فيديو السؤال: إيجاد حجم متوازي مستطيلات بمعلومية ارتفاعه ومساحة قاعدته الرياضيات

إذا كان ارتفاع متوازي مستطيلات ١٥ سم ومساحة قاعدته ٧٦٠ سم^٢، فما حجمه؟

٠٢:٠٨

‏نسخة الفيديو النصية

إذا كان ارتفاع متوازي مستطيلات خمستاشر سنتيمتر، ومساحة قاعدته سبعمية وستين سنتيمتر مربع. فما حجمه؟

يعني معطى عندنا متوازي مستطيلات. فهيبقى مثلًا زيّ الشكل اللي قدّامنا ده. ومعطى عندنا إن ارتفاعه خمستاشر سنتيمتر. ومعطى عندنا إن مساحة قاعدته هي سبعمية وستين سنتيمتر مربع. والمطلوب إننا نوجد حجم متوازي المستطيلات.

وفي الأول خلّينا نفتكر إن حجم متوازي المستطيلات هو حاصل ضرب طوله في عرضه في ارتفاعه. لكن اللي معطى عندنا في السؤال هو ارتفاع متوازي المستطيلات، ومعطى عندنا مساحة قاعدته. لكن مش معطى عندنا ولا الطول ولا العرض. لكن خلّينا ناخد بالنا إن قاعدة متوازي المستطيلات، اللي هي مظلّلة عندنا، بتبقى على شكل مستطيل.

وبما إن معطى عندنا مساحة قاعدة متوازي المستطيلات واللي هي سبعمية وستين سنتيمتر مربع. فمعنى كده إن سبعمية وستين سنتيمتر مربع هي حاصل ضرب طول القاعدة في عرضها؛ لأن هي على شكل مستطيل. وده لأن مساحة المستطيل بتساوي حاصل ضرب طوله في عرضه.

وخلّينا ناخد بالنا إن طول وعرض القاعدة هو في نفس الوقت طول وعرض متوازي المستطيلات. فمعنى كده إن الطول في العرض عندنا هنا هو هو هيبقى سبعمية وستين سنتيمتر مربع، اللي هو مساحة قاعدة متوازي المستطيلات.

فمعنى كده إن حجم متوازي المستطيلات هيبقى بيساوي مساحة القاعدة في الارتفاع. فهنعوّض عن مساحة القاعدة بسبعمية وستين سنتيمتر مربع، وهنعوّض عن الارتفاع بخمستاشر سنتيمتر. فلمّا نضرب سبعمية وستين في خمستاشر هيبقى الناتج بيساوي حداشر ألف وربعمية. وأمّا الوحدة هي سنتيمتر مكعب؛ لأننا بنوجد حجم متوازي المستطيلات.

وبالتالي هيبقى حجم متوازي المستطيلات هو: حداشر ألف وربعمية سنتيمتر مكعب. وهتبقى هي دي إجابة السؤال.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.