الواحد اللي أخذناه من خانة الألوف، لمّا نحطه في خانة المئات هيمثّل عشر مئات. وخانة المئات أصلًا فيها واحد، يبقى دلوقتي هيبقى فيها حداشر. دلوقتي هنقدر نطرح الأرقام اللي موجودة في خانة المئات. حداشر ناقص سبعة يساوي أربعة.

دلوقتي عايزين نطرح الأرقام الموجودة في خانة الألوف. أربعة ناقص اتنين هيساوي اتنين. وبعدين هنشوف خانة عشرات الألوف. هنلاقي فيها الرقم تسعة وتحت ما فيش أي أرقام؛ يعني كأن فيه صفر. لو قلنا تسعة ناقص صفر هيبقى الناتج تسعة.

كده هيبقى الناتج اللي حصلنا عليه لأول عملية طرح هو اتنين وتسعين ألف ربعمية أربعة وخمسين. دلوقتي عايزين نجري عملية الطرح التانية، فهنطرح منه تسعة آلاف تلتمية اتنين وتمانين، وعايزين نعرف ناتج الطرح هيبقى بيساوي كام.

لو كملنا على الخطوات اللي عملناها، واللي وصلنا بيها لناتج أول عملية طرح. هنطرح منه دلوقتي آخر عدد باقي عندنا، اللي هو تسعة آلاف تلتمية اتنين وتمانين. هنبدأ نطرح الأرقام اللي في خانة الآحاد. أربعة ناقص اتنين يساوي اتنين.

وبعدين الأرقام اللي في خانة العشرات. عايزين نشوف ناتج طرح خمسة ناقص تمنية. التمنية أكبر من الخمسة، فمش هينفع نطرحها من الخمسة. فهنتنقل لخان المئات. هناخد واحد من الرقم اللي في خانة المئات، فهيصبح فيها دلوقتي الرقم تلاتة. أما خانة العشرات فهيصبح فيها الرقم خمستاشر. دلوقتي نقدر نطرح الأرقام اللي في خانة العشرات. خمستاشر ناقص تمنية هيبقى الناتج سبعة.

وبعدين نطرح الأرقام اللي في خانة المئات. تلاتة ناقص تلاتة هيبقى يساوي صفر. بعد كده هنطرح الأرقام اللي في خانة الألوف. اتنين ناقص تسعة، مش هينفع نطرح التسعة من الاتنين؛ عشان التسعة أكبر من الاتنين. فهنروح لخانة عشرات الألوف. هناخد واحد من الرقم اللي فيها، فهيصبح فيها الرقم تمنية. أما خانة الألوف فهيصبح فيها الرقم اتناشر.

دلوقتي نقدر نطرح الأرقام اللي في خانة الألوف. اتناشر ناقص تسعة يساوي تلاتة. أما خانة عشرات الألوف فهيصبح فيها دلوقتي الرقم تمنية. ويبقى كده حصلنا على ناتج الطرح النهائي، اللي هيبقى بيساوي تلاتة وتمانين ألف اتنين وسبعين.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.