تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: القيمة المكانية لعشرات الآلاف

نهال عصمت

يتناول الفيديو كيفية قراءة وكتابة الأعداد، وطريقة تحديد القيمة المكانية لعشرات الآلاف، وأمثلةً توضح ذلك.

٠٦:١٧

‏نسخة الفيديو النصية

القيمة المكانية لعشرات الآلاف.

هنتعلم نقرا ونكتب الأعداد، ونحدد القيمة المكانية لعشرات الآلاف. لو عندنا العدد اتنين وتلاتين ألف مية ستة وخمسين، وعايزين نكتب القيمة المكانية لكل رقم. هنبدأ نستخدم جدول القيم المكانية، وهيساعدنا أكتر في قراءة الأعداد الكبيرة.

هنرسم جدول القيم المكانية بالشكل الآتي. أول تلات أرقام هنسميهم مجموعة الآحاد، وتاني تلاتة أرقام هنسميهم مجموعة الآلاف. مجموعة الآحاد هتتكون من آحاد وعشرات ومئات. ومجموعة الآلاف هي كمان هتتكون من آحاد وعشرات ومئات.

هنبدأ نكتب أرقام العدد اتنين وتلاتين ألف مية ستة وخمسين في جدول القيم المكانية. هيبقى في مجموعة الآحاد: في خانة الآحاد ستة. وفي خانة العشرات خمسة. وفي خانة المئات واحد. وفي مجموعة الآلاف: هيبقى في الآحاد اتنين. وفي العشرات تلاتة.

القيمة المكانية للعدد ستة في خانة الآحاد هو ستة. والقيمة المكانية للعدد خمسة في خانة العشرات هو خمسين. والقيمة المكانية للعدد واحد في خانة المئات هو مية. بعد كده القيمة المكانية للعدد اتنين في خانة آحاد الآلاف اللي هي خانة الآلاف، هيبقى ألفين. والقيمة المكانية للعدد تلاتة في خانة عشرات الآلاف، هيبقى تلاتين ألف. وبكده عرفنا القيمة المكانية لكل رقم.

بعد كده عايزين نكتب العدد اتنين وتلاتين ألف مية ستة وخمسين بتلات طرق. هنبدأ نستخدم الصيغة القياسية والصيغة التحليلية والصيغة اللفظية في كتابة العدد.

أول حاجة الصيغة القياسية بيظهر فيها أرقام العدد. يعني هنكتب اتنين وتلاتين ألف مية ستة وخمسين.

أما الصيغة التحليلية يظهر فيها مجموع القيم المكانية للأرقام. يعني هنجمع ستة زائد خمسين زائد مية زائد ألفين زائد تلاتين ألف.

وآخر صيغة عندنا هي الصيغة اللفظية. ودي بنستخدم فيها الكلمات. يعني هنكتب اثنان وثلاثون ألفًا ومائة وستة وخمسون.

يبقى كده عرفنا نكتب القيمة المكانية لكل رقم في العدد اتنين وتلاتين ألف مية ستة وخمسين. وعرفنا كمان نكتب العدد بتلات طرق مختلفة، وهي الصيغة القياسية، والصيغة التحليلية، والصيغة اللفظية.

هنبدأ نجيب صفحة جديدة ونشوف مثال. من أصغر الكواكب في المجموعة الشمسية كوكب أورانوس، ويبلغ طول قطره حوالي خمسين ألف سبعمية تلاتة وعشرين كيلومترًا. أول مطلوب: اكتب طول قطر كوكب أورانوس بالصيغة التحليلية.

الصيغة التحليلية بيظهر فيها مجموع القيم المكانية للأرقام. عندنا العدد خمسين ألف سبعمية تلاتة وعشرين، عايزين نكتب العدد بالصيغة التحليلية. يعني هيساوي تلاتة في خانة الآحاد، يعني تلاتة. زائد اتنين في خانة العشرات، يعني عشرين. زائد سبعة في خانة المئات، يعني سبعمية. زائد صفر في خانة الآلاف، هو الصفر. زائد خمسة في خانة عشرات الآلاف، يعني خمسين ألف. يبقى كده قدرنا نكتب طول قُطر كوكب أورانوس بالصيغة التحليلية.

المطلوب التاني: اكتب طول قطر كوكب أورانوس بالصيغة اللفظية.

الصيغة اللفظية بنستخدم فيها الكلمات. يعني عايزين نكتب العدد خمسين ألف سبعمية تلاتة وعشرين بالكلمات. يبقى هنبدأ نكتب: خمسون ألفًا وسبعمائة وثلاثة وعشرون. يبقى كده عرفنا نكتب طول كوكب أورانوس بالصيغة اللفظية.

وبكده اتكلمنا وعرفنا إزاي نقرا ونكتب الأعداد، ونحدّد القيم المكانية لعشرات الآلاف.