تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: مقارنة الأعداد العشرية

سوزان فائق

يوضح الفيديو كيفية مقارنة الأعداد العشرية (أكبر من، أصغر من، تساوي)، باستخدام خط الأعداد، وباستخدام القيمة المكانية.

٠٥:١٧

‏نسخة الفيديو النصية

في الفيديو ده هنتكلّم على مقارنة الأعداد العشرية. مقارنة الأعداد العشرية هو زيّ بالظبط مقارنة الأعداد الصحيحة. بنستخدام طريقتين في المقارنة. يا إمّا بطريقة خط الأعداد، أو بطريقة القيمة المكانية للأرقام. في طريقة خط الأعداد، هنرسم خط الأعداد كتالي. خط الأعداد بيبقى فيه الأعداد مترتّبة مسافات متساوية بينها وبين بعض.

لو أنا عايز أقارن ما بين التلاتة وتمنية من عشرة، وتلاتة وستة من عشرة. فبنقول إن العدد اللي عَ اليمين ببيقى أكبر من الشمال. يعني الأربعة دي أكبر عدد على خط الأعداد ده. والتلاتة ونص دي أصغر عدد على خط الأعداد ده. وأيّ عدد لقينا العدد التاني على يمينه، يبقى اللي اليمين ده أكبر منه. طيب تلاتة وتمنية من عشرة، وتلاتة وستة من عشرة. تلاتة وتمنية من عشرة على يمين التلاتة وستة من عشرة. معنى كده إن التلاتة وتمنية من عشرة، أكبر من تلاتة وستة من عشرة.

الطريقة التانية في المقارنة، هي تحديد القيمة المكانية للرقم. يعني لو عندنا عدد: ستة وتلتمية اتنين وتلاتين من ألف. وعدد تاني: ستة وتمنية وتلاتين من مائة. عايزين نقارن ما بينهم. هنعمل إيه؟ أول حاجة هنعدّ عدد الخانات اللي في العدد ده. هنلاقي واحد، اتنين، تلاتة، أربعة. لازم يكون العدد التاني نفس عدد الخانات.

طيب لو ما كانش زيه، هنعمل إيه؟ هنكمّل بصفر لغاية ما نوصل للخانة اللي زيها. يعني الستة معاها الستة. التلاتة دي معاها التلاتة دي. التمنية معاها التلاتة. هنا هيبقى فيه خانة ناقصة، هنحطّ مكانها صفر على يمين الرقم. على يمين العلامة العشرية، الصفر دي ما بيبقاش لها قيمة. لأنها تلتمية وتمانين من ألف، هي بالظبط تمنية وتلاتين من مية.

إزاي هنقارن العددين ببعض؟ هنقسّم العددين لخانات. بحيث إن الخانة اللي في العدد الأولاني، مقابلة بالظبط لنفس القيمة المكانية اللي في الخانة للعدد التاني. طيب في الستة هنبدأ من عند الشمال، أقصى الشمال. هنلاقي إن الستة زيّها زيّ الستة في العدد التاني. يبقى معنى كده إن إحنا لازم ننزل للخانة الأقل، اللي هي التلاتة.

التلاتة دي من أجزاء العشرة. التلاتة هنلاقيها هي نفسها التلاتة. هناخد الخانة اللي أقل. هنلاقي التمنية، والتلاتة. التمنية أكبر من التلاتة. يبقى معنى كده إن العدد ستة وتلتمية اتنين وتلاتين من ألف، ده أصغر من ستة وتمنية وتلاتين من مائة.

نقلب الصفحة وناخد مثال. عايزين نقارن بين العددين: ربعمية وخمسين من ألف، وخمسة وأربعين من مية. هنعمل إيه؟ أول حاجة هنكمّل الخانات في العددين، يبقوا زيّ بعض. هنلاقي إن في العدد اللي تحت، ناقصُه خانة عشان يبقى زيّ اللي فوق. فهنزوّدها صفر على يمين العلامة العشرية، اللي مالهاش قيمة.

طيب وبعد كده هنعمل إيه؟ هنقسّم الأعداد إلى خانات. والخانات تبقى مقابلة للخانات اللي زيّها بالظبط تحت. طيب أول عدد فيه أربعة. اللي تحته فيه أربعة. إحنا هنبدأ من أقصى الشمال، اللي هو على يمين العلامة العشرية، أجزاء من العشرة. وهنلاقي إن الأربعة هي الأربعة. وهننزل للخانة اللي أقل، هتبقى الخمسة هي الخمسة. وبعدين هنلاقي الصفر تساوي الصفر. يبقى معنى كده إن ربعمية وخمسين من ألف تساوي خمسة وأربعين من مية.

ناخد عددين كمان نقارن ما بينهم. سبعة وتلتمية وأربعة من ألف، والعدد التاني سبعة وتلاتة من عشرة. أول حاجة هنعملها، هنكمّل الخانات اللي ناقصة؛ عشان يبقوا العددين نفس عدد الخانات. هنلاقي إن العدد التاني ناقصُه صفرين بعد التلاتة. وهنقسّم العدد لخانات.

هنقارن الأرقام من أقصى الشمال. هنلاقي السبعة تساوي السبعة. التلاتة هتساوي التلاتة. هننزّل تحت لغاية الصفر يساوي صفر. لغاية ما نلاقي رقمين مختلفين. هنلاقي إن الأربعة والصفر مختلفين. والأربعة أكبر من الصفر. يبقى معنى كده إن العدد سبعة وتلتمية وأربعة من ألف، أكبر من سبعة وتلاتة من عشرة.

ناخد عدد كمان. اتنين وتمنية من عشرة، واتنين وتمنمية من ألف. أول حاجة هنعملها إن إحنا هنكمّل الخانات في العدد اللي ناقص. هنلاقي هنا فيه خانتين ناقصين. وبعد كده نقسّم العدد لخانات. هنقارن من أقصى الشمال. هنلاقي إن الاتنين تساوي الاتنين. التمنية هتساوي التمنية. هننزل لتحت هنلاقي الصفر تساوي الصفر، وبعدين صفر تساوي صفر. معنى كده إن اتنين وتمنية من عشرة، هي هيّاها اتنين وتمنمية من ألف.

يبقى في الفيديو ده اتكلمنا إزاي نقارن ما بين الأعداد العشرية. وإزاي هنعرف إن عددين عشريين متساويين.