فيديو: حل المسائل الكلامية التي تتضمن الضرب والجمع

لدى بائع فاكهة ٤ صناديق، في كل صندوق ١٢١ تفاحة حمراء؛ و٩ صناديق أخرى، في كل صندوق ٩١ تفاحة صفراء. أوجد عدد التفاح الكلي.

٠٦:٢٩

‏نسخة الفيديو النصية

لدى بائع فاكهة أربع صناديق، في كل صندوق مية واحد وعشرين تفاحة حمراء. وتسع صناديق أخرى، في كل صندوق واحد وتسعين تفاحة صفراء. أوجد عدد التفاح الكلي.

عندنا واحد بياع فاكهة، معاه أربع صناديق. آدي صندوق، اتنين، تلاتة، أربعة. مالهم بقى الأربعة صناديق دول؟ في كل صندوق مية واحد وعشرين تفاحة لونها أحمر. يبقى فيه هنا كده إيه؟ مية واحد وعشرين تفاحة لونها أحمر. موجودين فين؟ في الأربع صناديق اللي عندنا دول.

طيب، وإيه تاني؟ وتسع صناديق أخرى. كمان تسع صناديق، في كل صندوق واحد وتسعين تفاحة صفرا. تسع صناديق أهم؛ واحد، اتنين، تلاتة، أربعة، خمسة، ستة، سبعة، تمنية، تسعة. في كل صندوق واحد وتسعين تفاحة صفرا. واحد وتسعين. يبقى إيه هو عدد التفاح الكلي اللي عند البياع؟

علشان نحسب عدد التفاح الكلي، هنعمل تلات خطوات. أول خطوة هنعرف عدد التفاح الأحمر. وتاني خطوة هنعرف عدد التفاح الأصفر. وتالت خطوة هنجمع التفاح الأحمر مع التفاح الأصفر.

طيب هو عدد التفاح الأحمر إيه؟ إحنا عندنا هنا مية واحد وعشرين تفاحة لونها أحمر في كل صندوق. طب وإحنا عندنا كام صندوق؟ أربعة. يبقى نضرب مية واحد وعشرين في أربعة. ده هيطلع لنا عدد التفاح الأحمر. طيب وبالنسبة لعدد التفاح الأصفر؟ نفس الكلام. إحنا عندنا كام تفاحة صفرا؟ واحد وتسعين في الصندوق الواحد. وهم كلهم كام صندوق؟ تسع صناديق. يبقى واحد وتسعين في تسعة، هينتج لنا عنه عدد التفاح الأصفر. ونجمع الأحمر على الأصفر نجيب التفاح الكلي.

هنكتب بقى المعطيات على جنب عشان نبدأ نحل. التفاح الأحمر مية واحد وعشرين تفاحة، في أربع صناديق. والتفاح الأصفر واحد وتسعين تفاحة صفرا، في تسع صناديق. يلا نحسب عدد التفاح الأحمر. هنبدأ نضرب مية واحد وعشرين في أربعة. نحطهم بشكل رأسي كده، ونضرب. نبدأ بأول حاجة أربعة نضربها في واحد. أربعة في واحد بتساوي أربعة. بعدين نضرب أربعة في اتنين. أربعة في اتنين بتمنية. بعدين نضرب أربعة في واحد. أربعة في واحد بأربعة. ده معناه إن عدد التفاح الأحمر ربعمية أربعة وتمانين تفاحة حمراء. هنحطها في برواز كده عشان هنستخدمها بعدين.

تاني خطوة عدد التفاح الأصفر. هنضرب واحد وتسعين في تسعة. يلّا أول حاجة هنضربها تسعة في واحد. تسعة في واحد تساوي تسعة. بعدين نضرب التسعة في تسعة. التسعة في تسعة بواحد وتمانين. يبقى ده معناه إن عدد التفاح الأصفر تمنمية وتسعتاشر تفاحة صفراء. وبرضو نبروزها.

كده إحنا معانا عدد التفاح الأحمر وعدد التفاح الأصفر. السؤال عندنا بيقول لنا إيه؟ أوجد عدد التفاح الكلي. فنكتب عدد التفاح الكلي يساوي عدد التفاح الأحمر زائد عدد التفاح الأصفر. هتساوي عدد التفاح الأحمر ربعمية أربعة وتمانين، زائد عدد التفاح الأصفر تمنمية وتسعتاشر. ونبدأ نجمع.

هنحطهم تحت بعض بشكل رأسي علشان نعرف نجمعهم. إحنا قلنا إن عدد التفاح الأحمر ربعمية أربعة وتمانين. هنمسح هنا كده، ونكتب ربعمية أربعة وتمانين. وعدد التفاح الأصفر تمنمية وتسعتاشر. فهنشيل ده، ونكتب مكانه تمنمية وتسعتاشر. ونجمع ربعمية أربعة وتمانين زائد تمنمية وتسعتاشر.

أربعة زائد تسعة؟ أول حاجة هنجمعها الآحاد مع الآحاد الأربعة والتسعة. فعشان كده قلنا أربعة زائد تسعة. التسعة في مخنا والأربعة على إيدينا، ونقول بعد التسعة عشرة، حداشر، اتناشر، تلتاشر. يبقى أربعة زائد تسعة تلتاشر. تلاتة تحت الآحاد، وواحد فوق العشرات.

طيب بعد كده نجمع العشرات. واحد زائد تمنية؟ تسعة. زائد واحد؟ عشرة. عشرة تتكتب صفر وواحد، صفر هنا تحت العشرات، وواحد فوق المئات.

بعدين نجمع المئات. واحد زائد أربعة؟ خمسة. خمسة زائد تمنية؟ التمنية في مخنا، والخمسة على إيدينا، ونعدّ بعد التمنية تسعة، عشرة، حداشر، اتناشر، تلتاشر. فده معناه إن خمسة زائد تمنية تلتاشر. نكتبها كلها تلتاشر؛ وده لأن ما فيش حاجة تاني هتتجمع.

فده معناه إيه؟ إن ناتج الجمع أو عدد التفاح الكلي ألف تلتمية وتلاتة تفاحة. يبقى نيجي هنا نعمل تساوي، عدد التفاح الكلي تساوي إيه؟ ألف تلتمية وتلاتة تفاحات. وتبقى هي دي الإجابة النهائية والنتيجة الصح بتاع المسألة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.