فيديو: إيجاد التكرار النسبي لحدث

أُلقيت قطعة نقود غير منتظمة ٣٥٠ مرة، وظهرت الكتابة ١٧٨ مرة. احسب نسبة تكرار الصورة.

٠٢:٠١

‏نسخة الفيديو النصية

أُلقيت قطعة نقود غير منتظمة تلتمية وخمسين مرة، وظهرت الكتابة مية تمنية وسبعين مرة. احسب نسبة تكرار الصورة؟

يعني عندنا قطعة نقود، ورميناها تلتمية وخمسين مرة، وقطعة النقود بيبقى ليها وجهين: الصورة والكتابة، فظهرت الكتابة مية تمنية وسبعين مرة، والمطلوب في السؤال إننا نحسب نسبة تكرار الصورة، فعشان نحسب نسبة تكرار الصورة، أول حاجة عايزين نعرف عدد مرات ظهور الصورة، فبما إن قطعة النقود أُلقيت تلتمية وخمسين مرة، وظهرت الكتابة مية تمنية وسبعين مرة.

فبالتالي عشان نوجد عدد مرات ظهور الصورة، يبقى هنطرح عدد مرات ظهور الكتابة من إجمالي عدد مرات الرّميات؛ يعني هتبقى بتساوي تلتمية وخمسين اللي هو إجمالي عدد الرميات، ناقص مية تمنية وسبعين اللي هو عدد مرات ظهور الكتابة. فلمّا نحسب تلتمية وخمسين ناقص مية تمنية وسبعين، هتبقى بتساوي مية اتنين وسبعين. لكن ده عدد مرات ظهور الصورة، والمطلوب في السؤال إننا نحسب نسبة تكرار الصورة؛ يعني عايزين نوجد احتمال وقوع الحدث اللي هو ظهور الصورة؛ فبالتالي هيبقى احتمال تكرار الصورة بيساوي عدد مرات ظهور الصورة، مقسوم على إجمالي عدد الرميات. وزي ما عرفنا إن عدد مرات ظهور الصورة هو مية اتنين وسبعين؛ فبالتالي هيبقى الاحتمال هو مية اتنين وسبعين مقسوم على عدد المرات الكلي اللي هو تلتمية وخمسين، فبالتالي هيبقى احتمال وقوع الحدث إننا نحصل على صورة بيساوي مية اتنين وسبعين على تلتمية وخمسين، ونقدر نبسّط الكسر ده عن طريق إننا نقسم البسط والمقام على اتنين، فلمّا نقسم البسط مية اتنين وسبعين على اتنين، هنحسبها هتبقى بتساوي ستة وتمانين. وأما المقام هنقسم تلتمية وخمسين على اتنين، فلمّا نحسبها هتبقى بتساوي مية خمسة وسبعين؛ وبالتالي هيبقى نسبة تكرار الصورة هي ستة وتمانين على مية خمسة وسبعين.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.