نسخة الفيديو النصية
مساحة أحد أوجُه المكعب مية ستة وتسعين سنتيمتر مربع. ما حجم المكعب؟
وخلينا في الأول نفتكر إن المكعب بيبقى ليه ستة أوجُه متطابقة، وبتبقى كلها على شكل
مربع. فمعنى كده إن مساحة أحد أوجُه المكعب هتبقى هي مساحة المربع. وبما إن مساحة المربع بتساوي طول الضلع في طول الضلع. فبالتالي هتبقى مساحة أحد أوجُه المكعب بتساوي طول حرف المكعب في طول حرف المكعب.
وبما إن معطى عندنا إن مساحة أحد أوجُه المكعب هي مية ستة وتسعين سنتيمتر مربع. فبالتالي هيبقى مية ستة وتسعين بيساوي طول الحرف في طول الحرف، واللي إحنا عايزين
نوجده. فمعنى كده إننا عايزين نحدِّد العدد اللي لمَّا نضربه في نفسه هيبقى حاصل الضرب هو مية
ستة وتسعين.
فمن جدول الضرب إحنا عارفين إن حاصل ضرب اتناشر في اتناشر بيساوي مية أربعة وأربعين. فبالتالي هيبقى اتناشر مش هو طول الحرف اللي إحنا عايزينه. فهنجرب بعد كده تلتاشر في تلتاشر. فلما نحسب تلتاشر في تلتاشر، هيبقى حاصل الضرب هو مية تسعة وستين. وبما إن مية تسعة وستين أقل من مية ستة وتسعين، فمعنى كده إننا عايزين نجرب عدد
أكبر. فهنجرب بعد تلتاشر نضرب أربعتاشر في أربعتاشر. فلما نضرب أربعتاشر في أربعتاشر هيبقى حاصل الضرب هو مية ستة وتسعين. فبالتالي هيبقى هو ده العدد اللي إحنا عايزينه.
فبالتالي هيبقى مية ستة وتسعين هي عبارة عن حاصل ضرب أربعتاشر في أربعتاشر. وبالتالي هيبقى طول حرف المكعب بيساوي أربعتاشر سنتيمتر. والمطلوب في السؤال إننا نوجد حجم المكعب. وخلينا في الأول نفتكر إن حجم المكعب بيساوي طول الحرف في طول الحرف في طول الحرف.
وبما إننا أوجدنا إن طول حرف المكعب هو أربعتاشر سنتيمتر. فبالتالي هيبقى حجم المكعب بيساوي أربعتاشر سنتيمتر، في أربعتاشر سنتيمتر، في أربعتاشر
سنتيمتر. فلما نحسبها هتبقى بتساوي ألفين سبعمية أربعة وأربعين. وبما إننا بنوجد حجم فهتبقى الوحدة هي سنتيمتر مكعب. وبالتالي هيبقى حجم المكعب هو ألفين سبعمية أربعة وأربعين سنتيمتر مكعب. وهتبقى هي دي إجابة السؤال.